1 सक्कु सभासदनके उठ्लाँ, और हुँकिन्हे राजपाल पिलातसके थेन नन्लाँ। 2 ओइने येशूक उप्पर असिक कना आरोप लगाई लग्लाँ, "हमार मनैनहे रोमी सरकारके विरोध करक लग बहकैती हम्रे यी मनैयाहे भेटैली। और यी महाराजाहे कर तिर्नासे हम्रिहिन्हे रोकत, और यी अपनहे अप्निहीँ ‘ख्रीष्ट, रज्वा हुइतुँ।’ कहिके कहत हम्रे सुन्ली।" 3 राजपाल पिलातस हुँकिन्हे पुँछल, "का तुँ यहूदिनके राजा हुइतो?" येशू जवाफ देलाँ, "अप्नि फेन असिक कहती।" 4 तब् राजपाल पिलातस मुख्य पुजारीनहे और भीड़हे कहल, "मै यी मनैयकमे असिन कौनो दोष नै भेटैनु।" 5 पर ओइने आकुर हिर्गर होके कहे कलाँ, "यी यहूदिया प्रदेशके सक्कु मनैनके बिच्चेम अपन शिक्षासे दंगा हुइना कारण बनता। यी गालील प्रदेश थेनसे सुरु करल, और आब यहाँ आगिल बा।" 6 पर यी सुनके राजपाल पिलातस पुँछल, "का यी गालील प्रदेशमे रहुइया मनैया हो?" 7 और जब येशू हेरोद रज्वक प्रदेशके मनैया हुइताँ कहिके राजपाल पिलातस पता पाइल, ते ऊ हुँकिन्हे हेरोद रज्वक थेन पठादेहल। काकरेकी वहे समयमे हेरोद रज्वा अप्ने फेन यरुशलेम शहरमे रहे।

8 आब येशूहे देख्के हेरोद गजब खुशी होगिल। काकरेकी ऊ हुँकार बारेमे सुन्लक ओहोँरसे बहुत्ते दिनसे हुँकिन्हे हेरना ओकर मन रहिस। और ऊ येशूहे कौनो शक्तिशाली काम कर्लक हेरना आशा करतेहे। 9 ऊ हुँकिन्हे बहुत बात पुँछल। पर येशू उहिहे कुछु जवाफ नै देलाँ। 10 पर मुख्य पुजारीनके और यहूदी कानुनके गुरुनके ठरह्याके हुँकिन्हे जबरजस्ती दोष लगाई लग्लाँ। 11 हेरोद रज्वा अपन सिपाहिनसे मिलके हुँकार अपमान करल। और ओइने हुँकार गिल्ला करलाँ। ओकरपाछे ऊ हुँकिन्हे रज्वनके घल्ना लुग्गा घलाके राजपाल पिलातसके थेन फिर्ता करदेहल। 12 उ समयसम हेरोद रज्वा और राजपाल पिलातसके दुश्मनी रहिन। पर वहे दिनसे ओइने दुनु जाने संघरिया बनगिलाँ।

