1 तब् येशू नगर-नगर और गाउँ-गाउँ हुइती प्रचार कर्ती और परमेश्वरके राजके खुशीक खबर सुनैती घुमे लग्लाँ। हुँकार संग बाह्रै जाने चेलनके रहिँत। 2 कौनो-कौनो जन्नीन फेन हुँकार संग रहिँत, जेने भूत्वा और रोगसे मजा हुइल रहिँत। ओइने यनेहेँ हुइँत : मग्दल गाउँक मरियम, जेकरमेसे सातथो भूत्वा निक्रल रहिस। 3 हेरोद रज्वक कारिन्दा खुजासके जन्नी योअन्ना और सुसन्ना, और औरे बहुत्ते जन्नी मनै अपन धन लेके येशू और हुँकार चेलनके सेवा करिँत्। 4 जब बरवार भीड़ जमा हुइल, और शहर-शहरमेसे झत्तेहेँ बहुत्ते मनै हुँकार चारु ओहोँर जमा होगिलाँ। तब् येशू ओइन्हे एकथो दृष्टान्त बतैलाँ। 5 "एकथो किसान अपन खेट्वामे कौनो बिया बुई निक्रल। जब किसान बिया बुइतेहे, तब ओम्नेमेसे कौनो बिया डग्रिम गिरगिलाँ, और उ बियाहे चिरैँ खादेलाँ। 6 कौनो बिया पठराहा जमिनमे परलाँ, जहाँ धेउर माटी नै रहे। यी झत्तेहेँ जामगिलाँ, काकरेकी यम्ने माटी धेउर गहिँर नै रहे। पर यी बोँट दिनके धेउर घामके कारण कुल्मुलागिल। काकरेकी ओकर लग ठिक्केपर पानी नै रहिस। 7 कौनो आकुर बिया असिन ठाउँमे परल, जहाँ झर्कत्ती जामल रहे, और उ झर्कत्ती बोँटहे दाबदेहल। 8 कौनो बिया मल्गर जमिनमे परलाँ, और जामके सौ गुणा फारा फरैलाँ।" अतरा कहिके सेकके येशू जोरसे कलाँ, "यदि तुहुरे बुझे चहथो कलेसे, यी बातमे ध्यान देऊ कि मै अब्बे तुहुरिन्से का कनु।"

9 हुँकार चेलनके यी दृष्टान्तके मतलब का हो कहिके हुँकिन्हे पुँछ्लाँ। 10 येशू ओइन्हे जवाफ देलाँ, "तुहुरिन्हे ते परमेश्वरके राजके भेद जन्ना ज्ञान देगिल बा। पर दोसुरजाने जेने परमेश्वरके बारेम नै जन्थाँ। ओइन्से मै सक्कु बात दृष्टान्तमे बत्वैथुँ। काकरेकी मै ज्या करथुँ, उ ओइने हेरके फेन ना देखिँत और सुनके फेन ना बुझिँत।"

