लूका 22

पत्रुस ख्रीष्टहे अस्वीकार कर्लक

54 ओइने येशूहे पकरके लैगिलाँ, और हुँकिन्हे प्रधान पुजारीक घरेम नन्लाँ। पर दूरेसे पत्रुस हुँकार पाछे-पाछे लागल। 55 वहाँ अंगनक बिच्चेम आगी बारके मनै गौरह्याके बैठल रहिँत। पत्रुस फेन ओइन्के संगे बैठगिल। 56 एकथो नोकर्नी आगिक ओजरारमे उहिहे बैठल देख्के घत्गरसे हेरल, और कहल, "यी मनैया फेन हुँकारे संग रहे।" 57 पर पत्रुस असिक कहिके अस्वीकार करल, "ए नारी, मै हुँकिन्हे नै चिन्थुँ।" 58 थोरिक समय पाछे दोसुर फेन उहिहे देख्के कहल, "तुँ फेन ओइनेहेन्मनिक हुइतो।" पर पत्रुस जवाफ देहल, "ए मनैया, मै नै हुइतुँ।" 59 लगभग एक घण्टा बितके सेकल ते दोसुर एक जाने जोड़ देके असिक कहल, "जात्तिके यी मनैया हुँकारे संग रहे, काकरेकी यी फेन गालीली हो।" 60 पर पत्रुस कहल, "ए मनैया, तैँ का कहते, मै नै जन्थुँ।" ऊ बोल्ती-बोल्ती मुर्घा बोलल। 61 और प्रभु घुमके पत्रुसहे हेरलाँ। "आज मुर्घा बोल्नासे आघे तुँ महिन्हे तीनचो अस्वीकार करबो!" कहिके कलक प्रभुक वचन पत्रुसहे याद अइलिस। 62 और ऊ बाहेर निकरके धरधर-धरधर रुई लागल।