1 एकचो फेनदोस्रे येशू एकथो यहूदिनके बैठक भवनमे गैलाँ। वहाँ एकथो मनैया रहे, जेकर हाँथ सुखल रहिस। 2 फरिसी दलके मनै यी हेरे लग्लाँ कि येशू सुखल हाँथ रहल मनैयाहे यहूदिनके बिँसैना दिनमे चोख्वैथाँ कि नाई, ताकि ओइने हुँकारमे दोष लगाई सेकिँत। 3 येशू उ सुखल हाँथ रहल मनैयाहे कलाँ, "आऊ, और यहाँ सक्कुहुनके आघे ठरह्याजाऊ।" 4 फेनदोस्रे येशू कलाँ, "बिँसैना दिनमे मोशक कानुन हम्रिहिन्हे मजा करे कहत कि गलत करे कहत? केक्रो जिन्गीहे बँचाई कहत कि उहिहे मुवादेना कहत?" पर ओइने चुपागिलाँ। 5 येशू गजब रिसाइल रहिँत, और ऊ ओइन्के चारु ओहोँर हेरलाँ, ऊ गजब दुखि होगिलाँ। काकरेकी ओइने गजब जिद्दीह्या रहिँत। तब् येशू सुखल हाँथ रहल उ मनैयाहे कलाँ, "अपन हाँथ पसारो।" ऊ अपन हाँथ आघे पसारल, और ओकर हाँथ फट्से चोखागिलिस। 6 फरिसीनके बैठक भवनमेसे बाहेर चलगिलाँ, और जुरतेहेँ हेरोद रज्वक समर्थन करुइयनके संग मिलके येशूक विरोधमे योजना बनाई लग्लाँ कि हुँकिन्हे हम्रे कसिके मुवाई।

7,8 यकरपाछे कफर्नहुम नगरमेसे येशू अपन चेलनके संग गालील समुन्दरके आँरितिर गैलाँ। पर मनैनके बरवार भीड़ हुँकार पाछे आइल। यी मनै गालील प्रदेश, यरुशलेम शहर, यहूदिया प्रदेशके दोसुर ठाउँसे, इदुमिअक दोसुर ईलाकासे, यर्दन लदियक पूर्वी ईलाकासे और टुरोस और सीडोनके आँजरपाँजरके ईलाकासे आइल रहिँत। यी सक्कु जाने येशूक थेन आइल रहिँत, काकरेकी ओइने उ महान कामके बारेम सुनल रहिँत, जोन येशू करतिहिँत। 9 येशू अपन चेलनसे कलाँ, "मोरिक बैठक लग एकथो छुतिमुती लाउ नानो, ताकि मनैनके भीड़के दबाब मोरिक थेन ना आए।" 10 येशू असिक तबे कलाँ, काकरेकी येशू उ दिन बहुत्ते मनैनहे चोख्वाइल रहिँत। ओकर नतिजा यी हुइल कि बहुत्ते बेमार मनै हुँकार चारु ओहोँर भीड़ लगादेलाँ, और हुँकिन्हे छुना कोशिस करे लग्लाँ। 11 और जब भूत्वा लागल मनै हुँकिन्हे देखिँत, ओइने हुँकिन्हे आदर देखाइक लग हुँकार आघे गिरजाँइत, और असिके चिल्लाँइट, "तुँ परमेश्वरके छावा हुइतो।" 12 पर येशू भूत्वनहे कड़ा चेतावनी देलाँ, "मनैनहे ना बतैहो कि मै के हुइतुँ।"

13 ओकरपाछे येशू लग्गेक एकथो पहाड़मे चलगिलाँ, और ऊ ओइन्हे फेन बलैलाँ, जेनहे ऊ अपन चेला हुइक लग चुनल रहिँत, और ओइने भीड़मेसे हुँकार थेन अइलाँ। 14 फेनदोस्रे येशू ओइन्के बिच्चेमसे बाह्र जहनहे चुन्लाँ। ऊ ओइन्हे अपन निउतरह्या कहिके कलाँ। येशू चाहिँत कि उ बाह्रजाने हुँकारे संग रहिँत, ताकि ऊ ओइन्हे प्रचार करे पठाइँत। 15 और ओइन्के थेन भूत्वनहे निकरना अधिकार फेन रहिन। 16 जोन बाह्रथो निउतरह्यनहे येशू चुन्लाँ उ यनेहेँ हुइताँ। सिमोन, जेकर नाउँ येशू पत्रुस धरलाँ। 17 जब्दियक छावा याकूब और ओकर भैया यूहन्ना जेकर नाउँ येशू बोअनर्गेस धरलाँ, अर्थात गर्जनके छावा। 18 और अन्द्रियास, फिलिप, बारथोलोमाइ, कर उठुइया मत्ती, थोमा, अल्फयसके छावन याकूब, थेदियस, सिमोन कनानी और 19 करियोत गाउँक यहूदा जे हुँकिन्हे पाछेजाके धोखा देहल।

