1 येशू कौनो एकथो ठाउँमे प्राथना करतिहिँत। जब ऊ प्राथना करके सेक्लाँ ते हुँकार चेलनमेसे एक जाने हुँकिन्हे कहल, "हे प्रभु, जसिके यूहन्ना अपन चेलनहे सिखाइल बा, ओस्तेके हम्रिहिन्हे फेन प्राथना करे सिखादी।" 2 येशू ओइन्हे कलाँ, "तुहुरे प्राथना करेबेर असिक कहहो, ‘हे हमार बाबा, जे स्वर्गमे बतो, तोहाँर नाउँ पवित्र करजाए, तोहाँर राज आए। 3 हमार दिनभरिक खाना हम्रिहिन्हे हर दिन देऊ। 4 हमार पापहे माफ करदेहो। काकरेकी हम्रे फेन हमार विरोधमे अपराध करुइयनहे माफ करदेथी। हम्रिहिन्हे परीक्षामे परे ना देहो’।"

5 तब् येशू ओइन्हे कलाँ, "मानलेऊ कि तुहुरिन्मेसे केऊ आधा रातके अपन संघरियक थेन जाके कबो, ‘संघरिया, महिन्हे तीनथो रोटी सापत देऊ। 6 काकरेकी मोरिक एकथो संघरिया महा दूरसे मोरिक थेन आइल बा और उहिहे खवाइक लग मोरिक थेन कुछु नै हो।’ 7 ऊ भित्तरसे जवाफ देके कहत, ‘महिन्हे ना सताऊ, दवार लागगिल बा, और मोरिक छाईछावा मोरिक संग पठरीमे बताँ। मै उठ्के अप्निहे कुछु नै देहे सेकम।’ 8 मै तुहुरिन्हे कहतुँ, संघरिया रलेसे फेन रातके उठ्के देना मन नै लग्हिस। तभुन फेन उ संघरियक लगातार बिन्ती करके मंग्लक कारण उठ्के उहिहे जतरा चाहल रहिहिस, ओत्रा उहिहे दि। 9 तुहुरिन्हे ज्या चाही उ परमेश्वरसे माँगो और ऊ तुहुरिन्हे दैदिहीँ, खोजो ते तुहुरे भेटैबो, ढकढकाऊ ते तुहुरिन्के लग खोलजाजाई। 10 काकरेकी हरेक जे माँगत, उहिहे मिलत। जे खोजत, उ भेटाइत। जे ढकढकाई, ओकर लग दवार खोलजाजाई। 11 तुहुरिन्मेसे कोन बाबा असिन हुई, जेकर छावा रोटी मंग्लेसे उहिहे पठरा दि, कि मच्छी मंग्लेसे मच्छिक बदला सँप्वा दि? 12 अथवा अण्डा मंग्लेसे उहिहे बिच्छी दि? 13 तुहुरे दुष्ट होके फेन अपन लर्कनहे मजा चिज देहे जन्थो कलेसे, स्वर्गमे रहुइया तुहुरिन्के बाबासे मँगुइयनहे कतरा धेउर करके पवित्र आत्मा दिहीँ।"

14 येशू एकथो लट्वकमेसे भूत्वा निकारतिहिँत, जे बोले नै सेके। भूत्वा निक्रल ते उ लाट मनैया बोले लागल, और मनैनहे अचम्म लग्लिन। 15 पर ओइन्मेसे केऊ-केऊ कहल, "भूत्वनके मलिक्वा शैतानसे ऊ भूत्वनहे निकारत।" 16 दोसुरजाने भर हुँकार परीक्षा करक लग हुँकिन्से स्वर्गमेसे एकथो चमत्कार करके देखैना माँग करलाँ। 17 पर ओइन्के विचार जानक लग ऊ ओइन्हे कलाँ, "यदि कौनो राजके मनै असिन समूहमे बँटजैहीँ, जेने एकदोसर जहनसे झगरा कर्ती रथाँ, कलेसे उ राज पक्कै फेन बर्बाद होजाई। जोन घरेम फूट रहत, उ घर बर्बाद होजाइत। 18 यदि शैतान अपने भूत्वनसे लरी कलेसे ऊ अपनेहे ओरवादी। और असिक हुई कलेसे ओकर राज कसिके टिकिहिस्? काकरेकी तुहुरे मोरिक बारेमे कथो कि यी शैतानके सहायतासे भुत्वन निकारत। 19 यदि मै शैतानके सहायतासे भूत्वनहे भगैथुँ कलेसे, तुहुरिन्हे अनुशरण करुइयन भर केकर सहायतासे उहिहे निकरथाँ? तबेकमारे ओइनेहेँ तुहुरिन्के न्याय करहीँ। 20 पर परमेश्वरके अंग्रीलेके मै भूत्वनहे निकरथुँ कलेसे, परमेश्वरके राज तुहुरिन्केमे आसेकल बा। 21 शैतानहे हँथियारसे समह्रल बल्गर मनैयासे तुलना करे सेकजाइत। जब ऊ बल्गर मनैया अपन घरक रक्षा करत कलेसे ओकर मालमत्ता सुरक्षित रथिस। 22 पर उहिसे बल्गर मनैया आके ओकरमे हमला करके उहिहे जिटल कलेसे, ओकर भरोसा करल सक्कु हँथियार छिनके लैजाई, और ओकर मालमत्ता लूटके बाँटदी। 23 जे मोरिक पक्षमे नै हो, उ मोरिक विरोधमे रहत। और जे मोरिक संग नै बिटोरत, उ छित्रादेहत।"

