1 यी खुशीक खबर परमेश्वरके छावा येशू ख्रीष्टके बारेमे हो। यकर सुरुवात असिके हुइल। 2 जसिके परमेश्वरके अगमवक्ता यशैयक किताबमे लिखल बा। परमेश्वर अपन छावा येशूहे असिके कहतावै,

"हेर, मै अपन हुलाकीहे तोरिक आघे-आघे पठैम,

जे तोरिक आइक लग मनैनके मन तयार करी।

3 जे उजाड़-ठाउँमे जोर-जोरसे असिक कहिके गोहराइता,

‘अपन मनहे प्रभुक लग तयार करो, और हुँकिन भेँटा करक लग तयार रहो।’"

4 यी हुलाकी डुब्कि देहुइया यूहन्ना रहे। ऊ उजाड़-ठाउँमे बैठे, और ऊ असिन प्रचार करे कि अपन मन बद्लो और पाप करना छोरदेऊ ताकि परमेश्वर तुहुरिन्के पाप माफ करिँत, और तब् मै तुहुरिन्हे डुब्कि देहम। 5 यहूदिया प्रदेश और यरुशलेम शहरके बहुत्ते बासिन्दन यूहन्नक थेन आगिलाँ। और ओइने अपन-अपन पाप स्वीकार कर्ती उहिसे यर्दन लदियामे डुब्कि लेलाँ। 6 यूहन्ना ऊँटवक भुट्लक बनल लुग्गा घाले, करहिँउमे ऊ छालक पेटी बाँधे, और ऊ फतिङ्गा और वन-सहद खाए। 7 ऊ असिक कती प्रचार करल, "पर मोरिक पाछे अउइया महिन्से धेउर शक्तिशाली बताँ। यहाँसम कि मै हुँकार थेन यी लायकके फेन नै हुइतुँ कि मै हुँकार असिन नोकर बने सेकुँ, जे जुत्तक टेनी खोल्ना काम करत। 8 मै तुहुरिन्हे पानीलेके डुब्कि देथुँ, पर ऊ तुहुरिन्हे पवित्र आत्मालेके डुब्कि दिहीँ।"

9 आब उ दिनमे येशू गालील प्रदेशके नासरत गाउँमेसे अइलाँ, और यूहन्नासे यर्दन लदियामे डुब्कि लेलाँ। 10 जब येशू पानीमेसे उप्पर निकरलाँ, वहे समय हुँकार लग स्वर्ग उघरगिलस। पवित्र आत्माहे परेउना हस ऊ अपन उप्पर आइत देख्लाँ। 11 तब् परमेश्वर स्वर्गमेसे येशूहे असिके कलाँ, "तैँ मोरिक दुलार छावा हुइते, तुहिसे मै गजब खुशी बतुँ।" 12 यकरपाछे पवित्र आत्मा येशूहे जुरतेहेँ उजाड़-ठाउँमे लैगिलिन। 13 ऊ एकथो उजाड़-ठाउँमे चालीस दिनसम रलाँ, और वहाँ शैतान हुँकार परीक्षा करल। ऊ ठाउँमे जङ्गली जानबर किल रहिँत, पर स्वर्गदूतनके आके येशूक सेवा करलाँ।

