1 येशू हेरतिहिँत ते धनी मनैनहे ओइन्के अपन-अपन दान मन्दिरके दानपात्रमे दारत देख्लाँ। 2 ऊ एकथो गरीब विधवाहे वहाँ दुई पैँसा चह्राइत फेन देख्लाँ। 3 तब् येशू कलाँ, "जात्तिके मै तुहुरिन्हे कहतुँ, दानपात्रमे चह्रुइयनमेसे यी विधवा औरे सक्कुहुनसे धेउर चह्राइल बा। 4 काकरेकी ओइने धनी बताँ, और ओइने ओम्नेमेसे थोरचे देले बताँ, जेकर ओइन्हे कौनो जरुरी नै रहिन। पर यी विधवा गरीब रहिके फेन उ सक्कु दैदेहल, जोन उहिहे जित्ती रहक लग चाहतिहिस।"

5 तब् केऊ-केऊ सुग्घुर-सुग्घुर पठरा और दानमे भेटाइल सामानसे सजाइल मन्दिरके बारेमे बात करे लग्लाँ। येशू कलाँ, 6 "तुहुरे ज्या देखतो असिन समय आई, जब एकथो पठरक उप्पर दोसुर पठरा नै रही, उ सक्कु भस्काजाई।" 7 ओइने हुँकिन्हे पुँछ्लाँ, "गुरुजी, यी सक्कु कब हुई? और यी बात हुइबेर का चिन्हा रही?" 8 येशू कलाँ, "हौश्यार रहो, तुहुरिन्हे केऊ फेन ना बहकाए। मोरिक नाउँमे बहुत्ते जाने ‘मै वहे हुइतुँ, और समय लग्गे आगिल बा’ कहिके कहिहीँ। ओइन्के पाछे तुहुरे ना लग्हो। 9 जब तुहुरे लड़ाई और लड़ाईक हल्ला सुन्बो, तब् ना डरैहो। काकरेकी सुरुमे यी घटना हुइही परी, पर अन्त्य भर जुरतेहेँ नै हुई।"

10 तब् येशू ओइन्हे कलाँ, "एकथो जातिक मनै दोसुर जातिक मनैनहे हमला करहीँ। और एकथो राज्यक मनै दोसुर राज्यक मनैनहे हमला करहीँ। 11 भयङ्कर भुँइचाल हुइहीँ, बहुत्ते ठाउँमे अनिकाल और महामारी हुई। भयङ्कर आतंक हुई, और आकाशमेसे बरवार-बरवार चिन्हा देखा परहीँ। 12 पर यी सक्कु बात हुइनासे आघे, मनै तुहुरिन्हे पक्रिहीँ और सतैहीँ। और तुहुरिन्हे बैठक भवनमे सौँपदिहीँ। और झेलमे दारदिहीँ। मोरिक कारण ओइने तुहुरिन्हे बैठक भवनमे पिटिहीँ। रज्वक आघे और अदालतमे लेके जैहीँ। 13 पर तुहुरिन्के लग यी एकथो गवाही देना मौका हुई। 14 तबेकमारे अपनहे बँचाइक लग का बोलम कहिके आघेसे चिन्ता ना करहो। 15 काकरेकी मै तुहुरिन्हे असिक कना मुह और दिमाक देबुँ कि तुहुरिन्के विरोधीन तुहुरिन्हे जवाफ घुमाई नै सेक्हीँ। और ना ते तुहुरिन्के बात काटे सेक्हीँ। 16 पर तुहुरिन्के दाई-बाबा और दादू-भैयन, नातपाँतनके और संघरियन फेन तुहुरिन्हे पक्रादिहीँ। और तुहुरिन्मेसे किहु-किहुहे ओइने मुवैहीँ। 17 मोरिकमे विश्वास कर्लक कारण बहुत्ते मनै तुहुरिन्के दुश्मन होजिहीँ। 18 पर तभुन फेन तुहुरिन्के कपारिक एकथो भुट्ला टुट्नासम फेन नोकसान नै हुई। 19 तुहुरे परमेश्वरमे विश्वासयोग्य पलिरबो कलेसे परमेश्वर तुहुरिन्के जीवनहे बँचैहीँ।"