24 "जब भूत्वा मनैयकमेसे निकरके जाइत, तब उ बिसाँइक लग सुखल ठाउँ खोज्ती नेगत, पर केहोँरो नै भेटाइत। तब् ऊ अपन मनमने कहत, ‘जोन मनैयकमेसे मै निकरके अइनु, फेनदोस्रे मै ओकर जीवनमे चलजिम।’ 25 जब उ भूत्वा घुमके आइत, तब भूत्वा उ मनैयक जीवनहे खाली, बहारल और सवाँरल घर हस भेटाइत। 26 तब् उ भूत्वा जाइत और अपनसे फेन धेउर खराब आकुर सातथो भूत्वन अपन संग नानत। और मनैयक भित्तर पैँठ्के ओइने वहाँ डेरा दरथाँ और उ मनैयक पाछेक दशा आघेक दशासे फेन धेउर खराब होजिथिस।" 27 जब येशू यी बात बत्वैती रहिँत, तब्बेहेँ भीड़मेसे कौनो एकथो स्त्री चिल्लाके कहल, "धन्य हो, उ नारी जे तुहिन्हे पाइल और अपन दूध पिवाइल।" 28 पर येशू कलाँ, "बेन ओइने धन्य हुइताँ जेने परमेश्वरके वचन सुन्थाँ और ओकर पालन करथाँ।"

29 भीड़के मनै जम्मा हुइबेर येशू कलाँ, "दुष्ट और व्यभिचारी पुस्ता चिन्हा खोजत। पर यी पुस्ताहे परमेश्वरके अगमवक्ता योनक चिन्हा बाहेक दोसुर चिन्हा नै देजाई। 30 काकरेकी जोन रितिसे योना निनवेक मनैनके लग चिन्हा हुइल रहे वहे रितिसे मै, मनैयक छावा फेन यी पुस्ताके लग चिन्हक रुपमे रहम। 31 दक्खिनके महारानी न्यायक दिनमे तुहुरिन्के संग ठरह्याई और तुहुरे दोषी ठहरजिबो। काकरेकी ऊ पृथ्वीक छोरसे सुलेमानके बुद्धिक बात सुने आइल रहे। पर हेरो, सुलेमानसे महान केऊ यहाँ बा। पर तुहुरे अपन मन बदलके पाप करना नै छोरलो। 32 निनवेक मनै न्यायक दिनमे तुहुरिन्के संग ठरह्यैहीँ और तुहुरे दोषी ठहरजिबो। काकरेकी ओइने योनक प्रचार सुनके अपन मन बदलके पाप करना छोरदेलाँ। और हेरो, योनासे फेन महान केऊ यहाँ बा, पर तुहुरे अपन मन बदलके पाप करना नै छोरलो।"

33 येशू कलाँ, "केऊ फेन दियाहे नानके खटियक और छिटुवक तरे नै धारत! यिहिहे एकथो दिउँतमे धारजाइत ताकि सक्कुहुनहे यकर ओजरार मिले सेके। 34 तोहाँर आँखी तोहाँर शरीरके लग एकथो दिया हस हो। तबेकमारे यदि तोहाँर आँखी ठिक बताँ कलेसे, तोहाँर पूरा शरीर ओजरार रहत, पर उ खराब बा कलेसे तोहाँर शरीर फेन अंधार रहत। 35 तबेकमारे हौश्यार होऊ, तुहुरिन्केमे रहल ओजरार अंधार ना होजाए। 36 यदि तुहुरिन्के पूरा शरीर ओजरारसे भरल बा कलेसे या कौनो फेन भाग अंधार नै हो कलेसे, उ सक्कु असिके ओजरार रहत, जसिके दियक किरण तुहुरिन्हे ओजरार देहत।"

