1 अखमिरी रोटीक तिहुवार लग्गे आगिल रहे। यिहिहे निस्तार-तिहुवार कहिजाइत। 2 मुख्य पुजारीनके और यहूदी कानुनके गुरुनके हुँकिन्हे कसिके मुवाई कहिके मौका खोजिँत, पर मनैनसे ओइने डराँइत।

3 तब् बाह्र जहनमेसे एकथो करियोत गाउँक यहूदक भित्तर शैतान पैँठ्गिलिस। 4 ओइन्के हाँथेम हुँकिन्हे कसिके पक्रादेना कहिके मुख्य पुजारी और कप्ताननके थेन जाके ऊ सल्लाहा करल। 5 ओइने खुशी हुइलाँ। और उहिहे चाँदीक सिक्का देना स्वीकार करलाँ। 6 ऊ सहमत होगिल, और भीड़ नै रहल बेला हुँकिन्हे पक्रादेना मौका खोजे लागल।

7 अखमिरी रोटीक तिहुवारके दिन आइल, जोन दिन निस्तार-तिहुवारके भेँरवा बलि चह्राई परिन। 8 येशू पत्रुस और यूहन्नाहे असिक कहिके पठैलाँ, "जाके हमार लग निस्तार-तिहुवारके खाना तयार करो, ताकि हम्रे खाई सेकी।" 9 ओइने हुँकिन्हे पुँछ्लाँ, "हम्रे यी खाना कहाँ बनाई?" 10 ऊ ओइन्हे कलाँ, "तुहुरे शहरमे पैँठ्बो ते गग्रीमे पानी बोकुइया एकथो मनैया तुहुरिन्हे भेटाई। ऊ जोन घरेम पैँठी, वहाँ सम् तुहुरे ओकर पाछे लग्हो। 11 और तुहुरे उ घरक मलिक्वाहे कहहो, ‘गुरुजी अप्निहे पुँछतताँ, कि मोरिक अपन चेलनके संग निस्तार-तिहुवारके खाना खैना पहुना-कोन्ती कहाँ बा?’ 12 तब ऊ तुहुरिन्हे सवाँरल उपरका तल्हक एकथो बरवार कोन्ती देखाई, वहैँ तुहुरे हमार लग निस्तार-तिहुवारके खाना रिझैहो।" 13 ओइने गैलाँ और हुँकार कहल हस भेटैलाँ, और ओइने निस्तार-तिहुवारके खाना तयारी करलाँ।

14 और जब बेला हुइल, तब् येशू निउतरह्यनके संग खाना खाई बैठ्लाँ। 15 येशू ओइन्हे कलाँ, "मोरिक महा भारी इच्छा रहे, कि मै दु:ख भोग्ना और मुनासे आघे यी निस्तार-तिहुवारके खाना तुहुरिन्के संग खाऊँ। 16 काकरेकी मै तुहुरिन्हे कहतुँ, परमेश्वरके राजमे यी उदेश्य पूरा नै हुइत सम् मै यी खाना फेनदोस्रे कबु नै खैम।" 17 तब् अंगुरके रस रहल खोरिया लेके परमेश्वरहे धन्यवाद देके येशू कलाँ, "यी लेऊ और तुहुरे आपसमे बाँटलेऊ। 18 काकरेकी मै तुहुरिन्हे कहतुँ, परमेश्वरके राज नै आइतसम् आबसे अंगुरके रस मै कबु नै पिअम।" 19 और येशू रोटी लेलाँ, और धन्यवाद देके सेकके उ रोटीहे खन्टैलाँ, और ओइन्हे असिक कती देलाँ, "तुहुरिन्के लग देलक यी मोरिक शरीर हो। मोरिक सम्झनामे असिके करहो।" 20 अस्तेहेँक खाके सेकके ऊ खोरिया लेलाँ और कलाँ, "यी खोरिया तुहुरिन्के लग बहाइल मोरिक खुनमे स्थापित करल लावा करार हो। 21 पर हेरो, महिन्हे पक्रुइयक हाँथ मोरिक संग टेबुलमे बतिस। 22 काकरेकी मै, मनैयक छावा ते ठहराइल अनुसार जैहिक परी। पर उ मनैयाहे डरलग्तिक सजाय हुइहिस, जे महिन्हे पकरवादी।" 23 तब ओइने आपसमे पुँछे लग्लाँ कि हमारमेसे असिन के हुई जे असिन काम करी।