20 येशू कलाँ, "जब तुहुरे यरुशलेम शहरहे सेननसे घेरल देख्बो, तब बुझजिहो कि ओकर विनाश लग्गेहेँ बतिस। 21 तब् यहूदिया प्रदेशमे रहुइयन पहाड़ ओहोँर भागिँत। नगर भित्तर रहुइयन बाहेर भाग्जाँइत और बाहेर गाउँमे रहुइयन नगर भित्तर ना पैथिँत। 22 काकरेकी उ बदला लेना समय रही ताकि लिखल बात सक्कु पूरा होजाए। 23 उ दिनमे उ जन्नीनके लग यी डरलग्तिक समय रहिहीन, जेने पैनाहाँ रहिहीँ। और ओइन्के लग फेन जेने अपन लरकनहे दूध पिवैहीँ, यनके लग भग्ना महा कर्रा हुइहिन। काकरेकी पृथ्वीमे बरवार कष्ट आई, और यी जातिक उप्पर क्रोध आपरी। 24 ओइने तरवाललेके मुवाजिहीँ, और सक्कु राष्ट्रमे कैदी बनाके लैजाजिहीँ। और गैर-यहूदिनके शक्तिक समय पूरा नै हुइतसम यरुशलेम शहरहे जितके कब्जा करहीँ।"

25 येशू कलाँ, "दिन, जोन्ह्याँ और तोरैँयनकेमे अचम्मक चिन्हा देखा परी, और पृथ्वीमे रहल देश-देशके जातिजातिन संकटमे परजिहीँ। काकरेकी ओइने समुन्दरके गर्जन और छालके हल्लासे घब्राजिहीँ। 26 डरके कारण और संसारमे हुई अइना घटनक बात देख्ति-देख्ति मनै मूर्छा परहीँ। काकरेकी आकाशके सक्कु शक्ति यहोँरओहोँर डगमगाजिहीँ। 27 ओकरपाछे मै, मनैयक छावाहे शक्ति और बरवार महिमक संग बद्रीमे अइति रहल ओइने देख्हीँ। 28 जब यी चिज हुई लागी ते तुहुरे हिम्मत बहानके स्थिर पलिरहहो। काकरेकी तुहुरिन्के मुक्ति लग्गे रही।"

29 येशू ओइन्हे एकथो दृष्टान्त कलाँ: "अञ्जीरके रुख्वा और सक्कु रुख्वाहे हेरो, 30 लावा पल्हाइल देख्के तुहुरे जानजिथो कि घाम छेँक आगिल बा। 31 ओस्तेके तुहुरे फेन जब यी बात हुइत देख्बो। तब् परमेश्वरके राज लग्गेहेँ बा कहिके जानजिहो। 32 जात्तिके, मै तुहुरिन्हे कहतुँ, यी जबानक कौनो मनै तबसम नै मुहीँ, जबसम यी घटना नै होजाई। 33 आकाश और पृथ्वी नाश होजाई, पर जोन मै कनु, उ सदादिन पलिरही।"

34 येशू कलाँ, "तबेकमारे तुहुरे हौश्यार रहहो, असिके तुहुरिन्के मनके लापरवाही, मद्वापन और जिन्गीक चिन्तासे तुहुरिन्के मन सुस्त ना होजाए। और उ दिन तुहुरिन्के उप्पर एकफाले फाँदा हस ना आजाए। 35 काकरेकी अस्तेहेँके पृथ्वीमे रहुइयन सक्कु जहनके उप्पर यी आजाई। 36 तबेकमारे जक्ति रहो, और हर समय प्राथना कर्तिरहो ताकि तुँ यी सक्कु अइना घट्नासे बँचे सेको। और मै, मनैयक छावक आघे ठरह्याइक लग योग्य बने सेको।"

37 येशू दुप्पहरके मन्दिरमे शिक्षा दिँत, और रातके निकरके जैतून कना परबत्वामे रात बिताइँत। 38 हुँकार वचन सुनक लग बहुत्ते मनै बेहान्नी मन्दिरमे हुँकार थेन आँइत।