Marcos 11

यरुशलेम शहरमे येशूक जैना

1 जब येशू और हुँकार चेलनके यरुशलेम शहरके लग्गे अइलाँ, तब् ओइने बेथफागे और बेथानिया गाउँक लग्गे पुग्लाँ। जोन गाउँ जैतून पहाड़के लग्गे रहिँत। येशू अपन दुईथो चेलनहे असिक कहिके आघे पठैलाँ, 2 "तुहुरिन्के सामनेक गाउँमे जाऊ, और जस्तेके तुहुरे वहाँ पुग्बो, वहाँ तुहुरे गडहक बछरवा बाँधल भेटैबो। जेकरमे आजसम केऊ फेन नै बैठल हो। उहिहे खोलके यहाँ लयानो। 3 यदि तुहुरिन्हे केऊ पुँछी, ‘तुहुरे यी का करतो?’ ते असिक कहहो, ‘प्रभुहे यकर जरुरी परल बतिन, और ऊ यिहिहे झत्तेहेँ फिर्ता करदिहीँ।’" 4 चेलनके गाउँमे गैलाँ, और ओइने एकथो घरेम दवारीक पंजरे गडहक बच्चा खुँटीमे बाँधल भेटैलाँ, जोन घर डग्रेक आँरितिरे रहे। जब ओइने उहिहे खोलतिहिँत, 5 तब् जेने वहाँ ठरह्याइल रहिँत, ओइने उ चेलनहे कलाँ, "तुहुरे यी का करतो, यी गडहक बच्चाहे काकरे खोलतो?" 6 ओइन्हे येशू जस्तेके कले रहिन, चेलनके ओस्तेहेँ जवाफ देलाँ। तब् मनै गडहक बच्चाहे लैजाई देलाँ। 7 उ दुईथो चेलनके गडहक बछरवाहे येशूक थेन नन्लाँ। और अपन-अपन बाहेर घल्लक लुग्गा गडहक पिँठीमे बिछादेलाँ। तब् येशू उ गडहक पिँठीमे बैठ्गिलाँ। 8 जस्तेके येशू गडहक उप्पर बैठ्के यरुशलेम शहरके ओहोँर गैलाँ। बहुत्ते मनै हुँकार आघे डगरमे अपन लुग्गा बिछाके हुँकिन्हे सम्मान देलाँ। कौनो दोसुर मनै फेन झाला बिछाके सम्मान देलाँ, जोन ओइने डगरके आँजरपाँजरके रुख्वामेसे काट्के नानल रहिँत। 9 ओइन्मेसे कौनो मनै येशूक आघे-आघे नेगतिहिँत। और कौनो मनै हुँकार पाछे-पाछे आइतिहिँत। और हरेक मनै जोरसे चिल्लाके कहे लग्लाँ, "धन्य हुइँत यी मनैया, जे परमेश्वरके अधिकारसे आइतताँ। परमेश्वरके जयजयकार होए! 10 परमेश्वरके अनुग्रह अइना राजमे बा, जोन हमार पुर्खा दाऊद रज्वक राज हस बा! परमेश्वर जे स्वर्गमे बताँ, हुँकार जयजयकार होए!" 11 जब येशू यरुशलेम शहरमे पैँठ्लाँ। ओकरपाछे ऊ यरुशलेमके मन्दिरमे गैलाँ। ऊ चारु ओहोँर सक्कु चिजहे ध्यानसे हेरलाँ कि वहाँ का हुइता, तब् नगरमेसे ऊ बाहेर चलगिलाँ। काकरेकी बहुत संझा होगिल रहे। तबेकमारे रात बिताइक लग ऊ अपन बाह्रथो चेलनके संग बेथानिया गाउँमे गैलाँ।