13 काकरेकी पवित्र शास्त्रमे असिके लिखल बा, "प्रभु उ सक्कुहुन्हे बँचैहीँ, जे-जे हुँकार नाउँ गोहरैहीँ।"
इजरायलके मनै खुशीक खबरहे अस्वीकार कर्लक
14 पर मनैनहे परमेश्वरसे सहयोग मंग्नासे पहिले हुँकारमे विश्वास करे परत। और हुँकारमे विश्वास करनासे पहिले हुँकार बारेमे सुने परल। और यदि मनै येशू प्रभुहे विश्वास करना बारेमे नै सुनल हुइँत कलेसे सुनक लग केऊ ओइन्हे हुँकार बारेमे बताई परल। 15 और ओइन्हे जाके बतैनासे पहिले बताइक लग केऊ उहिहे पठाई परल। जसिके पवित्र शास्त्रमे लिखल बा, "खुशीक खबर प्रचार करुइयनके गोरा कतरा सुग्घुर बतिन!"
16 पर सक्कु जाने उ खुशीक खबरहे स्वीकार नै करलाँ। जसिके यशैया अगमवक्ता कहत, "हे प्रभु, बहुत कम मनै हमार सुनैलक खुशीक खबरमे विश्वास करलाँ।" 17 तबेकमारे जब तुहुरे खुशीक खबर सुन्थो, तब तुहुरे विश्वास करथो। और यी खुशीक खबर ख्रीष्टके वचन हो।