20 तब् येशू और हुँकार चेलनके कफर्नहुम नगरमे आगिलाँ, और वहाँ फेनदोस्रे भीड़ जमा होगिल। असिके येशू और हुँकार चेलनहे खाना खैना समय फेन नै मिल्लिन। 21 येशू ज्या करतिहिँत, ओकर बारेम जब हुँकार घरक मनै सुन्लाँ। तब ओइने सोच्लाँ कि ऊ बौरागिल बताँ। और ओइने हुँकिन्हे घरे फिर्ता नानक लग गैलाँ।

22 परमेश्वरके अगमवक्ता मोशक नियम कानुन सिखुइया गुरुन यरुशलेम शहरमेसे आइल रहिँत, ओइने फेन असिक कहिँत, "यी येशू ते भूत्वनके रज्वा शैतानके कब्जामे बा! यी शैतानके शक्तिसे भूत्वा निकारत।" 23 यकर लग येशू ओइन्हे अपन थेन बलैलाँ, और एकथो दृष्टान्त कहिके बात बत्वैलाँ। शैतान भूत्वनहे कसिके निकारे सेकी? ओइने ते ओकर अपने हुइँत! 24 यदि कौनो राज्यक मनै असिन समूहमे बँटजैहीँ, जेने एकदोसर जहनसे झगरा कर्ती रहिहीँ कलेसे उ राज पक्कै फेन बर्बाद होजाई। 25 अस्तेके यदि एकथो परिवार लर्ती रहिहीँ कलेसे ओइने नम्मा समयसम एक्केमे रहे नै सेक्हीँ। 26 यदि शैतान अपने भूत्वनसे लरी कलेसे, ऊ अपनहे अप्निहीँ ओरवादी। 27 केऊ फेन शैतान जसिन बल्गर मनैयक घरहे तबसम् फोरे नै सेकी, जबसम ऊ बल्गर मनैयाहे जितक लग और बाँधक लग उहिसे धेउर बल्गर नै होजाई। तब् ऊ ओकर घरेमसे सक्कु चिज लैजाई सेकी। 28 जात्तिके, मै तुहुरिन्हे कहतुँ, "मनैनके सक्कु पाप और निन्दा माफ हुई सेकी। 29 पर पवित्र आत्मक विरोधमे कर्लक निन्दा कबु माफ नै हुई। परमेश्वर उ मनैयाहे उ पापके लग उहिहे सदादिनके लग दोषी ठहरैहीँ।" 30 येशू ओइन्हे यी बात तबे कलाँ, काकरेकी ओइने यी कहतिहिँत, यकरमे भूत्वा लागल बतिस।

31 तब् येशूक भैयन और हुँकार दाई अइलिन। बाहेर ठरह्याके किहुहे ओइने हुँकिन्हे बलाई पठैलाँ। 32 बहुत्ते मनै हुँकार चारु ओहोँर बैठल रहिँत, और ओइने येशूहे कलाँ, "अप्निक दाई और भैयन बाहेर बताँ, और ओइने अप्निसे बात बत्वाइक लग बताँ।" 33 येशू ओइन्हे जवाफ देलाँ, "मोरिक दाई और मोरिक भैयन के हुइँत?" 34 येशू अपन चारु ओहोँर बैठल मनैनहे हेरलाँ और कलाँ, "हेरो, यी मोरिक दाई और यी मोरिक भैयन हुइँत! 35 काकरेकी जे ओसिक करत, जसिन परमेश्वर चहथाँ, ओइनेहेँ मोरिक भैया, मोरिक बाबु और मोरिक दाई हुइताँ।"