1 तब् येशू कफर्नहुम नगरहे छोरके अपन घरक ईलाका नासरत गाउँमे चलगिलाँ। हुँकार चेलनके फेन हुँकार संग गैलाँ। 2 यहूदिनके बिँसैना दिनमे येशू यहूदिनके बैठक भवनमे परमेश्वरके वचन सिखैना सुरु करलाँ। वहाँ बहुत्ते मनै जमा हुइल रहिँत। जब ओइने येशूक कलक सुन्लाँ, तब ओइने सक्कु जाने अचम्ममे परगिलाँ। और कहे लग्लाँ, "यी मनैया यी बात कहाँसे सिखल? यिहिहे यी सक्कु ज्ञान और चमत्कार करना शक्ति कहाँसे मिल्लिस? 3 हम्रे सक्कु जाने यिहिहे चिहिन्थी, यी ते सिकर्मी हो और मरियमके छावा हो। का याकूब, योसेफ, यहूदा और सिमोन यकर भैयन नै हुइँत? यकर बाबुनके हमार संग रथाँ।" और ओइने हुँकारमे विश्वास करनासे अस्वीकार करदेलाँ। 4 तब् येशू ओइन्हे कलाँ, "एकथो परमेश्वरके अगमवक्ता जहाँ फेन जाइत, उहिहे वहाँ आदर मिल्थिस। पर अपन गाउँमे, अपन घरेम, अपन नातपाँतनके बिच्चेम ओकर आदर नै हुइथिस।" 5 ओइने हुँकारमे विश्वास नै करलाँ, तबेकमारे येशू कौनो-कौनो मनैनके उप्पर किल हाँथ धारके ओइन्हे चोख्वैलाँ। यी बाहेक येशू वहाँ कौनो चमत्कार करे नै सेक्लाँ। 6 येशूहे अचम्म लग्लिन कि मनैनहे कुछु विश्वासे नै हुइतिन। यकरपाछे येशू आँजरपाँजरके गाउँमे जाके मनैनहे परमेश्वरके वचन सिखैलाँ।

7 थोरिक समय पाछे येशू अपन बाह्रथो चेलनहे अपन थेन आइक लग बलैलाँ। तब् येशू ओइन्हे भूत्वन बाहेर निकरना अधिकार देलाँ। और फेनदोस्रे ऊ ओइन्हे असिन सल्लाहा देके दुई-दुई जहनहे पठैलाँ। 8 "जब तुहुरे यात्रामे जैबो, तब तुहुरे अपन संग लट्ठीलेके जाई सेक्थो। पर खाना ना लैजिहो, या पैँसक ठैली फेन ना लैजिहो। 9 जुत्ता घाललेहो, पर अपन संग फादिल जोर लुग्गा ना लैजिहो।" 10 येशू ओइन्हे यी फेन कलाँ कि जब तुहुरे कौनो गाउँमे पैँठ्बो, तब यदि केऊ तुहुरिन्हे अपन घर आइक लग बलाई कलेसे तुहुरे तबसम वहे घरेम रहहो, जबसम तुहुरे ऊ नगरहे छोर ना देऊ। 11 यदि कौनो फेन ठाउँमे मनै तुहुरिन्के स्वागत करना या तुहुरिन्के बात सुन्नासे अस्वीकार करहीँ कलेसे वहाँसे निक्रेबेर तुहुरे अपन गोरामेसे धुर फेन झरादेऊ। असिक करना कलक उ नगरके मनैनहे परमेश्वर सजाय दिहीँ कना जनाइत। 12 तब् चेलनके वहाँसे चलगिलाँ, और मनैनहे बताई लग्लाँ, "तुहुरे अपन मन बद्लो और पाप करना छोरदेऊ, और परमेश्वरके ओहोँर घुमो।" 13 ओइने बहुत्ते मनैनकेमेसे भूत्वनहे बाहेर निकरलाँ और जैतूनके तेल दारके बहुत रोगीनहे ओइने चोख्वैलाँ।

