1 शायद हम्रे जन्थी कि यी बातसे कुछु फरक नै परत, पर हम्रे अपनहे किल खुशी करक लग असिके नै करना हो। हम्रे विश्वासमे पक्का रहल मनै उ मनैनके शंखा और विश्वासहे फेन विचार करे परत, जेने विश्वासमे कमजोर बताँ, ओइने यी बातहे गलत मन्थाँ। 2 हम्रे प्रत्येक जाने दोसुर जहनके विश्वासहे बल्गर बनाइक लग ओइन्हे खुशी बनैना काम और ओइन्हे सहयोग करे परत।

3 काकरेकी ख्रीष्ट फेन अपनेहे खुशी नै बनैलाँ। पर जसिके पवित्र शास्त्रमे लिखल बा, "जोन मनै तोरिक अपमान करलाँ, ओइने मोरिक फेन अपमान करलाँ।" 4 जतरा बात पैलेहेँसे पवित्र शास्त्रमे लिखल बा, उ हमारे शिक्षाके लग लिखगिल बा। ताकि पवित्र शास्त्रसे मिल्ना स्थिरता और उत्साहासे हम्रे उ आशा भेटाई सेकी जोन आशा परमेश्वर हम्रिहिन्हे देहम कहिके वाचा कर्ले रहिँत।

5 मै प्राथना करतुँ कि धैर्यता और उत्साहा देहुइया परमेश्वर तुहुरिन्हे ख्रीष्ट येशूक अनुशरण कर्ती एकदोसर जहनके संग शान्तिसे रहक लग सहायता करिँत। 6 ताकि तुहुरे सक्कु जाने एक्के संग मिलके परमेश्वर, हमार प्रभु येशू ख्रीष्टके बाबक महिमा करे सेको।

7 तबेकमारे जसिके ख्रीष्ट तुहुरिन्हे स्वीकार करलाँ, ओस्तेहेँके तुहुरे फेन एकदोसर जहनहे स्वीकार करो; ताकि मनै परमेश्वरके महिमा करिँत।

8 मै तुहुरिन्हे कहतुँ, कि जोन वाचा परमेश्वर हमार पुर्खनहे देले रहिँत, उ वाचाहे परमेश्वर विश्वासयोग्यतासे पूरा करहीँ कना देखाइक लग ख्रीष्ट यहूदी मनैनके सेबक बनगिलाँ। 9 और गैर-यहूदिनके फेन परमेश्वरके दयक कारण हुँकार महिमा ओस्तेहेँके करो, जसिके पवित्र शास्त्रमे लिखल बा,

"तबेकमारे हम्रे गैर-यहूदिनके फेन अप्निक महिमा कर्बी,

और अप्निक नाउँक गीत गैबी।"

10 और पवित्र शास्त्रक औरे ठाउँमे असिके फेन लिखल बा,

"हे सक्कु गैर-यहूदिनके, परमेश्वरके प्रजनके संग आनन्द मनाऊ।"

11 और कौनो दोसुर ठाउँमे फेनदोस्रे पवित्र शास्त्रमे लिखल बा,

"हे सक्कु गैर-यहूदिनके, प्रभुक महिमा करो;

और हे सक्कु राज्यक मनै; हुँकार महिमा करो।"

12 और फेनदोस्रे यशैया अगमवक्ता पवित्र शास्त्रमे असिके लिखल बा,

"यिशैक* वंशमेसे एक जाने अइहीँ,

और ऊ गैर-यहूदिनकेमे शासन करहीँ,

और ऊ ओइन्हे बँचैहीँ कहिके हुँकारमे गैर-यहूदिनके आशा धरहीँ।"

13 मै प्राथना करतुँ कि आशा देहुइया परमेश्वर विश्वास करनामे तुहुरिन्हे पूरा रुपमे खुशी और शान्तिक आनन्द उठैनामे सहयोग करिँत, ताकि पवित्र आत्मक शक्तिसे तुहुरिन्के आशा बहर्ती जाए।

14 हे मोरिक विश्वासी भैयो; मै तुहुरिन्के बारेमे जन्थुँ, कि तुहुरे फेन अप्निहीँ भलाईसे भरल बतो। और तुहुरिन्हे का करे परी कहिके तुहुरे पूरा रुपमे जन्थो, और तुहुरे एकदोसर जहनहे सिखाई सेक्थो।

15 तभुन फेन मै कहुँ-कहुँ तुहुरिन्हे याद करवाइक मारे बहुत हिम्मत करके लिख्नु। यी मै यहे कारणसे लिख्नु, काकरेकी परमेश्वर महिन्हे विशेष अनुग्रह देले बताँ। 16 कि मै गैर-यहूदिनके लग ख्रीष्ट येशूक सेबक होके मै एकथो पुजारीक हस परमेश्वरसे मिल्लक खुशीक खबर सुनैना सेवा करथुँ। ताकि गैर-यहूदिनहे परमेश्वरके थेन एकथो भेटीक रुपमे नाने सेकुँ, जिहिसे ऊ खुशी हुई सेकिँत। काकरेकी पवित्र आत्मा ओइन्हे शुद्ध बनैले बतिन।