13 तब राजपाल पिलातस मुख्य पुजारीनहे, शासकहुँक्रिहिन्हे और जनतनहे जमा करल। 14 और ओइन्हे कहल, "तुहुरे यी मनैयाहे मोरिक थेन नन्लो, और कलो कि यी मनैया मनैनहे दंगा करक लग बहकाइतेहे। और हेरो, मै तोहाँरे सामने ओकर जाँच कर्नु। पर जोन बातके तुहुरे ओकर उप्पर दोष लगाइतो, उ बातके बारेमे मै ओकरमे कुछु फेन दोष नै भेटैनु। 15 और हेरोद फेन ओकरमे दोष नै देखल। काकरेकी ऊ उहिहे हमार थेन फिर्ता करदेहल। और हेरो, यी मनैया मृत्युदण्ड पैना योग्यक कौनो फेन गलत काम नै करल हो। 16 तबेकमारे मै यिहिहे कोर्रालेके पिट्वाके छोरदेबुँ।" 17 निस्तार-तिहुवारके उपलक्ष्यमे राजपाल पिलातस यहूदिनके लग एकथो कैदीहे छोरदेहे। 18 ओइने सक्कु जाने एक्के संग असिक कहिके चिल्लैलाँ, "यिहिहे हटादेऊ, और हमार लग बारब्बाहे छोरदेऊ।" 19 बारब्बा भर शहरमे रहल कौनो विद्रोह और हत्यक आरोपमे कारागारमे थुनगिल रहे। 20 येशूहे छोरदेना इच्छा करके राजपाल पिलातस फेनदोस्रे ओइन्हे सम्झाइल। 21 पर ओइने असिक कती चिल्लैती रलाँ, "क्रूसमे टाँगो, उहिहे क्रूसमे टाँगो।" 22 और ऊ तेसरचो ओइन्हे कहल, "काकरे? ऊ का अपराध कर्ले बा? मै ते यिहिहे मृत्युदण्ड देना कौनो कारण नै भेटैनु, तबेकमारे मै यिहिहे सजाई देके छोरदेबुँ।" 23 पर ओइने महा जोर-जोरसे चिल्लैती हुँकिन्हे क्रूसमे टाँगेपरी कना माँग करे लग्लाँ। ओइन्के चित्कार सफल होगिलिन। 24 और राजपाल पिलातस ओइन्के माँग पूरा करदेना फैसला सुनाइल। 25 राजपाल पिलातस उ मनैयाहे छोरदेहल, जे विद्रोह और हत्यक अभियोगमे कारागारमे परल रहे। उहिहे छोरदेऊ कहिके ओइने माँग करतिहिँत। पर येशूहे ऊ ओइन्के इच्छामे सौँपदेहल।

26 ओइने येशूहे वहाँसे लैजाई बेर, गाउँमेसे अइति रहल सिमोन नाउँक कुरेन शहरके एकथो निवासीहे पकरलाँ। और क्रूस बोकाके उहिहे हुँकार पाछे-पाछे जाई लगैलाँ। 27 और बहुत्ते मनै येशूक पाछे-पाछे जाइतिहिँत। और ओम्ने बहुत्ते जन्नी मनै फेन रहिँत, जेने येशूक लग छाती ठठाठठाके रुइतिहिँत। 28 पर ओइन्के ओहोँर घुमके येशू कलाँ, "ए यरुशलेम शहरके छाइन, मोरिक लग ना रोऊ। पर तुहुरे अपन लग और अपन छाइछावनके लग रोऊ। 29 काकरेकी उ दुःखके दिन आइतताँ। तबे मनै कहिहीँ, ‘धन्य हुइँत उ जन्नी मनै, जेनके कबु लरका नै रहिन, जेने कबु लरका नै पैलाँ, और जेने कबु ओइन्हे दूध नै पिवैलाँ।’ 30 तब् उ समयमे मनै पहाड़हे कहिहीँ, ‘हमार उप्पर गिर और हम्रिहिन्हे टोपदे।’ 31 यदि निर्दोष मनैयक संग फेन असिके हुइत कलेसे सोँचो कि उ मनैनके संग का हुइहिन, जेने यी दण्ड भेटैना लायकके बताँ?" 32 तब् सिपाहिन दुईथो अपराधीनहे मृत्युदण्ड देहक लग येशूक संग लैगिलाँ, ताकि ओइन्हे फेन ओइने येशूक संग मृत्युदण्ड देहे सेकिँत। 33 जब ओइने खप्परे कना ठाउँमे अइलाँ, तब् वहाँ ओइने हुँकिन्हे क्रूसमे टंग्लाँ। और उ अपराधीनमेसे एकथोहे येशूक दाहिन पाँजर और दोसुरहे बाउँ पाँजर क्रूसमे टंग्लाँ। 34 और येशू कलाँ, "हे बाबा, यनहे माफ करदे, काकरेकी यने का करतताँ, उ नै जन्थाँ।" और ओइने हुँकार लुग्गा बखरा लगाके चिट्टा दरलाँ। 35 मनै ठरह्याके हेरतिहिँत। शासकहुँक्रे हुँकार मजाक कर्ती कलाँ, "यी दोसुर जहनहे बँचाइल, यी परमेश्वरके ख्रीष्ट या हुँकार चुनल जन हो कलेसे यी अपनहे बँचाए।" 36 सिपाहिनके फेन आके हुँकिन्हे सिर्का देती असिक कहिके हुँकार गिल्ला करलाँ, 37 "यदि तैँ यहूदिनके रज्वा हुइते कलेसे अपनहे बँचा।" 38 "यी यहूदिनके रज्वा हो" कहिके लिखल एकथो दोष-पत्र फेन हुँकार उप्पर टाँसल रहिन।