11 यी दृष्टान्तके मतलब यी हो: बिया भर परमेश्वरके वचन हो। 12 यदि केऊ दोसुर जहनहे वचन सुनाइत कलेसे, ऊ किसानके बिया छिटुइया हस हो। कौनो मनै उ डगर हस हुइँत, जेम्ने कौनो बिया गिरल रहिँत। जब ओइने वचन सुन्थाँ, तब् शैतान आइत और ओइन्के मनमेसे सुन्लक सन्देश लैजाइत। तबेकमारे ओइने विश्वास नै करथाँ और नै बँचाजिथाँ। 13 कौनो मनै पठराहा जमिन हस हुइँत। जेम्ने कौनो बिया गिरल। जस्तेहेँके ओइने वचन सुन्थाँ, ओइने खुशीसे लैलेथाँ। ओइने परमेश्वरके वचनहे अपन मनके गहिँराइमे जरसे बह्रे नै देथाँ। और ओइने यिहिहे थोरिक समयसमके लग किल विश्वास करथाँ। जस्तेके ओइन्के जीवन कर्रा होजैथिन या वचन स्वीकार करेबेर जब ओइन्हे परीक्षा अइथिन, ते ओइने हार मानजिथाँ। 14 जोन बिया झर्कत्तीमे गिरल, ओइने उ मनैनके हस हुइँत, जेने वचनहे सुन्थाँ। पर पाछे यी जीवनके चिन्ता, धन, सुखचैनमे परके परमेश्वरके वचनहे ओइने बिस्राजिथाँ। और अपन जीवनहे ओसिके नै जिथाँ जसिके परमेश्वर चहथाँ। 15 कौनो मनै मल्गर जमिनमे बुइल बियक हस रथाँ। ओइने वचनहे सुन्थाँ, यिहिहे मानलेथाँ। और ओइने ओस्तेहेँ करथाँ, जसिन परमेश्वर चहथाँ कि ओइने करिँत्। ओइने उ मजा फारा हस हुइँत, जे तीस गुणा, साठी गुणा और सौ गुणा फारा फराइत।

16 "केऊ फेन दियाहे नानके खटियक और छिटुवक तरे नै धारत! यिहिहे एकथो दिउँतमे धारजाइत ताकि सक्कुहुनहे यकर ओजरार मिले सेके। 17 मोरिक मतलब यी हो कि परमेश्वर उ सक्कु चिजनहे खुलस्त करहीँ, जोन अभिनसम मनै नै जन्थाँ। और उ सक्कु चिजहे आघे नन्हीँ, जोन अभिनसम नुकल बा। 18 तबेकमारे हौश्यार रहो, तुहुरे कसिके सुन्थो। काकरेकी जिहिहे फेन मोरिक शिक्षा बुझ्ना चाहना बा, परमेश्वर उहिहे आकुर धेउर ज्ञान दिहीँ। काकरेकी जेकर थेन बा, उहिहे देजाई। पर जे मोरिक शिक्षा बुझ्ना धेउर चाहा नै करत, ते परमेश्वर उहिसे उ ज्ञानहे फेन दूर लैजिहीँ, जोन ओकर थेन थोरचे बतिस।"

19 हुँकार दाई और भैयन हुँकार थेन अइलिन, पर भीड़के कारण ओइने हुँकार थेन आई नै सेक्लाँ। 20 केऊ येशूहे कहल, "अप्निक दाई और भैयन बाहेर बताँ, और ओइने अप्निसे बात बत्वाइक लग बताँ।" 21 पर येशू ओइन्हे कलाँ, "मोरिक दाई और मोरिक भैयन ओइने हुइताँ, जेने परमेश्वरके वचन सुन्थाँ, और उहिहे पालन करथाँ।"

22 एक दिन जब साहिँजुन होगिल रहे। तब येशू अपन चेलनहे कलाँ, "चोलो, गालील समुन्दरके उपार जाई।" तब् ओइने लाउमे चहुँरके चलगिलाँ। 23 लाउमे जाइबेर येशू निदागैलाँ। समुन्दरमे बरवार आँधी आई लागल। और ओइन्के लाउ पानीलेके भरे लग्लिन्। ओइने आफतमे परगिलाँ। 24 तब् ओइने येशूक लग्गे आके हुँकिन्हे जगैलाँ, "गुरुजी, गुरुजी, हम्रे डुबे लग्ली।" येशू उठ्के आँधी और तेज छल्काहे घघोट्लाँ ते छल्का थमगिल, और आँधी बिरकुल शान्त होगिल। 25 येशू ओइन्हे कलाँ, "तुहुरिन्के विश्वास कहाँ गिल?" ओइने डरागिलाँ, और ओइन्हे अचम्म लग्लिन। और आपसमे कहे लग्लाँ, "यी के हुइताँ? आँधी और समुन्दरहे फेन अह्रैथाँ और ओइने हिँकार आज्ञा मन्थाँ।"