14 तब् उ समयमे गालील प्रदेशके शासक हेरोद रज्वा उ कामके बारेम सुनल, जोन येशू करतिहिँत। काकरेकी बहुत मनै येशूक बारेम जानिँत। कौनो मनै येशूक बारेम असिके कहतिहिँत, "यी पक्कै फेन डुब्कि देहुइया यूहन्ना हो, जे मुके फेनदोस्रे जित्ती होगिल बा। तबेकमारे ते यी असिन चमत्कार करता।" 15 आकुरजाने कलाँ, "यी परमेश्वरके अगमवक्ता एलिया हो।" और आकुरजाने कलाँ, "यी परमेश्वरके उ अगमवक्तनके हस हो, जोन परमेश्वरके अगमवक्तन बहुत समय आघे रहिँत।" 16 जब हेरोद रज्वा असिन सुनल, तब् ऊ कहल, "ऊ डुब्कि देहुइया यूहन्ना हो मै अप्निहीँ ओकर मुन्टा काटे लगाइल रहुँ, पर ऊ फेनदोस्रे मुके सेकलमे जित्ती होगिल बा!" 17,18 हेरोद रज्वा बहुत आघे अपन भैया फिलिपके जन्नी हेरोदियाससे भोज करल रहे। पर डुब्कि देहुइया यूहन्ना हेरोद रज्वाहे कहल रहे, "अपन भैया जित्ती रहतसम परमेश्वरके अगमवक्ता मोशक नियम कानुन अनुसार ओकर जन्नीसे भोज करना मजा नै हो!" तबेकमारे हेरोदियासहे खुशी करक लग हेरोद रज्वा डुब्कि देहुइया यूहन्नाहे पकरवाके कारागारमे दारदेहल। 19 तब्बेहेँसे हेरोदियास डुब्कि देहुइया यूहन्नक विरोधमे रिसिबी धारलेहल रहे, और उहिहे मुवाई चाहे। पर हेरोद रज्वक कारण ऊ असिन करे नै सेकल। 20 काकरेकी हेरोद रज्वा डुब्कि देहुइया यूहन्नाहे यी जानके इज्जत करे कि ऊ एकथो मजा और पवित्र मनैया हो। ऊ ओकर सुरक्षक लग कारागारमे सिपाहिन फेन धर्ले रहे। जबफेन हेरोद रज्वा डुब्कि देहुइया यूहन्नासे बात बत्वाए, ते ऊ अचम्म होजाए। पर तभुन फेन ऊ ओकर बात सुन्ना रुचाए। 21 थोरिक समय पाछे हेरोद रज्वा अपन जलमदिन मनाइल। ऊ गालील प्रदेशके खास-खास अगुवनहे और फौजी अधीकारीनहे जलम दिवसमे शामिल हुइक लग बलाइल। यी जलम दिनके उत्सवके बेला डुब्कि देहुइया यूहन्नाहे मुवैना मौका हेरोदियासहे मिल्लिस। 22 तब् हेरोदियासके छाई भित्तर आइल, और जलम दिवसके बेला नाचल। और हेरोद रज्वा और ओकर पहुननहे ऊ खुशी बनैलस। तब् रज्वा ऊ लौँदीहे कहल, "तैँ का करना मन परैबे? तैँ ज्या चहबे, ऊ मै तुहिहे देहम।" 23 यहाँसम कि हेरोद रज्वा कसम खाइल, "तैँ ज्या फेन महिन्से मंग्बे, मै तुहिहे देहम। यहाँ सम् कि मोरिक आधा राज फेन मंग्बे ते मै तुहिहे दैदेहम।" 24 तब् लौँदी बाहेर निकरके अपन दाईक थेन गैल, और उहिसे पुँछल, "मै का मागुँ?" ओकर दाई कलिस्, "डुब्कि देहुइया यूहन्नक मुन्टा माँग।" 25 उ लौँदी झत्ते-झत्ते भित्तर हेरोद रज्वक थेन गैल, और कहल, "महिन्हे डुब्कि देहुइया यूहन्नक मुन्टा अब्बेहेँ बरका तथ्यामे देऊ।" 