1 तब् येशू मनैनहे और अपन चेलनहे कलाँ, "जात्तिके, मै तुहुरिन्हे कहतुँ, तुहुरिन्मेसे बहुत्ते जाने जेने यहाँ ठरह्याइल बताँ, ओइने परमेश्वरके राजहे अपन मुनासे आघे शक्तिक संग आइत देख्हीँ।"

2 छे दिन पाछे येशू पत्रुस, याकूब और यूहन्नाहे अपन संग एकथो पहाड़मे लैगिलाँ। जहाँ ओइने एकान्तमे रहिँत, जब चेलनके येशूहे हेरतिहिँत तब् एकफाले हुँकार रुप बदलगिलिन 3 और हुँकार लुग्गा असिन उज्जर और चहकार होगिलिन कि धर्तीक कौनो फेन लुग्गा धोउइया असिके लुग्गा धुई नै सेकत। 4 तब् उ तीनथो चेलनके परमेश्वरके दुईथो अगमवक्ता एलिया और मोशाहे येशूसे बात बत्वाइत देख्लाँ। 5 तब् पत्रुस येशूहे कहल, "गुरुजी, यी मजा हुइल कि हम्रे फेन यहाँ बती! हम्रे तीनथो तम्बू बनैबी, एकथो अप्निक लग, एकथो मोशक लग और एकथो एलियक लग।" 6 पत्रुस असिन यहे कारण कहल, काकरेकी ऊ और दोसुर दुईथो चेलनके घब्रागिलाँ, और ओइने सोँचे नै सेक्लाँ कि हम्रे का करी और का बोली। 7 तब् एकथो बद्री ओइन्हे छोप देहल, ओइने परमेश्वरहे उ बद्रीमेसे कहत सुन्लाँ, "यी मोरिक दुलार छावा हो। यी ज्या कही ओम्ने ध्यान देऊ।" 8 जब चेलनके चारु ओहोँर हेरलाँ। तब एकफाले मोशा और एलिया चलगिल रहिँत, और ओइने देख्लाँ कि वहाँ ओइन्के संग येशू किल बताँ। 9 जस्तेके येशू और हुँकार तीनथो चेलनके पहाड़मेसे उतरतिहिँत, येशू ओइन्हे कलाँ कि तुहुरे यहाँ ज्या देख्लो, यी बातहे मै, मनैयक छावा मुके सेकके फेनदोस्रे जित्ती नै हुइतसम किहु ना बतैहो। 10 असिके चेलनके उ जानकारी अपने थेन धरलाँ। पर ओइने अप्निहीँ-अप्निहीँ यी बात बत्वाई लग्लाँ कि मै, मनैयक छावा मुके सेकके फेनदोस्रे जित्ती नै होजाऊँ कलक मतलब का हो। 11 तब् चेलनके येशूहे पुँछ्लाँ, "का यी यहूदी कानुनके गुरुनके यी कना ठिक हुइतिन कि ख्रीष्ट अइनासे आघे एलियक अइना जरुरी बा? यदि हो कलेसे ते ऊ अबसम काकरे नै आइल?" 12,13 येशू जवाफ देलाँ, "यी सही हो कि परमेश्वर एलियाहे सक्कु चिज सुधारक लग आघे पठैना वाचा करल रहिँत। पर एलिया आग्गिहीँ आसेकल बा, और हमार अगुवन उहिहे नै मजा व्यवहार करलाँ, जसिके ओइन्हे मन लग्लिन। जसिके बहुत आघे परमेश्वरके अगमवक्तन फेन कहल रहिँत कि ओइने असिक करहीँ। पर मै, मनैयक छावक बारेम पवित्र शास्त्रमे बहुत्ते बात लिखल बा। पवित्र शास्त्र यी कहत कि महिन्हे बहुत्ते दुःख उठाई परी, और मनै महिन्हे अस्वीकार करहीँ।"

