1 मै पावल, येशू ख्रीष्टके सेबक हुइतुँ, मै निउतरह्या हुइक लग परमेश्वरसे चुनगिल बतुँ, और परमेश्वरके खुशीक खबर सुनाइक लग अलग करगिल बतुँ। 2 येशू यी संसारमे अइनासे बहुत पैलेहेँ, परमेश्वर वाचा कर्ले रहिँत कि ऊ अपन पवित्र शास्त्रमे लिखल बात अगमवक्तनके माध्यमसे यी खुशीक खबरके खुलासा करहीँ। 3 यी खुशीक खबर परमेश्वरके छावा, हमार प्रभु येशू ख्रीष्टके बारेमे हो। हुँकार जलम एकथो मनैयक रुपमे दाऊद रज्वक वंशक परिवारमे हुइल रहिन।

4 और पवित्र आत्मक शक्तिसे येशू ख्रीष्ट मुअलमेसे फेनदोस्रे जिगिलाँ। तबेकमारे येशू ख्रीष्ट परमेश्वरके छावा हुइँत। 5 येशू ख्रीष्टके कारण महिन्हे परमेश्वरसे अनुग्रह और निउतरह्यक काम मिलल। ताकि हुँकार नाउँक कारण सक्कु जातिक मनै ख्रीष्टहे विश्वास करिँत, और हुँकार आज्ञा पालन करिँत। 6 तुहुरे जेने रोम शहरमे रथो, तुहुरे फेन उ मनैनके हिस्सा हुइतो, जेनहे येशू ख्रीष्टके मनै हुइक लग बलागिल बतिन। 7 यी चिट्ठी रोम शहरमे रहल उ सक्कु जहनके लग हो, जेनहे परमेश्वर प्रेम करथाँ, और जेनहे ऊ अपन पवित्र मनै हुइक लग बलैले बताँ। और तुहुरिन्हे हमार बाबा परमेश्वर और प्रभु येशू ख्रीष्टके ओहोँरसे अनुग्रह और शान्ति मिल्ती रहे।

8 सक्कुहुनसे आघे मै मोरिक परमेश्वरहे येशू ख्रीष्टके माध्यमसे तुहुरिन्के सक्कुहुनके लग धन्यवाद देहतुँ। काकरेकी बहुत ठाउँमे मनै यक्रेहे बारेमे बात बत्वैथाँ कि तुहुरे येशू ख्रीष्टहे कसिके विश्वास कर्लो। 9 मै अपन पूरा मनसे परमेश्वरके सेवामे येशू ख्रीष्टके खुशीक खबर मनैनहे सुनैथुँ, वहे परमेश्वर मोरिक साँखी हुइँत कि कसिके मै लगातार मोरिक प्राथनामे तुहुरिन्हे सम्झथुँ। 10 और रोट्दिन अपन प्राथनामे मै मंग्थुँ, कि परमेश्वरके इच्छासे कौनो ना कौनो मेरसे अन्तिममे मै तुहुरिन्से भेँटा करे आई सेकुँ।

11 काकरेकी तुहुरिन्हे भेँटा करना मोरिक बहुत इच्छा बा ताकि मै तुहुरिन्हे कुछ आत्मिक वरदानके आशिष देहे सेकुँ, जिहिसे तुहुरिन्के विश्वास बल्गर हुई सेके। 12 मोरिक कहे खोज्लक का हो कलेसे तुहुरिन्के विश्वास बल्गर कराईक लग मै तुहुरिन्हे सहायता करे सेकुँ। और मोरिक विश्वासहे बल्गर बनाइक लग तुहुरे महिन्हे सहायता करे सेको।

13 और हे मोरिक विश्वासी भैयो, मै चहथुँ कि तुहुरे जानलेऊ कि जसिके मै गैर-यहूदि मनैनहे ख्रीष्टके लग चेला बनैनु। ओस्तेहेँके मै तुहुरिन्हे फेन आत्मिक रुपमे आघे बह्रक लग तुहुरिन्हे सहयोग करे अइना चाहतुहुँ। पर महिन्हे अभिनसम कुछु बात रोकल बा। 14 सभ्य जाति हुइँत या असभ्य जाति रहिँत, बुद्धिमान रहिँत या निर्बुद्धि, सक्कु जातिनहे खुशीक खबर सुनाइक लग मै ऋणी बतुँ। 15 तबेकमारे सेकतसम तुहुरे रोम शहरमे रहुइयनहे फेन खुशीक खबर प्रचार करक लग मै तयार बतुँ।