14 थोरिक दिन पाछे यूहन्ना कारागारमे दारदेगिलस, तब् येशू गालील प्रदेशमे गैलाँ और मनैनके थेन परमेश्वरके ओहोँरसे खुशीक खबर सक्कु जहनहे बताई लग्लाँ। 15 येशू कलाँ, "परमेश्वरके राज लग्गेहेँ आगिल बा। अपन मन बद्लो और पाप करना छोरदेऊ, और खुशीक खबरमे विश्वास करो।" 16 जब एक दिन येशू गालील समुन्दरके आँरितिरतिर जाइतिहिँत, तब् ऊ सिमोन और ओकर भैया अन्द्रियासहे समुन्दरमे जाल लब्दाइत देख्लाँ। काकरेकी ओइने मच्छी मरना काम करिँत। 17 येशू ओइन्हे कलाँ, "जसिके तुहुरे मच्छी पक्रतो, मोरिक संग चोलो, मै तुहुरिन्हे मोरिक चेला हुइक लग मनैनहे जमा करैना सिखैम।" 18 ओइने जुरतेहेँ अपन मच्छी मरना काम छोरदेलाँ, और येशूक चेला बनक लग हुँकार पाछे लागगिलाँ। 19 जब येशू थोरचे दूर गैलाँ, तब् ऊ दुईथो दादू-भैयनहे अपन लाउमे बैठ्के मच्छी मारक लग ओइन्के अपन जाल तङ्ग्रत देख्लाँ, ओइन्के नाउँ याकूब और यूहन्ना रहिन, ओइने जब्दियक छावन रहिँत। 20 ऊ जुरतेहेँ ओइन्हे बलैलाँ, और ओइने अपन बाबा जब्दियाहे दोसुर मज्दुरनके थेन लाउमे छोरके येशूक संग हुँकार चेला बनक लग हुँकार पाछे लागगिलाँ।

21 तब् येशू और हुँकार चेलनके कफर्नहुम नगरमे पुग्लाँ, जब यहूदिनके बिँसैना दिन सुरु हुइलिन, तब् येशू यहूदिनके बैठक भवनमे जाके शिक्षा देहे लग्लाँ। 22 जोन मनै यहूदिनके बैठक भवनमे बैठल रहिँत, उ सक्कु जहनहे हुँकार शिक्षा सुनके अचम्म लग्लिन। काकरेकी ऊ यहूदी कानुनके गुरुनके हस शिक्षा नै दिँत, पर असिन गुरुक हस सिखाइँत, जेकर थेन सच्चा अधिकार बा। 23 जब येशू यहूदी बैठक भवनमे सिखाइतिहिँत, तब्बेहेँ वहाँ एकथो मनैया जिहिहे भूत्वा लागल रहिस। 24 ऊ असिक कती जोरसे गोहराइल, "ए नासरत गाउँक येशू, हम्रिहिन्से अप्नि का चाहती? का अप्नि हम्रिहिन सर्वनाश पारे आइल बती? अप्नि के हुइती कहिके हम्रे अप्निहे चिन्थी! अप्नि परमेश्वरके पवित्र जन हुइती, जे परमेश्वरके ओहोँरसे आइल।" 25 येशू उ भूत्वाहे घघोट्के कलाँ, "चुप लाग और ओकरमेसे निकरजा।" 26 तब् भूत्वा उ मनैयाहे जोरसे हिलाइल, और जोरसे चिल्लाके उ मनैयकमेसे बाहेर निकरगिल। 27 बैठक भवनमे जमा हुइलक उ सक्कु मनैनहे गजब अचम्म लग्लिन। ओइने एकदोसर जहनहे पुँछे लग्लाँ, "यी ते लावा और अचम्म करना जसिन शिक्षा बा! हम्रे कबु फेन किहुहे असिन अधिकारसे शिक्षा देहत नै देख्ली! यहाँसम कि यी भूत्वनहे फेन अह्रैथाँ, ते ओइने मानजिथाँ" 28 यकरपाछे मनै औरे जहनसे यी बताई लग्लाँ कि येशू का करलाँ। असिके झत्तेहेँ सारा गालील प्रदेशके मनै येशूक बारेम सुन्लाँ।

