मर्कूस 11:27-33

27 येशू और हुँकार चेलनके एकचो फेनदोस्रे यरुशलेम शहरमे फिर्ता अइलाँ। जब येशू यरुशलेमके मन्दिरके अंगनामे नेगतिहिँत। तब् यहूदी मुख्य पुजारीनके, यहूदी कानुनके गुरु और यहूदी दलके नेतन हुँकार थेन अइलाँ। और पुँछे लग्लाँ, 28 "यी काम करक लग तोहाँर थेन का अधिकार बा? तुहिन्हे असिन अधिकार देके के पठैले बा?" 29 येशू ओइन्हे कलाँ, "मै फेन तुहुरिन्हे एकथो प्रश्न पुँछतुँ, यदि तुहुरे महिन्हे जवाफ देबो कलेसे तब् मै बतैम कि यी काम करक लग महिन्हे का अधिकार बा। 30 महिन्हे यकर बारेम जवाफ देऊ, जब यूहन्ना मनैनहे डुब्कि देहल, का ओकर यी अधिकार स्वर्गमेसे परमेश्वरके ओहोँरसे रहिस कि मनैनके ओहोँरसे?" 31 तब् ओइने आपसमे का कही कहिके छलफल करे लग्लाँ कि, "यदि हम्रे कबी कि यूहन्ना परमेश्वरके अधिकारसे डुब्कि देहे, ते यी हम्रिहिन्से पुँछी कि ‘तुहुरे यूहन्नक बातमे विश्वास नै करलो?’ पर हम्रे यी फेन कहे नै सेक्बी कि यूहन्नक अधिकार मनैनके ओहोँरसे किल रहिस।" 32 ओइने असिके जवाफ देहे नै सेक्लाँ। काकरेकी ओइने उ मनैनसे डराँइत, जेने यी मानिँत कि यूहन्ना परमेश्वरके ओहोँरसे सच्चा अगमवक्ता रहे। 33 तब् ओइने येशूहे जवाफ देके कलाँ, "हम्रे नै जन्थी कि मनैनके लग यूहन्नाहे डुब्कि देहे के पठाइल।" येशू ओइन्हे कलाँ, "मै फेन तुहुरिन्हे नै बतैम कि मै जोन काम करथुँ, यी करक लग महिन्हे का अधिकार बा।"