14 जब येशू और हुँकार तीनथो चेलनके दोसुर चेलनके थेन पहाड़मेसे तरे फिर्ता अइलाँ, ओइने देख्लाँ बहुत्ते मनै उ चेलनहे घेरल रहिँत और कौनो यहूदी कानुनके गुरुनके ओइन्से बहस करतिहिँत। 15 जस्तेके सक्कु मनै येशूहे देख्लाँ, हुँकिन्हे देख्के ओइन्हे महा अचम्म लग्लिन और हुँकार थेन दौरके जाके ओइने हुँकिन्हे नमस्कार करलाँ। 16 येशू ओइन्हे पुँछ्लाँ, "तुहुरे केकर बारेम यनसे यी बहस करतो?" 17 भीड़मेसे एकथो मनैया कहल, "गुरुजी, मै अपन छावाहे अप्निक थेन नानल बतुँ, काकरेकी ओकरमे एकथो भूत्वा लागल बतिस, जे यिहिहे बात बत्वाई नै देथिस। 18 जब उ भूत्वा यिहिहे अपन कब्जामे करलेहत, तब ऊ यिहिहे तरे भुइयाँमे गिरादेहत, और यिहिहे ऐँथ्वाइत। तब् यकर मुहेँमेसे फेँज्कुर निकर्थिस, और यी अपन दाँत किचकिचाइत, और ठेत्कार होजाइत, और यी हिल्बो नै करत। मै अप्निक चेलनहे फेन कनु कि भूत्वाहे निकारदेऊ, पर ओइन्के थेन असिन करना शक्ति नै हुइतिन।" 19 येशू ओइन्हे कलाँ, "तुहुरे अविश्वासी मनैनके संग मै कबसम रहुँ ताकि तुहुरे विश्वास करो? महिन्हे कबसम तुहुरिन्के विश्वास करना अस्याँ लागे परी? यी लौँदाहे मोरिक थेन नानो।" 20 ओइने उ लौँदाहे येशूक थेन नन्लाँ। जब उ भूत्वा येशूहे देखल, तब् भूत्वा उ लौँदाहे भुइयाँमे गिराके ऐँथ्वाई लागल, और उ लौँदक मुहेँमेसे फेँज्कुर निक्रे लग्लिस। 21 येशू उ लौँदक बाबाहे पुँछ्लाँ, "यकर यी हालत कैह्यासे बतिस?" तब् लौँदक बाबा कलिस, "छुटिएसे, 22 कैयोचो यी भूत्वा यिहिहे आगिम और पानीमे दारके मुवैना कोशिस करल। यदि अप्नि कुछु करे सेक्थी कलेसे, हमारमे दया करी और हम्रिहिन्हे सहयोग करी।" 23 येशू उहिहे कलाँ, "तुँ असिक काकरे कहतो? ‘यदि अप्नि कुछु करे सेक्बी’ विश्वास करुइयनके लग सक्कु चिज सम्भव बा!" 24 तब्बेहेँ उ लौँदक बाबा रुइति कहल, "मै विश्वास करतुँ, मोरिक शंखा महिन्से दूर करदी!" 25 जब येशू मनैनके भीड़ गजब बह्रत देख्लाँ, तब येशू भूत्वाहे असिक कहिके हप्कैलाँ, "यी लौँदाहे बहिर और गोंग बनुइया ए भूत्वा! मै तुहिहे आज्ञा देहतुँ, यी लौँदकमेसे बाहेर निकर, और फेनदोस्रे कबु फेन घुमके ना आईस।" 26 तब् भूत्वा चिल्लाई लागल, और उ लौँदाहे ऐँठाई लागल, और बाहेर निकरगिल। तब् उ लौँदा बेहोस होके गिरगिल। और उ लौँदा मुअल हस होगिलस, यहाँसम कि वहाँ रहल बहुत्ते मनै कलाँ, "यी मुगिल बा।" 27 पर येशू उ लौँदक हाँथ पकरके उठैलाँ ते ऊ ठरह्यागिल और चोखागिल। 28 यकरपाछे जब येशू घरेम अपन चेलनके संग एक्केली रहिँत, तब् चेलनके येशूहे पुँछ्लाँ, "हम्रे उ भूत्वाहे काकरे बाहेर निकारे नै सेक्ली?" 29 येशू ओइन्हे जवाफ देलाँ, "केऊ फेन यी मेरके भूत्वाहे बाहेर तबसम नै निकारे सेकी, जबसम ऊ परमेश्वरसे प्राथना नै करी।"

30 यकरपाछे येशू और हुँकार चेलनके उ ठाउँसे चलगिलाँ, और गालील प्रदेश ओहोँरसे गैलाँ। येशू नै चाहिँत कि केऊ पता पाए कि ऊ कहाँ बताँ, 31 ऊ अपन चेलनके संग धेउर समय बिताई चाहिँत, ताकि ऊ ओइन्हे सिखाई सेकिँत। येशू अपन चेलनहे बतैलाँ, "झत्तेहेँ केऊ मै, मनैयक छावाहे धोखा देके महिन्हे मोरिक दुश्मननके अधिकारमे दैदी। ओइने महिन्हे मुवादिहीँ। पर ओइने महिन्हे मुवाके सेक्हीँ ते मै फेनदोस्रे मुअलमेसे जित्ती होजैम।" 32 चेलनके बुझे नै सेक्लाँ कि येशूक कलक मतलब का हो, और ओइने पुँछ्ना फेन डराँइत।

