1 जब येशू और हुँकार चेलनके यरुशलेम शहरके लग्गे अइलाँ, तब् ओइने बेथफागे और बेथानिया गाउँक लग्गे पुग्लाँ। जोन गाउँ जैतून पहाड़के लग्गे रहिँत। येशू अपन दुईथो चेलनहे असिक कहिके आघे पठैलाँ, 2 "तुहुरिन्के सामनेक गाउँमे जाऊ, और जस्तेके तुहुरे वहाँ पुग्बो, वहाँ तुहुरे गडहक बछरवा बाँधल भेटैबो। जेकरमे आजसम केऊ फेन नै बैठल हो। उहिहे खोलके यहाँ लयानो। 3 यदि तुहुरिन्हे केऊ पुँछी, ‘तुहुरे यी का करतो?’ ते असिक कहहो, ‘प्रभुहे यकर जरुरी परल बतिन, और ऊ यिहिहे झत्तेहेँ फिर्ता करदिहीँ।’" 4 चेलनके गाउँमे गैलाँ, और ओइने एकथो घरेम दवारीक पंजरे गडहक बच्चा खुँटीमे बाँधल भेटैलाँ, जोन घर डग्रेक आँरितिरे रहे। जब ओइने उहिहे खोलतिहिँत, 5 तब् जेने वहाँ ठरह्याइल रहिँत, ओइने उ चेलनहे कलाँ, "तुहुरे यी का करतो, यी गडहक बच्चाहे काकरे खोलतो?" 6 ओइन्हे येशू जस्तेके कले रहिन, चेलनके ओस्तेहेँ जवाफ देलाँ। तब् मनै गडहक बच्चाहे लैजाई देलाँ। 7 उ दुईथो चेलनके गडहक बछरवाहे येशूक थेन नन्लाँ। और अपन-अपन बाहेर घल्लक लुग्गा गडहक पिँठीमे बिछादेलाँ। तब् येशू उ गडहक पिँठीमे बैठ्गिलाँ। 8 जस्तेके येशू गडहक उप्पर बैठ्के यरुशलेम शहरके ओहोँर गैलाँ। बहुत्ते मनै हुँकार आघे डगरमे अपन लुग्गा बिछाके हुँकिन्हे सम्मान देलाँ। कौनो दोसुर मनै फेन झाला बिछाके सम्मान देलाँ, जोन ओइने डगरके आँजरपाँजरके रुख्वामेसे काट्के नानल रहिँत। 9 ओइन्मेसे कौनो मनै येशूक आघे-आघे नेगतिहिँत। और कौनो मनै हुँकार पाछे-पाछे आइतिहिँत। और हरेक मनै जोरसे चिल्लाके कहे लग्लाँ, "धन्य हुइँत यी मनैया, जे परमेश्वरके अधिकारसे आइतताँ। परमेश्वरके जयजयकार होए! 10 परमेश्वरके अनुग्रह अइना राजमे बा, जोन हमार पुर्खा दाऊद रज्वक राज हस बा! परमेश्वर जे स्वर्गमे बताँ, हुँकार जयजयकार होए!" 11 जब येशू यरुशलेम शहरमे पैँठ्लाँ। ओकरपाछे ऊ यरुशलेमके मन्दिरमे गैलाँ। ऊ चारु ओहोँर सक्कु चिजहे ध्यानसे हेरलाँ कि वहाँ का हुइता, तब् नगरमेसे ऊ बाहेर चलगिलाँ। काकरेकी बहुत संझा होगिल रहे। तबेकमारे रात बिताइक लग ऊ अपन बाह्रथो चेलनके संग बेथानिया गाउँमे गैलाँ।

12 दोसुर दिन, जब ओइने बेथानिया गाउँमेसे फिर्ता आइतिहिँत, तब येशूहे भुँख लागगिलिन। 13 ऊ दूरेसे हरियर पटियालेके भरल एकथो अञ्जीरके रुख्वा देख्लाँ। तबेकमारे येशू यी हेरक लग अञ्जीरके रुख्वक लग्गे गैलाँ ताकि ओम्ने कौनो फारा मिलजाए। पर जब ऊ ओकर लग्गे गैलाँ ते हुँकिन्हे ओकर पटिया किल मिल्लिन। काकरेकी यी अञ्जीरके रुख्वक फारा देना ठिक समय नै रहे। 14 येशू ऊ रुख्वाहे कलाँ, "आबसे तोरिकमे कबु फेन फारा नै फरी।" और हुँकार चेलनके हुँकिन्हे असिके कहत सुन्लाँ। 15 यकरपाछे येशू और हुँकार चेलनके यरुशलेम शहरमे पुग्लाँ, और यरुशलेमके मन्दिरके अंगनामे गैलाँ। येशू उ मनैनहे उ ठाउँसे बाहेर निकरना सुरु करदेलाँ। जे बलिदान करक लग प्रयोग हुइना जानबर और दोसुर चिजहे किन्ना और बेँच्ना काम करतिहिँत। येशू पैँसा सँतुइयनके अड्डा बिल्टादेलाँ। और बलिदानके लग परेउना बेँचुइयनके खोर बिल्टादेलाँ। 16 और मनैनहे यी आज्ञा देलाँ कि ओइने यरुशलेमके मन्दिरके आँजरपाँजरके ईलाकासे कौनो फेन चिज लेके ना जाइँत। 17 तब् फेनदोस्रे येशू मनैनहे शिक्षा देलाँ, "पवित्र शास्त्रमे असिके लिखल बा, परमेश्वर यरुशलेमके मन्दिरके बारेम कहल्ताँ, ‘मोरिक मन्दिरहे सक्कु जातिनके मनैनके लग प्राथनक घर कहिजाई।’ पर तुहुरे यिहिहे डाँकनके जमा हुइना ठाउँक रुपमे प्रयोग करतो।" 18 जब यहूदी मुख्य पुजारीनके और यहूदी कानुनके गुरुनके सुन्लाँ कि येशू का करलाँ और का कलाँ। तब् ओइने येशूहे मुवाइक लग तरिका खोजे लग्लाँ। काकरेकी ज्या चिज फेन मनैनहे ऊ सिखैलाँ। मनै उहिहे स्वीकार करलाँ। तबेकमारे हुँकार बहरती रहल लोकप्रियताहे देख्के ओइने घब्राइल रहिँत। 19 जब संझा हुइल, ते येशू और हुँकार चेलनके नगरमेसे चलदेलाँ, और बेथानिया गाउँमे रातके सुते गैलाँ।