39 क्रूसमे टाँगल अपराधीनमेसे एकथो अपराधी हुँकार बदनाम कर्ती कहल, "का तैँ ख्रीष्ट नै हुइते? तैँ अपनेहे और हम्रिहिन्हे बँचा।" 40 पर दोसुर अपराधी उहिहे हप्काके कहल, "का तोरिकमे परमेश्वरके थोरचुन फेन डर नै हो? तैँ फेन ते वहे दण्ड भेटाइते। 41 हमार लग यी दण्ड ठिके बा। काकरेकी हम्रिहिन्हे वहे मिलता, जोन हमार खराब कामके लग ठिक बा। पर यी मनैया ते कुछु फेन खराब काम नै करल हुइँत।" 42 तब् ऊ कहल, "हे येशू, जब अप्नि अपन राजमे एकथो रज्वक रुपमे अइबी ते महिन्हे सम्झबी।" 43 येशू उहिहे कलाँ, "जात्तिके मै तुहिहे कहतुँ, आझी तैँ मोरिक संग स्वर्गमे रबे।"

44 लगभग: दुपहरके बाह्र बजल रहे, तब तीन बजेसम सारा देशहे अंधार छोपदेहल। 45 दिनके ओजरार कम होगिल और मन्दिरके पर्दा बिच्चेमसे फाटके दुई खण्डा होगिल। 46 महा जोरसे चिल्लाके येशू कलाँ, "हे बाबा, मै मोरिक आत्मा तोरिक हाँथेम सौँपतु।" अतरा कहिके येशू अपन प्राण छोरदेलाँ। 47 यी सक्कु घटना देख्के कप्तान असिक कती परमेश्वरके महिमा करल, "जात्तिके, यी धार्मिक मनैया रहे।" 48 यी दृश्य हेरक लग जमा हुइल सक्कु मनै यी घटनाहे देख्के ओइने अपन-अपन छाती ठठैती अपन घरे घुमगिलाँ, यी देखाइक लग कि ओइने महा दुखि बताँ। 49 पर हुँकार सक्कु संघरियन और गालील प्रदेशमेसे अइलक जन्नी मनै दूर ठरह्याके यी घटनाहे हेरतिहिँत।

50 योसेफ नाउँ रहल एकथो मजा और धार्मिक मनैया रहे। ऊ महासभक सदस्य फेन रहे। 51 ऊ ओइन्के सल्लाहामे और काममे सहमति नै देहल रहे। ऊ यहूदिनके अरिमाथिया शहरके मनैया रहे। ऊ परमेश्वरके राजके डगर हेरतेहे। 52 वहे राजपाल पिलातसके थेन जाके येशूक लाहाश माँगल। 53 हुँकार लाहाशहे तरे नानके ओइने मलमलके लुग्गामे लपेट्लाँ। और चट्टानमे खोपके बनाइल एकथो चिहानमे धरलाँ, जहाँ कबु किहुहे नै धारल रहे। 54 उ तयारीक दिन रहे, और बिँसैना दिन सुरु हुई लागल रहे। 55 गालील प्रदेशमेसे हुँकार संग अउइया जन्नीन पाछे-पाछे गैलाँ। और उ चिहान हेरके हुँकार लाहाश कसिके धारगिल बतिन कहिके ओइने देख्लाँ। 56 तब अपन घरे घुमके येशूक शरीरमे लगाइक लग ओइने सुगन्धित द्रव्य और बहुमूल्य महँकना तेल तयार करलाँ। और मोशक नियम कानुनके आज्ञा अनुसार बिँसैना दिनमे ओइने बिँसैला।