17 तबेकमारे येशू ख्रीष्टके कारण मै परमेश्वरके सेवामे गर्व करे सेक्थुँ। 18 काकरेकी ख्रीष्ट मोरिक माध्यमसे ज्या कर्ले बताँ, उ कहक लग मै साहसी बतुँ। गैर-यहूदिनहे परमेश्वरके अनुशरण करवैनामे ख्रीष्ट महिन्हे सक्षम बनैलाँ। जब ओइने मोरिक बोली सुन्लाँ, और मोरिक कामहे देख्लाँ, तब ओइने येशू ख्रीष्टहे विश्वास करलाँ। 19 पवित्र आत्मक माध्यमसे महिन्हे देगिलक शक्तिसे मै अचम्मक काम और चमत्कार करथुँ। तबेकमारे जहाँ फेन मै यरुशलेमसे लेके इल्लुरिकन प्रदेशसम गैल बतुँ। वहाँ मै सक्कु मनैनहे येशू ख्रीष्टके बारेमे खुशीक खबर सुनाइल बतुँ।

20 पर मोरिक मनके इच्छा यहे बा, कि खुशीक खबरके प्रचार वहे ठाउँमे होए, जहाँ येशू ख्रीष्टके बारेमे अभिनसम नै सुनागिल हो; ताकि मै उ कामहे कर्ती ना रहुँ, जोन कामके सुरुवात औरे कौनो दोसुर जाने कर्ले बताँ। 21 पर मै वहे बातहे पूरा करे चहथुँ, जोन बात पवित्र शास्त्रमे असिके लिखल बा,

"जेनहे हुँकार बारेमे कबु नै बतागिल हुइतिन, ओइने हुँकिन्हे देख्हीँ,

और जेने हुँकार बारेमे कबु नै सुनल हुइँत ओइने बुझ्हीँ।"

22 तबेकमारे मै तुहुरिन्के थेन आई नै सेक्नु। 23 पर आब यी ठाउँमे जोन मनै ख्रीष्टके बारेमे नै सुनल हुइँत, ओइन्हे फेन मै खुशीक खबर सुनैना काम पूरा कर सेकल बतुँ।

24 तबेकमारे जब मै स्पेन देशमे जैम कलेसे जाइबेर तुहुरिन्हे भेँटा करके जैम। काकरेकी महिन्हे आशा बा कि उ यात्रामे मै तुहुरिन्से भेँटा करुँ। और जब मै तुहुरिन्के संगक संगतीसे आनन्दित होजिम। तब मै चहथुँ कि तुहुरे स्पेन देशके यात्रक लग महिन्हे कुछु सहायता करो। 25 पर अब्बे मै परमेश्वरके पवित्र मनैनहे दान देहक लग यरुशलेम शहरमे जाइतुँ।

26 यरुशलेम शहरमे जेने परमेश्वरके पवित्र मनै हुइँत, और जेने गरीब बताँ, ओइन्हे माकेडोनिया प्रदेश और अखैया प्रदेशके मनै दान देले बतिन। काकरेकी असिके करना ओइन्हे मजा लग्लिन। 27 ओइने यी अपन खुशीसे करलाँ। और ओइने यरुशलेम शहरमे रहल मनैनके ऋणी बताँ। काकरेकी यहूदिनके गैर-यहूदिनके संग परमेश्वरसे भेटैलक आत्मिक आशिष बँट्लाँ। यी सही हो कि गैर-यहूदिनके यी संसारके भौतिक आशिष यहूदिनके संग बँट्लाँ।

28 तबेकमारे मै सक्कुहुनसे पहिले यरुशलेम शहरमे जाइतुँ, ताकि ओइन्हे यी जमा कर्लक सहायता रकम देहे सेकुँ। ओकर पाछे मै फेनदोस्रे रोम देशमे आके तुहुरिन्से भेँटा करके सेकके मै स्पेन देशमे चलजिम। 29 और मै जन्थुँ, जब मै तुहुरिन्के थेन अइम ते ख्रीष्ट तुहुरिन्हे पूरा रुपमे आशिष दिहीँ।

30 और हे मोरिक विश्वासी भैयो; मै तुहुरिन्हे हमार प्रभु येशू ख्रीष्टके नाउँसे अनुरोध करतुँ कि तुहुरे मोरिक लग प्राथना करके मोरिक संघर्षमे शामिल होजाऊ। असिके तुहुरे पवित्र आत्मक माध्यमसे महिन्हे करना तुहुरिन्के प्रेमके कारण करो। 31 ताकि मै यहूदिया प्रदेशके अविश्वासीनसे बँचल रहे सेकुँ, और तुहुरे असिके फेन प्राथना करहो कि वहाँक विश्वासीन यरुशलेम शहरमे मोरिक लैगिलक दानहे स्वीकार करे सेकिँत। 32 और परमेश्वरके इच्छासे मै तुहुरिन्के थेन आनन्दसे आके तुहुरिन्के संग बिँसाई सेकुँ। 33 मै प्राथना करतुँ कि शान्ति देहुइया परमेश्वर तुहुरिन् सक्कुहुनके संग रहिँत। आमेन! (यकर मतलब हुइत, अस्तेहेँ होए।)