26 येशू और हुँकार चेलनके गेरासेनसके प्रदेशमे आपुग्लाँ, जोन गालील प्रदेशके उपार बा। 27 जब ऊ धिक्वामे उतरलाँ। तब् ऊ शहरके एकथो मनैयाहे भेटैलाँ, जिहिहे भूत्वा लागल रहिस। ऊ बहुत दिनसे लुग्गा नै घाले और घरेम नै रहिके ऊ मरट्ठीमे बैठे। 28 ऊ येशूहे देखल और चिल्लाके हुँकार आघे घोपत्या होके जोरसे कहल, "हे सर्वोच्च परमेश्वरके छावा येशू, अप्निक महिन्से का काम? बिन्ती करतुँ, महिन्हे ना सताई।" 29 काकरेकी येशू भूत्वाहे उ मनैयकमेसे निकरके जैना आज्ञा देहल रहिँत। उहिहे बहुतचो भूत्वा पक्रल रहिस। उ मनैया चौकिदर्वक रेखदेखमे धारगिल रहे। उ साँकर और सिँक्रीलेके बन्धवा पाए, पर ऊ उ बंधन तुरदारे। तब् भूत्वा उहिहे उजाड़-ठाउँ हुइती लैजाए। 30 येशू उहिहे पुँछ्लाँ, "तोरिक नाउँ का हो?" ऊ कहल, "फौज।" काकरेकी बहुत्ते भूत्वन ओकरमे लागल रहिस। 31 ओइन्हे गहिँर कुण्डामे ना पठाइँत कहिके ओइने हुँकिन्हे बिन्ती करलाँ। 32 लग्गेक डँरवामे सुरिनके एकथो बरवार बगाल चह्रतेहे। तब् सुरिनके भित्तर जाइदी कहिके भूत्वन हुँकिन्हे असिक कहिके बिन्ती करलाँ, और ऊ मन्जुर होगिलाँ। 33 तब् भूत्वन उ मनैयकमेसे बाहेर निकरलाँ। और सुरिनकेमे पैँठगिलाँ, और सुरिनके बगाल पख्वामेसे तरे दौरलिन, और गालील समुन्दरके तलुवामे डुबके मुगिलाँ। 34 आब ज्या हुइल रहे, उ देख्के जोन मनै उ सुरिनहे चह्राइतिहिँत। ओइने वहाँसे भागगिलाँ, और जाके नगर और गाउँ हुइती यी बात बतादेलाँ। 35 तब् ज्या हुइल रहे वहे हेरक लग मनै येशूक थेन अइलाँ। और जोन मनैयक मनसे भूत्वन निक्रल रहिस। उ मनैयाहे लुग्गा लगाके सफा मनके होके येशूक गोरातिर बैठल भेटैलाँ और उ देख्के ओइने डरागिलाँ। 36 जेने यी सक्कु देखल रहिँत, ओइने औरे जहनहे उ भूत्वा लागल मनैया कसिके चोखाइल कहिके ओइन्हे बतादेलाँ। 37 गेरासेनसके आँजरपाँजरका सक्कु गाउँक मनै येशूहे ओइन्के गाउँमेसे चलजाऊ कहिके बिन्ती करलाँ। काकरेकी ओइने महा जोरसे डरागिल रहिँत। तबेकमारे ऊ, लाउमे चहुँरके घुमगैलाँ। 38 पर जोन मनैयक मनसे भूत्वन निक्रल रहिस। ऊ "हुँकार संगे जाई भेटाऊँ" कहिके बिन्ती करे लागल। पर येशू उहिहे असिक कहिके विदा देलाँ, 39 "तुँ अपन घरे घुमजाऊ, और परमेश्वर तोहाँर लग कतरा भारी काम करलाँ, ओकर घोषणा करो।" तब् ऊ चलगिल और येशू ओकर लग कतरा भारी काम कर्ले रहिँत, वहे सारा शहर भर प्रचार करे लागल।