20 दोसुर बेहानके जब येशू और हुँकार चेलनके यरुशलेम शहर ओहोँर फिर्ता जाइतिहिँत। तब ओइने अञ्जीरके रुख्वा देख्लाँ, जिहिहे येशू सरापल रहिँत। उ रुख्वा जरब्वँट्टीसे सुखगिल रहे। 21 तब् पत्रुसहे अञ्जीरके रुख्वाहे येशूक कलक उ बात याद अइलिस। और ऊ येशूहे कहल, "गुरुजी, हेरी, जोन अञ्जीरके रुख्वाहे अप्नि सराप देहल रही, उ ते सुखागिल बा।" 22 येशू अपन चेलनहे जवाफ देलाँ, "विश्वास करो कि जोन तुँ माँगल बतो, परमेश्वर उ करदिहीँ। 23 जात्तिके मै तुहुरिन्हे कहतुँ, ‘तुहुरे यी पहाड़हे कहे सेक्बो, उँखरके समुन्दरमे गिरजा’ और ओस्तेहेँ होजाई। पर अपन मनमे शंखा नै करहो, कि असिन हुई। बेन विश्वास करो कि जोन ऊ माँगल बा, परमेश्वर ऊ करदिहीँ, तब् परमेश्वर ओकर लग करदिहीँ। 24 तबेकमारे मै कहतुँ, जब तुहुरे प्राथना करथो और कुछु मंग्थो, ते यी विश्वास करहो कि ऊ तुहुरिन्हे पक्कै मिली, और ज्या फेन तुहुरे मंग्बो, परमेश्वर तुहुरिन्हे दिहीँ। 25 पर जब तुहुरे प्राथना करबो, तब् तोहाँर मनमे केक्रो विरोधमे रिसिबी बा कलेसे उहिहे माफ करबो कलेसे स्वर्गमे रहुइया बाबा फेन तुहुरिन्के पापहे माफ करदी। 26 पर यदि तुहुरे किहुहे माफ नै करबो कलेसे, परमेश्वर बाबा जे स्वर्गमे बा, ऊ फेन तुहुरिन्के पाप माफ नै करी।"

27 येशू और हुँकार चेलनके एकचो फेनदोस्रे यरुशलेम शहरमे फिर्ता अइलाँ। जब येशू यरुशलेमके मन्दिरके अंगनामे नेगतिहिँत। तब् यहूदी मुख्य पुजारीनके, यहूदी कानुनके गुरु और यहूदी दलके नेतन हुँकार थेन अइलाँ। और पुँछे लग्लाँ, 28 "यी काम करक लग तोहाँर थेन का अधिकार बा? तुहिन्हे असिन अधिकार देके के पठैले बा?" 29 येशू ओइन्हे कलाँ, "मै फेन तुहुरिन्हे एकथो प्रश्न पुँछतुँ, यदि तुहुरे महिन्हे जवाफ देबो कलेसे तब् मै बतैम कि यी काम करक लग महिन्हे का अधिकार बा। 30 महिन्हे यकर बारेम जवाफ देऊ, जब यूहन्ना मनैनहे डुब्कि देहल, का ओकर यी अधिकार स्वर्गमेसे परमेश्वरके ओहोँरसे रहिस कि मनैनके ओहोँरसे?" 31 तब् ओइने आपसमे का कही कहिके छलफल करे लग्लाँ कि, "यदि हम्रे कबी कि यूहन्ना परमेश्वरके अधिकारसे डुब्कि देहे, ते यी हम्रिहिन्से पुँछी कि ‘तुहुरे यूहन्नक बातमे विश्वास नै करलो?’ पर हम्रे यी फेन कहे नै सेक्बी कि यूहन्नक अधिकार मनैनके ओहोँरसे किल रहिस।" 32 ओइने असिके जवाफ देहे नै सेक्लाँ। काकरेकी ओइने उ मनैनसे डराँइत, जेने यी मानिँत कि यूहन्ना परमेश्वरके ओहोँरसे सच्चा अगमवक्ता रहे। 33 तब् ओइने येशूहे जवाफ देके कलाँ, "हम्रे नै जन्थी कि मनैनके लग यूहन्नाहे डुब्कि देहे के पठाइल।" येशू ओइन्हे कलाँ, "मै फेन तुहुरिन्हे नै बतैम कि मै जोन काम करथुँ, यी करक लग महिन्हे का अधिकार बा।"