1 वहे बेला बहुत्ते जाने वहाँ आपुग्लाँ, और येशूसे ओइने गालील प्रदेशके उ मनैनके बारेमे बात बत्वाई लग्लाँ। जेकर हत्या रोमके राजपाल पिलातस करदेले रहे, जब ओइने मन्दिरमे बलि चह्राइतिहिँत। 2 तब् यी सुनके येशू ओइन्हे जवाफ देलाँ, "का तुहुरे सोँच्थो कि यी गालील प्रदेशके मनै गालीलके औरे मनैनसे धेउर पापी रहिँत कि ओइन्हे असिन दुःख भोगे पर्लिन। 3 मै तुहुरिन्हे कहतुँ यदि तुहुरे पाप करना नै छोरबो, और अपन मन नै बदल्बो कलेसे तुहुरे फेन सक्कु जाने अस्तेके नाश होजिबो। 4 और उ अठार जहनहे सम्झो, जेने यरुशलेम शहर थेन सिलोआमके धरहरा ढलल ते ओइने दबके मुगिलाँ। का ओइने पूरा यरुशलेम शहरमे बैठुइयनमेसे सक्कुहुनसे धेउर पापी रहिँत? 5 मै तुहुरिन्हे कहतुँ, असिन नै हो। पर यदि तुहुरे पाप करना नै छोरबो, और अपन मन नै बदल्बो कलेसे तुहुरे फेन सक्कु जाने अस्तेके नाश होजिबो।"

6 ओकरपाछे फेनदोस्रे येशू एकथो दृष्टान्त कलाँ, "कौनो मनैया अपन अंगुरके बारीमे एकथो अञ्जीरके बोँट लगाइल रहे। और हर साल बोँटमे फारा फरल कि नै कहिके ऊ हेरे आए। पर ऊ नै भेटाए। 7 तब् ऊ बारीक अख्वारी करुइयाहे कहल, ‘हेर, तीन साल होगिल, मै यी अञ्जीरके रुख्वामे फारा खोजतुँ, पर नै भेटैथुँ। यिहिहे काटके ढलादे, काकरेकी यी मजा जमिनहे अगोरना काम किल करता।’ 8 पर बारीक अख्वारी करुइया कहल, ‘अप्नि यिहिहे एक साल आकुर रहे दि। मै यकर आँजरपाँजर कोरके मल दारम। 9 और अइना साल यी अञ्जीरके रुख्वामे* फारा फरगिल कलेसे मजै होजाई और नै फरल कलेसे अप्नि उहिहे ढलादेबी।’"

10 एकचो असिन हुइल, जब यहूदिनके बिँसैना दिनमे कौनो एकथो बैठक भवनमे येशू शिक्षा देहतिहिँत। 11 तब वहाँ एकथो जन्नी मनैया रहे, जिहिहे अठार सालसे अपाहिज करुइया भूत्वा लागल रहिस। ऊ कुब्री होगिल रहे और ऊ सोझे होके ठरह्याई नै सेके। 12 येशू उहिहे देख्लाँ और बलाके कलाँ, "ए नारी, तैँ अपन कुब्रीपनसे मुक्त होगिले।" 13 तब् येशू ओकरमे अपन हाँथ धरलाँ ते ऊ जुरतेहेँ सोझ होगिल, और परमेश्वरके प्रशंसा करे लागल। 14 यहूदी बैठक भवनके मुखिया रिसागिलस। काकरेकी येशू बिँसैना दिनमे चोख्वाइल रहिँत। और यहूदी बैठक भवनके मुखिया मनैनहे कहे लागल, "एक हप्तामे छे दिन काम करक लग हम्रिहिन्हे अनुमति बा। तबेकमारे यहे छे दिनमे आके चोख्वाऊ, बिँसैना दिनमे नै।" 15 पर प्रभु येशू जवाफ देलाँ, "ए कपटीन! तुहुरिन्मेसे के बिँसैना दिनमे घारी और तबेलामेसे अपन गोरु या गडहाहे खोलके पानी पिवाई नै लैजाइत? 16 यी जन्नी मनैया जे अब्राहामके सन्तान हो। यिहिहे अठार सालसम शैतान बहानके धारल रहिस। बिँसैना दिनमे यिहिहे चोख्वैना का गलत रहे?" 17 येशू यी बात कहिके सेक्लाँ ते हुँकार सक्कु विरोधिनके लाज होगिलिन। पर हुँकार कर्लक सक्कु महान कामहे देख्के मनै आनन्दित होगिलाँ।