40 येशू घुमके आइबेर भीड़के मनै हुँकिन्हे स्वागत कर्लिन। काकरेकी ओइने सक्कु जाने हुँकिन्हे अँस्याइतिहिँत। 41 याइरस नाउँक एकथो यहूदी बैठक भवनके शासक आके येशूक गोरामे परल, और ओकर घरेम अइहो कहिके हुँकिन्हे बिन्ती करल। 42 काकरेकी बाह्र साल पुगल ओकर एक्केथो किल छाई रहिस। और ऊ मुए लागल रहिस। येशू जाइबेर भीड़के मनै हुँकिन्हे ढक्का मुक्का करतिहिँत। 43 बाह्र साल आघेसे खुन बहना रोग लागल एकथो जन्नी, जिहिहे केऊ फेन चोख्वाई नै सेकल रहिस। 44 उ जन्नी मनैया पाछेसे आके हुँकार लुग्गक झल्लर छुअल, और जुरतेहेँ ओकर खुन बहना बन्द होगिलिस्। 45 येशू कलाँ, "महिन्हे के छुअल?" जब सक्कु जाने नै मन्लाँ, तब् पत्रुस और ओइन्के संग रहुइयन कलाँ, "गुरुजी, भीड़के मनै अप्निहे घेरके ठेलतताँ।" 46 पर येशू कलाँ, "केऊ महिन्हे छुअले बा, काकरेकी शक्ति मोरिकमेसे निकरके जाइत मै पता पैनु।" 47 तब् अप्निहीँ नै नुके सेक्ना बात पता पाके उ जन्नी डरैती लग्लगैती आइल। और हुँकार आघे ठेहुनी टेकके बैठ्गिल, और ऊ हुँकिन्हे छुअल। तब् कसिके जुरतेहेँ मजा होगिल कहिके ऊ सक्कु मनैनके थेन बतादेहल। 48 येशू उ जन्नीहे कलाँ, "छाई, तुँ अपन विश्वासके कारण चोखाइल बतो, शान्तिसे जाऊ।" 49 येशू बोल्ती रहिँत, तब्बेहेँ यहूदी बैठक भवनके मुखिया याइरसके घरेसे एकथो मनैया आपुगल। और उहिहे कहल, "अप्निक छाई मुसेकल बा! गुरुहे आब आकुर आफत करना जरुरी नै हो।" 50 पर येशू यी सुनके याइरसहे कलाँ, "जिन डराऊ, मोरिकमे विश्वास किल करो और ऊ चोखाजाई।" 51 जब येशू घरेम पुग्लाँ तब् येशू पत्रुस, याकूब, यूहन्ना और लौँदीक बाबा और दाईहे बाहेक औरे किहुहे फेन हुँकार संग भित्तर आई नै देलाँ। 52 सक्कु जाने छाती ठठाठठाके और टोँटा फारफारके रुइतिहिँत। पर येशू ओइन्हे कलाँ, "तुहुरे असिके काकरे छाती ठठाठठाके और टोँटा फारफारके रुइतो? ना रोऊ, लौँदी अभिन मुअल नै हो यी ते निदाइल किल बा।" 53 ऊ मुगिल बा कना जानके मनै येशूकमे हाँस देलाँ। 54 पर येशू ओकर हाँथ पकरके असिक कहिके बोल्करलाँ, "बाबु, मै तुहिन्हे कहतुँ, उठ्जाऊ!" 55 तब् ओकर ज्यान घुमके आगिलिस, और उ लौँदी जुरुकसे उठ्गिलस। और लौँदीहे कुछु खाई देऊ, कहिके येशू ओकर दाईबाबाहे आज्ञा देलाँ। 56 ओकर दाई-बाबाहे अचम्म लग्लिन। पर ज्या हुइल रहे, उ किहुहे ना बतैहो कहिके येशू उ लौँदीक दाईबाबाहे कड़ा चेतावनी देलाँ।