मर्कूस 15:21,22,24-27

21 जस्तेके ओइने नगरमेसे बाहेर जाइतिहिँत। तब्बेहेँ सिमोन नाउँक एकथो मनैया गाउँक ईलाकामेसे यरुशलेम शहरमे आइतेहे। सिमोन कुरेन शहरके रहे, और ओकर छावनके नाउँ अलेक्जेन्डर और रुफस रहिस। सिपाहिन उहिहे क्रूसहे वहाँ लैजिना आदेश देलाँ, जहाँ येशूहे टँगैना रहे। 22 सिपाहिनके येशूहे गलगथा कना ठाउँमे लैगिलाँ, आरामाइक भाषामे जेकर मतलब हुइत "खोपड़ीक ठाउँ।" 24 ओइने हुँकिन्हे क्रूसमे टँगा देलाँ। तब् केकरमे कोन लुग्गा परी कना पक्का करक लग चिट्टा दारके ओइने येशूक लुग्गाहे आपसमे बाँटलेलाँ। 25 जब ओइने येशूहे क्रूसमे टंग्ला, तब् बेहानिक नौ बजल रहे। 26 ओइने क्रूसमे चिन्हा लगैलाँ, जेम्ने हुँकार दोष लिखल रहिन। ओम्ने लिखल रहे, "यहूदिनके रज्वा।" 27 ओइने हुँकार संग दुईथो डाँकनहे क्रूसमे टंग्लाँ, एकथोहे हुँकार दाहिन पाँजर और दोसुरहे बाउँ पाँजर।