33 तब् येशू और हुँकार चेलनके हुँकार घर कफर्नहुम नगरमे अइलाँ। जब ओइने घरक भित्तर रहिँत, तब येशू ओइन्हे पुँछ्लाँ, "डगरमे तुहुरे का छलफल करतोहो?" 34 ओइने चिमचाम रहिगिलाँ, काकरेकी डगरमे ओइने यी बातके छलफल करतिहिँत कि हमारमेसे भारी के हो? 35 येशू बैठ्गिलाँ, और बाह्रथो चेलनहे बलाके अपन चारु ओहोँर जमा करलाँ और कलाँ, "यदि तुहुरिन्केमेसे केऊ भारी हुई चाहत कलेसे, अपनहे उहि अतरा नम्र बनाई परी कि ऊ सक्कुहुनसे छुटी बा।" 36 तब् येशू एकथो छुटिमुती लौँदाहे अपन कोनम उठाके अपन चेलनहे कलाँ, 37 "यदि कौनो मनैया कौनो असिन लरकाहे मोरिक कारण दया देखाई, ऊ जात्तिके मोरिक आदर करत। यदि कौनो मनैया मोरिक आदर करत कलेसे, ऊ जात्तिके परमेश्वरके आदर करत, जे महिन्हे पठाइल बा।" 38 तब् यूहन्ना येशूहे कहल, "गुरुजी, हम्रे एकथो मनैयाहे अप्निक नाउँक अधिकार लेके मनैनकेमेसे भूत्वनहे निकारत देख्ली। काकरेकी ऊ हमार हस अप्निक चेला नै हो, तबेकमारे हम्रे उहिहे ओसिक करना मनाही कर्ली।" 39,40 पर येशू कलाँ, "जे हमार विरोधमे नै हो, ऊ हमार संघरिया हो। काकरेकी केऊ फेन असिन नै हुई, जे मोरिक नाउँक शक्तिहे प्रयोग करके चमत्कार करी, और ओकर पछ्पछेहेँ मोरिक बारेम खराब फेन बोली। तबेकमारे उहिहे ना रोको। 41 यदि केऊ तुहुरिन्हे ख्रीष्टके समझके एक गिलास पानी फेन दि कलेसे, मै तुहुरिन्हे जात्तिके कहतुँ कि उ मनैयाहे पक्कै फेन ओकर ईनाम मिल्हिस।"

42 "यदि केऊ महिन्हे विश्वास करुइयाहे मोरिकमे विश्वास करनासे रोकी कलेसे, चाहे यी छुटी लरकक हस ना होए, उ मनैयक लग ते यी मजा हुइहिस कि ओकर घेँचामे बरवार चकियक पठरा बहानके समुन्दरमे उहिहे फेँकादेहे। 43 पाप कर्नक कौनो फेन कारणहे हटादेऊ! जसिके कि तुहुरे कौनो अपन एकथो हाँथ काटतो, जे तुहुरिन्हे पाप करवाइत। दुनु हाँथेलेके नरकमे गैलसे तोहाँर लग यी मजा बा कि तुँ एक्केथो हाँथेलेके सदाकालके जीवनमे प्रवेश करो। 44 नरकमे, असिन किरा ओइन्के शरीरहे खैहीँ, जेने कबु नै मुथाँ और ना ते ओइन्हे जरुइया आगी कबु बुटट्। 45 पाप कर्नक कौनो फेन कारणहे हटादेऊ! जसिके कि तुहुरे कौनो अपन एकथो गोरा काटतो, जे तुहुरिन्हे पाप करवाइत। दुनु गोरालेके नरकमे गैलसे तोहाँर लग यी मजा बा कि तुँ एक्केथो गोरालेके सदाकालके जीवनमे प्रवेश करो। 46 नरकमे, असिन किरा ओइन्के शरीरहे खैहीँ, जेने कबु नै मुथाँ और ना ते ओइन्हे जरुइया आगी कबु बुटट्। 47 पाप कर्नक कौनो फेन कारणहे हटादेऊ! जसिके कि तुहुरे कौनो अपन एकथो आँखी निकारतो जे तुहुरिन्हे पाप करवाइत। दुनु आँखीलेके नरकमे गैलसे तोहाँर लग यी मजा बा कि तुँ एक्केथो आँखीलेके परमेश्वरके राजमे प्रवेश करो। 48 नरकमे, असिन किरा ओइन्के शरीरहे खैहीँ, जेने कबु नै मुथाँ और ना ते ओइन्हे जरुइया आगी कबु बुटट्। 49 हर मनैया आगीसे शुद्ध कराजाई, जसिके बलिदानहे नोनेलेके शुद्ध करथाँ। 50 नोन एकथो जरुरी चिज हो। पर यदि नोनक स्वाद चलगिलिस कलेसे, उहिहे फेनदोस्रे कसिके नोनार बनैना ते? तुहुरिन्के बिच्चेम नोनक हस गुण हुई परत, और एक दोसुर जहनके संग एकतामे रहे परत।"