24 तब् ओइन्मेसे सक्कुहुनसे प्रमुख के मानजाई कना चेलनके बिच्चेम वाद-विवाद हुई लग्लिन। 25 येशू ओइन्हे कलाँ, "गैर-यहूदिनके रज्वन ओइन्के उप्पर शासन करथाँ, और ओइन्के उप्पर अधिकार चलुइयन ‘उपकारी’ कहाजिथाँ। 26 पर तुहुरे भर असिन ना होऊ। तुहुरिन्मेसे जे भारी बा, ऊ छुटी बने, और अगुवा होउइया भर सेवा करे। 27 काकरेकी भारी के हो? खाना खाई बैठुइया कि ठरह्याके सेवा करुइया? का खाना खाई बैठुइया भारी नै हो? पर मै तुहुरिन्के बिच्चेम एकथो सेवा करुइया हस बतुँ। 28 तुहुरे भर मोरिक परीक्षामे महिन्हे साथ देहुइयन हुइतो। 29 जसिके मोरिक बाबा महिन्हे एकथो राज देहल, मै फेन तुहुरिन्हे देहम। 30 ताकि मोरिक राजमे तुहुरे मोरिक टेबुलमे खैबो, और पिबो और इजरायलके बाह्रै कुलके न्याय करके सिंहासनमे बैठ्बो।"

31 येशू कलाँ, "सिमोन, ए सिमोन, हेरो, जसिके एकथो किसान गोहूँमेसे भूसाहे अलग कराइत। ओस्तेके परमेश्वरसे शैतान तुहुरिन् सक्कु जहनहे जाँचक लग और मजा मनैनहे खराब मनैनमेसे अलग कराइक लग अनुमति लेसेकल बा। 32 पर तुँ मोरिकमे विश्वास करना ना छोरो कहिके मै तोहाँर लग प्राथना कर्नु। और पाछे जब तुँ मोरिकमे फेनदोस्रे बल्गरसे विश्वास करबो ते तुँ भैयनहे विश्वासमे स्थिर रहे सिखैहो।" 33 फेनदोस्रे पत्रुस येशूहे कहल, "हे प्रभु, मै अप्निक संग झेलमे जैना और मुअक लग फेन तयार बतुँ।" 34 तब येशू उहिहे कलाँ, "पत्रुस मै तुहिन्हे कहतुँ, तुँ महिन्हे नै चिन्थुँ कहिके तीनचो अस्वीकार नै करतसम् आज मुर्घा नै बोली।"

35 येशू ओइन्हे कलाँ, "जब मै तुहुरिन्हे खुशीक खबर प्रचार करक लग बिना पैँसक ठैली, झोला और बिना जुत्तक बाहेर पठाइल रहुँ, ते का तुहुरिन्हे कौनो चिजके कमि हुइल?" तब ओइने कलाँ, "नै हुइल।" 36 तब येशू ओइन्हे कलाँ, "पर आब बात दोसुर रही, जेकर थेन ठैली बा, ऊ अपन संग उहिहे लैलेहे, ओस्तेहेँक झोला फेन लैलेहे। और जेकर थेन तरवाल नै हो। ऊ अपन कोट बेँचके एकथो तरवाल किनलेहे। 37 काकरेकी मै तुहुरिन्हे कहतुँ, जसिके पवित्र शास्त्रमे ज्या मोरिक बारेमे लिखल बा: ‘उहिहे अपराधीनके हस व्यवहार हुइल’ कहिके लिखल बात मोरिकमे पूरा हुइना जरुरी बा। काकरेकी मोरिक बारेमे लिखल बात पूरा हुई जाइता।" 38 तब चेलनके कलाँ, "हे प्रभु, हेरो, यहाँ दुईथो तरवाल बा।" येशू कलाँ, "अतरा फेन बहुत हो।"

39 बाहेर निकरके सदादिनके हस येशू जैतून पहाड़मे गैलाँ, और हुँकार चेलनके फेन हुँकार पाछे-पाछे लग्लाँ। 40 उ ठाउँमे पुगके सेकके येशू ओइन्हे कलाँ, "तुहुरे प्राथना कर्ती रहो और परीक्षामे ना परो।" 41 येशू ओइन्से लगभग तीस मिटर दूर जाके ठेहुनी टेकके प्राथना करलाँ, 42 "हे मोरिक बाबा, हुई सेकी कलेसे, यी खोरिया मोरिक थेनसे हट्जाए। तभुन फेन मोरिक इच्छा नै, पर तोरिक इच्छा पूरा होए।" 43 तब् स्वर्गमेसे एकथो स्वर्गदूत आके हुँकिन्हे तागत देहक लग हुँकार थेन देखा परल। 44 और एकदम कर्रा परल समयमे येशू आकुर धेउर प्राथना करे लग्लाँ। और खुनके बरबर बुन्दा गिरे हस हुँकार पस्ना जमिनमे गिरतिहिन। 45 प्राथनामेसे उठ्के चेलनके थेन अइलाँ ते येशू ओइन्हे शोकके कारण निदाइल भेटैलाँ। 46 येशू ओइन्हे कलाँ, "तुहुरे काकरे निदाइतो? उठो और परीक्षामे नै परक लग प्राथना करो।"