16 काकरेकी ख्रीष्टके खुशीक खबरमे महिन्हे गर्व बा। काकरेकी परमेश्वर अपन शक्तिसे खुशीक खबरमे विश्वास करुइया प्रत्येक जहनहे बँचैथाँ। सुरुवात ओहोँर परमेश्वर यहूदी मनैनहे मुक्ति देलाँ, और आब सक्कु मनैनहे मुक्ति देथाँ। 17 काकरेकी खुशीक खबरमे परमेश्वर यी प्रकट करथाँ, कि हुँकार थेन मनैनहे धर्मी घोषणा करना अधिकार बतिन। उ धार्मिकता जोन पूरा रुपसे हुँकारमे विश्वास कर्लक कारणसे आइत। जसिके पवित्र शास्त्रमे लिखल बा, "जिहिहे परमेश्वर विश्वाससे धर्मी बनैले बताँ, ऊ जीई।"

18 परमेश्वरके रिस ओइन्के विरोधमे स्वर्गमेसे प्रकट हुइल बतिन, जेने सक्कु मेरिक भक्तिहीन और अधर्मी काम करथाँ, और जेने खराब काम करथाँ, और जेने परमेश्वरके सच्चाइक विरोध करथाँ। 19 परमेश्वर कसिन बताँ कहिके सक्कु मनै जातिनके लग फरछ्वार बा। काकरेकी परमेश्वर ओइन्हे अप्निहीँ फरछ्वार करदेले बतिन।

20 परमेश्वरके अनन्त शक्ति और गुणहे नै देखे सेकजाइत। पर यी बातहे परमेश्वर संसारके सृष्टिक सुरुवातेसे अपन सृष्टि कर्लक चिजहे देखैलाँ। तबेकमारे परमेश्वरहे नै जन्थी कहिके ओइन्के थेन कौनो बहाना नै हुइतिन। 21 काकरेकी परमेश्वरहे चिहिनके फेन ओइने परमेश्वरहे देहे परना आदर नै देलाँ, ना ते धन्यवाद चह्रैलाँ। पर ओइन्के विचारके कौनो मोल नै हुइतिन, और ओइन्के मूर्ख विचार सक्कु गलत बतिन।

22 ओइने अपनहे अप्निहीँ बुद्धिमान बती कहिके दाबी करके ओइने मूर्ख बनगिलाँ। 23 ओइने कबु नै मुना परमेश्वरके महिमक बदला सदादिन जित्ती नै रना मनैनहे, चिरैँ-चुरुंगीनहे, और चर-गोऱ्या जानबरीनहे, और घिसरके नेंग्ना जानबरीनके मूर्तिहे महिमा करलाँ।

24 तबेकमारे परमेश्वर ओइन्हे ओइन्के मनके अभिलाषक अनुसार नैतिक अशुद्धतक लग छोरदेलिन, ताकि ओइने एकदोसर जहनमे खराब काम करके अपन शरीरहे अनादर करिँत। 25 काकरेकी ओइने परमेश्वरके बारेमे सच्चाइहे विश्वास करना छोरदेथाँ। और ओइने झूँटहे स्वीकार करथाँ, और सृष्टि करुइया परमेश्वरहे छोरके हुँकार सृष्टि कर्लक चिजके पुजा और सेवा करलाँ। सृष्टिकर्ता परमेश्वरके हरदम महिमा होए। आमेन! (यकर मतलब हुइत, अस्तेहेँ होए।)

26 तबेकमारे परमेश्वर ओइन्हे लाज लग्तिक अभिलाषक लग छोरदेलिन। जन्नी मनै थारु मनैनसे सुट्ना बन्द करदेलाँ, और ओकर बदला उ जन्नीन दोसुर जन्नीनके संग सुते लग्लाँ। 27 ओस्तेहेँके थारु मनै फेन जन्नीनके संगक स्वभाविक व्यवहार छोरके एकदोसर जहनमे कामुक्तक जलनमे थारु मनै थारुए मनैनके संग गलत काम करके ओइने अपन उप्पर अपने गल्तीक सजाय लयन्थाँ।

28 काकरेकी ओइने परमेश्वरके ज्ञानहे स्वीकार करना ठिक नै हो कहिके सोच्लाँ। तबेकमारे परमेश्वर फेन गलत काम करक लग ओइन्हे ओइन्के बेकारके मनके नियन्त्रणमे छोरदेलिन।

29 तबेकमारे ओइने सक्कु मेरिक अधर्म, और दुष्टता, और लालच, और हिस्कासे भरगिलाँ; और डाह, हत्या, झगरा, छल और ईर्ष्यासे भरगिलाँ। और चिब्ली खैना, 30 और दोसुर जहनके बदनाम करना, परमेश्वरहे घृणा करना, घमण्डी, अभिमानी, दुष्ट बात बनैती नेंग्ना, दाई-बाबनके कलक नै मन्ना, 31 मूर्ख, विश्वासघाती, खत्थाहा और क्रुर होगिलाँ। 32 असिन काम करुइयन ते मुना ठिक रथिन कना परमेश्वरके धार्मिक-विधान जन-जन्ति फेन ओइने यी काम किल नै करथाँ। पर असिन काम करुइयनके संग ओइने पूरा सहमत फेन होजिथाँ।