1 जब येशू यरुशलेमके मन्दिरमेसे निक्रतिहिँत, तब् येशूक चेलनमेसे एकथो हुँकिन्हे कहल, "हेरी गुरुजी, कतरा सुग्घुर घर बा और देवालमे कतरा बर-बर पठरा लगाइल बा!" 2 येशू उहिहे कलाँ, "तुहुरे अब्बे जोन बर-बर पठरक घर देखतो, पर मै तुहुरिन्हे बताइतुँ, दुश्मनहुँक्रे एकथो पठराहे फेन ओकर ठाउँमे रहे नै दिहीँ। उ सक्कु भस्काजिहीँ।" 3 तब् येशू यरुशलेमके मन्दिरमेसे जैतून पहाड़मे चलगिलाँ, और मन्दिरके आघे जैतून पहाड़के सोँप्पार ठाउँमे बैठ्गिलाँ। जब हुँकार संग केऊ नै रहे ते पत्रुस, याकूब, यूहन्ना और अन्द्रियास हुँकार थेन अइलाँ और हुँकिन्हे पुँछ्लाँ, 4 "हम्रिहिन्हे बताई, यी घटना कब हुइहीँ? यी सक्कु बात पूरा हुइक लग का चिन्हा रही?" 5 येशू ओइन्हे कहे लग्लाँ, "हौश्यार रहो, केऊ तुहुरिन्हे मूर्ख ना बनाए। 6 बहुत्ते जाने मोरिक नाउँक प्रयोग करके अइहीँ, और ओइने कहिहीँ, ‘मै ख्रीष्ट हुइतुँ’ और ओइने बहुत्ते मनैनहे अपन झूँटा बातसे फँसैहीँ। 7 जब तुहुरे लड़ाई और लड़ाईक हल्ला सुन्बो, तब् ना डरैहो। असिन घटना हुइना जरुरी बा। पर वहे समय संसारके अन्त्य जुरतेहेँ नै हुई। 8 काकरेकी एकथो जातिक मनै दोसुर जातिक मनैनहे हमला करहीँ, और एकथो राज्यक मनै दोसुर राज्यक मनैनहे हमला करहीँ। ठाउँ-ठाउँमे भुँइचाल हुई, और अनिकाल परी। यी समय संकटके सुरुवात किल हो। यी जन्नीनके घरी-घरी बेथा लागल हस हुई। 9 पर तुहुरे अप्निहीँ हौश्यार रहहो। काकरेकी दुश्मनहुँक्रे तुहुरिन्हे पकरहीँ, और मोरिक कारण ओइने तुहुरिन्हे बैठक भवनमे पिटिहीँ। रज्वक आघे और अदालतमे लेके जैहीँ। पर यी तुहुरिन्के लग गवाही देना मौका रही। 10 यकर बाहेक संसारके अन्त्य हुइनासे आघे मोरिक बारेम खुशीक खबर सक्कु जातिनके मनैनहे सुनाजाई। 11 जब मनै तुहुरिन्हे पकरके मुद्दा चलैहीँ। तब् का बोलम कहिके आघेसे चिन्ता ना करहो। सही समयमे परमेश्वर तुहुरिन्के मनमे ज्या दरहीँ, वहे बोल्हो। काकरेकी तुहुरे अपन सोँचके अनुसार नै बोल्बो, पर तुहुरिन्के माध्यमसे पवित्र आत्मा बोली। 12 उ समयमे, जोन मनै मोरिकमे विश्वास नै करथाँ, ओइने अपन दादूभैयनहे पकरहीँ, और ओइन्हे मुवादिहीँ, जेने मोरिकमे विश्वास करथाँ। बाबन फेन अपन लरकनहे अस्तेहेँ करहीँ, और लरका अपन दाईबाबक विरोधमे जैहीँ, और ओइन्हे मुवादिहीँ। 13 मोरिकमे विश्वास कर्लक कारण बहुत्ते मनै तुहुरिन्के दुश्मन होजिहीँ। पर जोन मनै मोरिकमे विश्वासयोग्य पलिरहिहीँ, और कष्ट नै ओराइतसम मोरिकमे विश्वास कर्ले पलिरहिहीँ, और हार नै मन्हीँ, परमेश्वर ओइनेहेन्हे बँचैहीँ।"

