ख्रीष्टके चेलनके तिरे परना मोल
25 मनैनके बरवार भीड़ येशूक संग जाइतेहे और घुमके ऊ ओइन्हे कलाँ, 26 "यदि केऊ मोरिक थेन आई और अपन दाई, बाबा, जन्नी, छाइछावन और दादू-भैया, दिदी-बाबुनसे धेउर और अपन प्राणके फेन ख्याल नै करके जबसम महिन्हे प्रेम नै करी, तबसम ऊ मोरिक चेला हुई नै सेकी। 27 जोन मनैया मोरिक चेला हुइलक कारण दुःख सहक लग और मुअक लग फेन तयार नै रही। ऊ मोरिक चेला हुई नै सेकी। 28 तुहुरिन्मेसे कौनो एक जाने धरहरा बनैना योजना बनाइत। कलेसे ऊ सक्कुहुनसे आघे बैठ्के यी बातके हिसाब करी, कि यिहिहे बनाइक लग कत्थुक खर्च लागी। और ऊ हेरी कि पूरा करक लग ओकर थेन रहल पैँसा पुगी कि नै? 29 यदि ऊ असिक नै करी, जब ऊ जग दारी और उहिहे पूरा करे नै सेकी कलेसे, मनै असिक कहिके ओकर मजाक उराके कहिहीँ, 30 ‘यी मनैया बनाई ते दतल रहे, पर ओरवाई नै सेकल।’ 31 यदि एकथो रज्वा दश हजार मनैनहे लेके दोसुर रज्वासे लरक लग निक्रत, जे बीस हजार मनैनहे लेके ओकर विरोधमे आइल बा। कलेसे सक्कुहुनसे आघे उ रज्वा बैठ्के यी बातके फैसला करी कि दोसुर रज्वासे सामना करे सेकी कि नै? 32 उहिसे नै सेक्ना हस हुइहिस कलेसे उ दोसुर रज्वा दूरे रहलमे मिलापके प्रस्ताब धारे अपन राजदूतहे पठाई। 33 तबेकमारे तुहुरिन्मेसे जे अपन संग रहल सक्कु चिज नै छोरी, ऊ मोरिक चेला हुई नै सेकी।"