26 यिहिसे रज्वा गजब दुखि होगिल, पर ऊ अपन सक्कु पहुननके आघे कसम खाइल रहे, ओकर कारण लौँदीहे ऊ मनाही करे नै सेकल। 27 जुरतेहेँ हेरोद रज्वा एकथो सिपाहिहे आदेश देहल कि ऊ कारागारमे जाए, और डुब्कि देहुइया यूहन्नक मुन्टा काट्के नाने। 28 सिपाही यूहन्नक मुन्टा एकथो बरका तथ्यामे धारल, और लौँदीक थेन लैगिल। तब् उ लौँदी यूहन्नक मुन्टा अपन दाईहे दैदेहल। 29 जब यूहन्नक चेलनके पता पैलाँ कि हेरोद रज्वा डुब्कि देहुइया यूहन्नाहे मुवा देले बा, तब ओइने अइलाँ, और ओकर लाहाशहे लैजाके भँथारदेलाँ।

30 बाह्रथो निउतरह्यन जेनहे येशू पठाइल रहिन। जब ओइने फिर्ता हुइलाँ, और हुँकार चारु ओहोँर जमा हुइलाँ। तब ओइने येशूहे सक्कु बात बतैलाँ, जोन ओइने करलाँ और सिखैलाँ। 31 वहाँ बहुत्ते मनै आइतजाइत करतिहिँत कि येशू और हुँकार चेलनहे खाना खैना तकके फुर्सद नै मिल्लिन। तबेकमारे येशू अपन चेलनहे कलाँ, "चोलो, एकथो असिन ठाउँमे जाई, जहाँ हम्रे एक्केली रही, और हम्रे बिँसाई सेकी।" 32 तबेकमारे ओइने लाउमे बैठ्के एकथो असिन ठाउँक लग निकरगिलाँ, जहाँ ओइने एक्केली हुई सेकिँत। 33 पर बहुत मनै येशू और हुँकार चेलनहे जाइत देखलेलाँ, और जानलेलाँ कि ओइने कहाँ जाइतताँ। तबेकमारे ओइने पैदले आँजरपाँजरके नगर हुइती उ ठाउँमे आघे पुगगिलाँ, जहाँ येशू और हुँकार चेलन जाइतिहिँत। 34 जब येशू लाउमेसे बाहेर निकरलाँ, तब ऊ वहाँ बहुत्ते मनैनहे देख्लाँ, और ओइन्हे देख्के येशूहे सोग लग्लिन। काकरेकी ओइने असिन भेँरीनके हस रहिँत, जेनके कौनो भेँरहुवा नै रथिन। तब् येशू ओइन्हे परमेश्वरके राजके बारेम बहुत बात सिखाई लग्लाँ। 35 संझक हुँकार चेलनके हुँकार थेन आके कलाँ, "यी एकथो सुनसान ठाउँ बा, और आग्गिहीँ बहुत बेर होसेकल बा। 36 मनैनहे फिर्ता पठादी ताकि ओइने आँजरपाँजरके बजार और गाउँमे जाँइत, और अपन लग खैनक बन्दोबस्त करे सेकिँत।" 37 पर येशू कलाँ, "तुहुरे ओइन्हे खाइक लग देऊ।" ओइने पुँछ्लाँ, "का हम्रे दुई सौ चाँदीक सिक्का देके रोटी किनी और यनहे खवाई?" 38 तब् येशू ओइन्हे पुँछ्लाँ, "तुहुरिन्के थेन कैथो रोटी बा? जाके हेरो।" जब ओइने खोज्लाँ और येशूहे बतैलाँ, "पाँचथो रोटी और दुईथो मच्छी बताँ।" 39 तब् येशू अपन चेलनहे कलाँ, "मनैनहे हरियर घाँसमे पहाँटिक पहाँट बैठादेऊ।" 40 तब् मनै सौ-सौ और पचास-पचासके पहाँट बनाके बैठ्लाँ। 