14 (पह्रुइया बुझे कि मै केकर बारेम लिखतुँ।) एक दिन तुहुरे दुष्ट मनैयाहे यरुशलेमके मन्दिरमे ठरह्याइल देख्बो, जहाँ उहिहे नै हुई परना रहिस। ताकि यी मन्दिरहे सक्कु जाने छोरदिँत। तब् यहूदिया प्रदेशके मनैनहे नुकक लग पहाड़ ओहोँर भागे परहिन, ताकि ओइने मुवा ना जाइँत। 15 उ समयमे बेर ना करहो, यदि तुहुरे घरक छँपरामे रबो कलेसे अपन सामान लेहे घरेक भित्तर ना जैहो। तुहुरे वहाँसे भागजैहो। 16 जे खेट्वामे बा, ऊ अपन लुग्गा लेहे घरे ना घुमे। 17 उ समयमे, उ जन्नीनके लग यी बहुत डरलग्तिक समय रहिहीन, जेने पैनाहाँ रहिहीँ। और ओइन्के लग फेन जेनके दूध पिना लरका रहिहीन, यनके लग भग्ना महा आफत हुइहिन। 18,19 उ समयमे मनै गजब गम्भीर रुपमे पीड़ित हुइहीँ। परमेश्वरके संसारहे बनैनासे लेके अबसम मनै असिन संकटके सामना नै करलाँ, और ना आबसे करहीँ। तबेकमारे प्राथना करो कि यी दुःखके समय जार छेँक ना होए। नै ते यात्रा करना आफत हुई। 20 परमेश्वर अपन चुनल मनैनके लग उ संकटके समयहे कम करना फैसला कर्ले बताँ, नै ते कौनो फेन मनैया नै बँची। 21 वहे समय यदि केऊ तुहुरिन्हे "हेरो, ख्रीष्ट यहाँ बताँ, और वहाँ बताँ।" कहिके कही ते तुहुरे विश्वास ना करहो। 22 काकरेकी झूँटा ख्रीष्टहुँक्रे और झूँटा अगमवक्तन अइहीँ। ओइने चमत्कार और अचम्मक काम देखैहीँ। यहाँसम कि ओइने ओइन्हे फेन दोधारमे परहीँ। जेनहे परमेश्वर चुनल बतिन। 23 मै तुहुरिन्हे यी घटना हुइनासे आघे बतादेनु ताकि तुहुरे हौश्यार रहो।

24 "उ दिनमे डरलग्तिक संकटके समय ओराके सेकी ते सूर्य और जोन्ह्याँ ओजरार देहे छोरदिहीँ। 25 तोरैँ आकाशमेसे गिरजिहीँ, और आकाशके सक्कु शक्ति यहोँरओहोँर डगमगाजिहीँ। 26 तब् मै, मनैयक छावा बद्रीसे घेरल देखा परम। मै अपन स्वर्गीय शक्ति और चहकार महिमा देखैम। 27 तब् मै, मनैयक छावा अपन स्वर्गदूतनहे पठैम, और ओइने ओइन्हे जमा करहीँ, जेनहे मै चुनल बतुँ। ओइने ओइन्हे हरेक ठाउँसे जमा करके पृथ्वीक हरेक भागमेसे लेके अइहीँ।"

28 "अञ्जीरके रुख्वासे पाठ सिखोः जब ओकर दहियाँ निकरत, और ओकर पटिया फेन पल्हाइत, तब् तुहुरे जानजिथो कि घाम छेँक आगिल बा। 29 ओस्तेके जब तुहुरे यी चिज हुइत देख्बो, तब् तुहुरे जानजिहो कि यी संसारके अन्त्य हुइक लग बा। यहाँसम कि यी महा लग्गेहेँ बा। 30 जात्तिके, मै तुहुरिन्हे कहतुँ, यी जबानक कौनो मनै तबसम नै मुहीँ, जबसम यी घटना नै होजाई। 31 आकाश और पृथ्वी नाश होजाई, पर जोन मै कनु, उ सदादिन पलिरही।"

32 "यी बात कोन दिन और कब हुई, यी केऊ फेन नै जानत, ना ते स्वर्गदूतनके, ना मै छावा। पर बाबाहे किल उ दिन और उ समय पता बतिस। 33 हौश्यार रहो और प्राथना करो। काकरेकी तुहुरे नै जन्थो कि मै कब फिर्ता हुइम। 34 यी ते उ मलिक्वक जसिन हो, जे अपन नोकरहुँक्रिहिनहे घरक सक्कु काम और जिम्मा देके और चौकिदर्वाहे जागल रहिस कहिके आज्ञा देके परदेश चलगिलस। 35 तुहुरे नै जन्थो कि घरक मलिक्वा कब फिर्ता आई। तबेकमारे जागले रहो। मै घरक मलिक्वा संझक फिर्ता हुई सेक्थुँ या आधा रातके आई सेक्थुँ या बेहान हुइनासे आघे फिर्ता हुई सेक्थुँ। 36 मै पक्कै फेन बिना चेतावनी देके अइम, तबेकमारे जग्ती रहो, तब् मै देखम कि तुहुरे मोरिक लग तयार बतो। 37 मै तुहुरिन्हे ज्या कहतुँ, आब मै उ सक्कुहुनहे कहतुँ, मोरिक फिर्ता आइक लग तुहुरे तयार रहहो।"