47 येशू बोल्ती रहिँत, तब्बेहेँ एकथो भीड़ वहाँ आपुगल। बाह्रथो चेलनमेसे एकथो यहूदा कना ओइन्के आघे-आघे आइल। येशूहे चुम्मा खाइक लग ऊ हुँकार लग्गे गैल। 48 पर येशू उहिहे कलाँ, "यहूदा, का तुँ मै, मनैयक छावाहे चुम्मासे विश्वासघात करे चहथो?" 49 तब् हुँकार चेलनके का हुइना बा कहिके देख्के हुँकिन्हे कलाँ, "प्रभु, का हम्रे तरवाल चलाई?" 50 ओइन्मेसे एकथो मनैया प्रधान पुजारीक नोकरहे मारल, और ओकर दाहिन कान काटके छिङ्टा देहल। 51 पर येशू कलाँ, "होगिल्, आब रहेदेऊ।" तब उ मनैयक कान छुके येशू उहिहे पहिलेक हस बनादेलाँ। 52 येशूक विरोधमे आइल मुख्य पुजारीनहे, मन्दिरके कप्तानहुँक्रिहिनहे और यहूदी दलके नेतनहे येशू कलाँ, "का तुहुरे डाँकक विरोधमे आइल हस तरवाल और भट्ठा लेके आइल बतो? 53 मै दिन-दिने मन्दिरमे अप्निनके संग रहेबेर अप्निनके मोरिक विरोधमे हाँथ नै उठैली। पर आब अप्निनके समय बा। अन्धकारके शक्ति यहे हो।"

54 ओइने येशूहे पकरके लैगिलाँ, और हुँकिन्हे प्रधान पुजारीक घरेम नन्लाँ। पर दूरेसे पत्रुस हुँकार पाछे-पाछे लागल। 55 वहाँ अंगनक बिच्चेम आगी बारके मनै गौरह्याके बैठल रहिँत। पत्रुस फेन ओइन्के संगे बैठगिल। 56 एकथो नोकर्नी आगिक ओजरारमे उहिहे बैठल देख्के घत्गरसे हेरल, और कहल, "यी मनैया फेन हुँकारे संग रहे।" 57 पर पत्रुस असिक कहिके अस्वीकार करल, "ए नारी, मै हुँकिन्हे नै चिन्थुँ।" 58 थोरिक समय पाछे दोसुर फेन उहिहे देख्के कहल, "तुँ फेन ओइनेहेन्मनिक हुइतो।" पर पत्रुस जवाफ देहल, "ए मनैया, मै नै हुइतुँ।" 59 लगभग एक घण्टा बितके सेकल ते दोसुर एक जाने जोड़ देके असिक कहल, "जात्तिके यी मनैया हुँकारे संग रहे, काकरेकी यी फेन गालीली हो।" 60 पर पत्रुस कहल, "ए मनैया, तैँ का कहते, मै नै जन्थुँ।" ऊ बोल्ती-बोल्ती मुर्घा बोलल। 61 और प्रभु घुमके पत्रुसहे हेरलाँ। "आज मुर्घा बोल्नासे आघे तुँ महिन्हे तीनचो अस्वीकार करबो!" कहिके कलक प्रभुक वचन पत्रुसहे याद अइलिस। 62 और ऊ बाहेर निकरके धरधर-धरधर रुई लागल।

63 तब् येशूहे पक्रुइया मनै हुँकिन्हे गिल्ला करलाँ और पिट्लाँ। 64 हुँकार आँखी टोप देलाँ, और हुँकिन्हे पुँछ्लाँ, "तुहिहे पिटुइया के हो? ले, अगमवाणी बोल्।" 65 ओइने हुँकार निन्दा करलाँ, और हुँकार विरोधमे आकुर बहुत्ते बेज्जत करना बात कलाँ।

66 ओजरार हुइतिकिल जमा हुइलक यहूदी दलके नेतन, मुख्य पुजारीनके और यहूदी कानुनके गुरुनके येशूहे अपन महासभामे लैगिलाँ। 67 और पुँछ्लाँ, "तैँ ख्रीष्ट हुइते कलेसे हम्रिहिन्हे बता।" येशू ओइन्हे कलाँ, "मै कहम ते फेन अप्निनके नै पत्यैबी। 68 और यदि मै पुँछम कलेसे फेन अप्निनके जवाफ नै देबी। 69 पर आबसे मै, मनैयक छावा परमेश्वरके शक्तिक दाहिन पाँजर बैठम।" 70 तब् ओइने सक्कु जाने कलाँ, "असिन हो कलेसे का तैँ परमेश्वरके छावा हुइते?" येशू ओइन्हे जवाफ देलाँ, "अप्निनके कहती, मै वहे हुइतुँ।" 71 ओइने कलाँ, "हम्रिहिन्हे आब और का साँखीक जरुरी बा? काकरेकी हम्रे यक्रेहेक मुहेँमेसे सुनदर्ली।"