41 तब् येशू पाँचथो रोटी और दुईथो मच्छी लेलाँ, उप्पर स्वर्ग ओहोँर हेरलाँ, और परमेश्वरहे धन्यवाद देलाँ। ऊ रोटीहे खन्टैलाँ, और मनैनहे बाँटक लग चेलनहे देलाँ। येशू मच्छी फेन बाँटदेलाँ ताकि सक्कु जाने भेटाई सेकिँत। 42 उ सक्कु जाने जतरा मन रहिन, ओत्रा खैलाँ और अघागिलाँ। 43 जब सक्कु जाने खाना खाके सेक्लाँ, और खन्टैलक उब्रल रोटी और मच्छी चेलनके जमा करलाँ ते उ बाह्र छिट्वा रहे। 44 जेने रोटी खैलाँ, ओइने पाँच हजार जाने रहिँत। ओइने जन्नी और लरकनहे नै गिनित।

45 तब् जुरतेहेँ येशू अपन चेलनहे कलाँ, "तुहुरे अपन लाउमे जाऊ और महिन्से आघे गालील समुन्दरके दोसुर पाँजर बेथसेदा गाउँमे पुग्हो, मै यी सक्कु मनैनहे घरे जैना विदा देके अइम।" 46 सक्कु मनैनहे ओइन्के घरे जैना विदा देके येशू उप्पर पहाड़ ओहोँर प्राथना करे चलगिलाँ। 47 जब संझा होगिल, तब हुँकार चेलनके समुन्दरके बिच्चेम लाउमे रहिँत और येशू एक्केली धिक्वामे रहिँत। 48 येशू देख्लाँ कि चेलनके महा समस्यामे बताँ, ओइने लाउ आघे बह्राइक लग संघर्ष करतिहिँत। काकरेकी बयाल ओइन्के उल्टा ओहोँरसे बहतिहिन। येशू भिन्सरहीँ समुन्दरमे नेंग्ती ओइन्के थेन अइलाँ। असिन लागतेहे कि ऊ ओइन्से आघे निक्रे चाहतताँ। 49 जब चेलनके येशूहे समुन्दरमे नेगत देख्लाँ ते ओइने चिल्लाई लग्लाँ, काकरेकी ओइने सोच्लाँ कि ऊ भूत्वा हो। 50 जब ओइने येशूहे देख्लाँ ते ओइने सक्कु जाने घब्रागिल रहिँत। तब्बेहेँ येशू ओइन्हे कलाँ, "सँस्सा करो, यी मै हुइतुँ, ना डराऊ।" 51 तब् येशू ओइन्के संग लाउमे चहुँरलाँ, और बयाल एकदम शान्त होगिल। चेलनके गजब अचम्मित होगिलाँ। 52 काकरेकी ओइने देखल रहिँत कि येशू आघेक दिन रोटीक बारेमे का करलाँ, पर ओइने अभिन बुझे नै सेकल रहिँत कि जात्तिकमे येशू के हुइँत। ओइन्के मन अभिन फेन विश्वास करनामे हिचकिचाइतिहिन।

53 ओइने गालील समुन्दरहे नहङ्लाँ, और गनेसरेत ईलाकक धर्तीमे पुग्लाँ, और ओइने लाउहे वहाँ बहानदेलाँ। 54 जस्तेके ओइने लाउमेसे उतरलाँ, मनै वहे समय येशूहे चिहिन्लेलाँ। 55 ओइने उ पूरा ईलाकामे घुम्लाँ, और जहाँ-जहाँ फेन मनै सुन्लाँ कि येशू बताँ, ओइने बेमार मनैनहे दरीमे उठाके उ ठाउँमे येशूक थेन नन्लाँ। 56 हरेक ठाउँ जहाँ फेन येशू जाँइत, मनै गाउँ, नगर और खेट्वामेसे बेमार मनैनहे बजारमे नानित। और येशूहे बिन्ती करिँत् कि कमसे कम ऊ ओइन्हे हुँकार लुग्गक झल्लर किल छुए दिँत। और जे-जे हुँकिन्हे छुँइत, ओइने सक्कु जाने चोखाजाँइत।