37 येशू बोलके सेक्लाँ ते कौनो एकथो फरिसी हुँकिन्हे खाना खाइक लग बलाइल; और येशू भित्तर जाके खाना खाई बैठ्लाँ। 38 पर खैनासे आघे हुँकिन्हे हाँथ नै धुइल देख्के उ फरिसी दलके मनैयाहे अचम्म लग्लिस। 39 पर प्रभु उहिहे कलाँ, "तुहुरे फरिसीनके खोरिया और तथियक बाहेर पाँजर मिस्थो, पर ओकर भित्तर भर फुहर रहत। अस्तेके तुहुरे अपन हाँथ धुइथो, पर तुहुरिन्के मन फुहर रहत। तुहुरे पूरा लाल्ची और दुष्ट बतो। 40 ए मूर्ख मनै, जे बाहेरके भाग बनाइल, का वहे भित्तर फेन नै बनाइल? 41 बेन अपन भाँरक भित्तर रहल खैना चिज गरिबनहे देऊ और तुहुरिन्के लग सक्कु चिज शुद्ध होजाई। 42 पर तुहुरे फरिसीनहे धिक्कार! काकरेकी तुहुरे पुदिना और आरूद और सक्कु जड़ीबुटीक दशांश देथो। पर न्याय और परमेश्वरके प्रेमहे वास्ता नै करथो। मजा रहत कि यदि तुहुरे न्याय और परमेश्वरहे प्रेम कर्ती रतो, और दशांश फेन देना नै छोरतो। 43 तुहुरे फरिसीनहे धिक्कार! काकरेकी तुहुरिन्हे बैठक भवनहुँक्रिहिनमे आदरके ठाउँमे बैठ्ना मजा लागत। और बजारमे मनै तुहुरिन्हे आदरसे नमस्कार करिँत् कना तुहुरे चहथो। 44 तुहुरिन्हे धिक्कार! काकरेकी तुहुरे उ चिहानहुँक्रिहिन् हस बतो, जोन नै देखैथाँ और चाल नै पाके मनै ओम्ने नेङथाँ।" 45 यहूदी कानुनके गुरुनमेसे एकथो हुँकिन्हे कहल, "गुरुजी, यी बात करके अप्नि ते हमार फेन बेज्जत कर्थी।" 46 येशू कलाँ, "तुहुरे यहूदी कानुनके गुरुनहे फेन धिक्कार! काकरेकी तुहुरे मोशक नियम कानुनहे असिन बनाके मनैनहे पालन करे कथो, जिही पालन करना कर्रा रहत। पर तुहुरे खुद ऊ नियम पालन नै करथो। 47 धिक्कार तुहुरिन्हे! काकरेकी तुहुरिन्के पुर्खन जोन परमेश्वरके अगमवक्तनहे मुवैलाँ, तुहुरे वहे अगमवक्तनके चिहान बनैथो। 48 असिके तुहुरे अपन पुर्खनके काममे साँखी बतो और ओइन्के संग सहमत हुइथो। काकरेकी ओइने ओइन्के हत्या करलाँ और तुहुरे भर ओइन्के चिहान बनैथो। 49 तबेकमारे परमेश्वरके बुद्धि फेन कहल, कि मै ओइन्के थेन परमेश्वरके अगमवक्तनहे और निउतरह्यनहे पठैबुँ। ओइन्मेसे किहुहे ओइने मुवैहीँ और किहुहे सतैहीँ। 50 ताकि संसारके शुरुवातसे जतरा फेन परमेश्वरके अगमवक्तनके खुन बहागिल बा, उ सक्कुहुनके लेखा यी युगके मनैनसे लेजाए। 51 हो, मै तुहुरिन्हे कहतुँ, हाबिलके खुनसे लेके, वेदी और मन्दिरके पवित्र-ठाउँक बिच्चेम मारगिलक जकरियासमके खुनके लेखा यी पुस्तासे लेजाजाई। 52 तुहुरे यहूदी कानुनके गुरुनहे धिक्कार! काकरेकी तुहुरे ज्ञानके चाभी ते लेलो। पर तुहुरे अप्निहीँ फेन भित्तर प्रवेश नै कर्लो और औरे प्रवेश करुइयनहे फेन रोक्लो।" 53 जब येशू वहाँसे निकरलाँ, तब् यहूदी कानुनके गुरुनके और फरिसीनके हुँकार घोर विरोध कर्ती बहुत्ते विषयनमे हुँकिन्हे प्रश्न करे लग्लाँ। 54 और हुँकार मुहेँमेसे निकर्लक बातसे हुँकिन्हे फँसैना मौकामे बैठ्लाँ।