29 यकरपाछे येशू और हुँकार चेलनके यहूदिनके बैठक भवनमेसे निकरके सिमोन और अन्द्रियासके घर गैलाँ। याकूब और यूहन्ना फेन ओइन्के संग गैलाँ। 30 वहाँ सिमोनके माउ बेमार रहिस, और पठरीमे सुतल रहिस। काकरेकी उहिहे जुरी आइल रहिस। जब येशू उ घरेम पुग्लाँ ते ओइने कलाँ कि सिमोनके माउ बेमार बतिस। 31 येशू ओकर पठरीक लग्गे गैलाँ, और उहिहे ओकर हाँथ पकरके ठरह्याइक लग सहयोग करलाँ। और जुरतेहेँ ओकरमेसे जुरी चोखागिलिस। तब् ऊ ओइन्हे खाना खाई देहल। 32 उ साहिँजुन बहुत्ते बेमार मनैनहे और जोन मनैनहे भूत्वा लागल रहिन, ओइन्हे मनै येशूक थेन नन्लाँ। 33 नगरके बहुत्ते मनै सिमोनके घरक बाहेर अंगनामे हेरक लग जमा होगिलाँ। 34 बहुत मनै जेने कैयो मेरिक रोगसे बेमार रहिँत, ओइन्हे येशू चोख्वादेलाँ। और भूत्वनहे ओइन्केमेसे बाहेर निकारदेलाँ। येशू भूत्वनहे कुछु बोल्ही नै देलाँ। काकरेकी ओइन्हे पता रहिन, कि येशू ख्रीष्ट हुइँत।

35 धुस्मुस्सेहेँ बेहान्नी उठ्के येशू नगरमेसे बाहेर निकरके सुनसान ठाउँमे गैलाँ, और प्राथना करे लग्लाँ। 36 पर जब सिमोन और ओकर दोसुर संघरियन पता पैलाँ कि येशू चलगिल बताँ, तब ओइने हुँकिन्हे खोजे गैलाँ। 37 जब हुँकिन्हे ओइने भेटैलाँ, तब् ओइने हुँकिन्हे कलाँ, "नगरके बहुत्तेजाने अप्निहे खोजतताँ।" 38 तब् येशू ओइन्हे कलाँ, "आऊ, हम्रिहिन्हे आँजरपाँजरके गाउँमे जाईपरी, महिन्हे ओइन्के बिच्चेम फेन प्रचार करना बा। काकरेकी मोरिक संसारमे अइलक उद्देश्य यहे हो।" 39 तब् येशू और हुँकार चेलनके गालील प्रदेशके बहुत्ते ठाउँमे गैलाँ, वहाँ ऊ यहूदिनके बैठक भवनमे प्रचार कर्ती रलाँ और मनैनकेमेसे भूत्वा निकर्ती रलाँ।

40 वहाँ एकथो कोढ़ रोग लागल मनैया येशूक थेन आइल, और हुँकार आघे ठेहुनी टेकके बिन्ती करे लागल, "यदि अप्नि चहबी कलेसे महिन्हे कोढ़ रोगसे चोख्वाई सेक्बी।" 41 येशूहे ओकरमे सोग लग्लिन। ऊ अपन हाँथ आघे बह्राके उ मनैयाहे छुलाँ और कलाँ, "मै चहथुँ कि तुँ चोखाजाऊ", फेनदोस्रे येशू कलाँ, "चोखाजाऊ।" 42 तब्बेहेँ ओकर कोढ़ रोग ओकरमेसे हटगैलिस, और ऊ चोखागिल। 43 तब् येशू उ मनैयाहे कड़ा चेतावनी देलाँ, और यी कहिके उहिहे ओकर डगरमे पठादेलाँ, 44 "यकर बारेम किहु ना बतैहो, पर जाऊ और अपनहे पुजारीक थेन देखाऊ कि तुँ चोखागिलो। तब् जसिके परमेश्वरके अगमवक्ता मोशा आज्ञा देहल बा, ओकर अनुसार मन्दिरमे दान चह्राऊ। तब् सक्कु जाने जन्हीँ कि तुँ कोढ़ रोगसे चोखागिल बतो।" 45 पर उ मनैया वहाँसे चलगिल, और उ मनैया बहुत्ते मनैनहे बतादेहल कि येशू उहिहे चोख्वादेलाँ। तबेकमारे येशू खुल्ला रुपमे मनैनके बिच्चेम जाई नै सेक्लाँ। और नगरमेसे ऊ बाहेरे असिन ठाउँमे रहिँत, जहाँ मनै नै रहिँत। तभुन फेन बहुत ठाउँसे मनै हुँकार थेन अइति रलाँ।