18 तब् येशू कलाँ, "परमेश्वरके राज केकर हस बा और मै यकर तुलना किहिसे करुँ? परमेश्वरके राज धर्तीक सक्कु बियामेसे सक्कुहुनसे छुटी लहटक बिया हस हो। 19 ओसिक ते लहटक बिया सक्कु बियामेसे छुटी हो। पर यी जब भारी हुइत। तब बहरके यी बारीक सक्कु सागसब्जीनसे ढेंग होजाइत। यकर अतरा नम्मा-नम्मा दहियाँ हुइथिस कि आकाशमे उरुइया चिरैँ फेन यकर दहियँक छाहीँमे ठाँट बनाई सेक्थाँ।" 20 फेनदोस्रे ऊ कलाँ, "परमेश्वरके राजहे मै केकर संग तुलना करुँ? 21 उ खमीर हस हो, जोन एकथो जन्नी मनैया पच्चीस किलो पिठामे मिलाइल। और एक घचिक रहिके खमीर पूरा पीठामे फैलगिल।"

22 आब शहर-शहर और गाउँ-गाउँ होके यात्रा कर्ती शिक्षा देती येशू अपन चेलनके संग यरुशलेम ओहोँर जाइतिहिँत। 23 तब कौनो एकथो मनैया हुँकिन्हे पुँछल, "हे प्रभु, का परमेश्वर गोड्गात मनैनहे किल सदाकालके दण्डसे बँचैहीँ?" पर येशू ओइन्हे कलाँ, 24 "साँकिर दवार सोज पैँठ्ना कोशिस करो, परमेश्वरके राजमे जैना डगर साँकिर बा, और यी डगर सोज जाई सेक्ना महा कर्रा बा। काकरेकी मै तुहुरिन्हे कहतुँ, बहुत्ते जाने पैँठे खोज्हीँ, पर पैँठे नै सेक्हीँ। 25 जब परमेश्वर, जे घरक मलिक्वा हो, ऊ उठ्के दवार लगाके सेकी ते, तुहुरे बाहेर ठरह्याके बिन्ती करके दवार ढकढक्यैबो और कबो, ‘प्रभु हमार लग दवार खोलदेऊ।’ पर ऊ जवाफ देके कहिहीँ, ‘तुहुरे के हुइतो और कहाँसे अइलो, मै नै चिन्थुँ।’ 26 तब् तुहुरे कहे लग्बो, ‘हम्रे अप्निक आघे खैली और पिली, और हमार गल्लीमे अप्नि शिक्षा देली।’ 27 ऊ कहिहीँ, ‘मै तुहुरिन्हे कहतुँ, तुहुरे के हुइतो और कहाँसे अइलो मै नै जन्थुँ। अधर्म काम करुइयन, महिन्से दूर होजाऊ।’ 28 जब तुहुरे अब्राहाम, इसहाक, याकूब और सक्कु अगमवक्तनहे परमेश्वरके राजके भित्तर देख्बो और तुहुरे अप्ने भर बाहेर फेँकाइल रबो। तब् वहाँ तुहुरे रुइबो और दाँत किचकिचैबो। 29 संसारके सक्कु ओहोँरसे मनै अइहीँ, और ओइने परमेश्वरके राजके खाना खाइक लग शामिल हुइहीँ। 30 हेरो, बहुत्ते मनै जेने अब्बे भारी बताँ, ओइने छुटी कराजैहीँ। और जेने अब्बे विनम्र बताँ, ओइने भारी बनाजिहीँ।"

31 वहे बेला कौनो फरिसीनके आके येशूहे कलाँ, "अप्नि यहाँसे निकरके चलजाई, काकरेकी हेरोद रज्वा अप्निहे मारे चाहता।" 32 येशू ओइन्हे कलाँ, "जाके उ मनैयाहे कहिदेऊ, जे गिदरा हस चलाँख बा, कि हेरो, आज और काल मै भूत्वन भगैम, और बेमार मनैनहे चोख्वैना काम करम, और तेसर दिन मै अपन काम पूरा करलेहम। 33 तभुन फेन आज, काल और परौँ फेन महिन्हे नेंग्ती रहे परी। काकरेकी परमेश्वरके अगमवक्ता यरुशलेम शहरेमे किल मुवाजाई।"

34 येशू कलाँ, "ए यरुशलेमके मनै, ए यरुशलेमके मनै! तुहुरे परमेश्वरके उ अगमवक्तनहे मुवादर्लो, जेने बहुत पहिलेक समयमे रहिँत। और ओइन्हे पठरालेके मर्लो, जेने तुहुरिन्के थेन पठागिल रहिँत। जसिके मुर्घनिया अपन चिङनिनहे पख्नक तरे धारके अख्वारी करत, ठिक ओस्तेके मै फेन चहनु कि मै तुहुरिन्के लर्कनके अख्वारी करुँ। पर तुहुरे असिन नै चहलो। 35 हेरो, तुहुरिन्के घर उजरगिल बा। मै तुहुरिन्हे कहतुँ जबसम तुहुरे, ‘परमप्रभुक नाउँमे अउइया धन्यके हुइताँ,’ नै कबो तबसम तुहुरे महिन्हे नै देख्बो।"