1 शायद तुँ असिन सोँच्थो कि तुँ दोसुर मनैनहे दोष लगाई सेक्थो। पर दोसुर जहनहे दोष लगुइया तुँ जे रलेसे फेन, तोहाँर थेन कुछु बहाना नै कहो। काकरेकी जोन बातमे तुँ दोसुर जहनहे दोष लगैथो, वहे बातमे तुँ अप्ने फेन दोषी ठहरथो। काकरेकी दोष लगुइया तुँ फेन वहे काम करथो। 2 और हम्रे जन्थी कि परमेश्वर न्याय करेबेर असिन काम करुइया हरेक जहनहे दण्ड दिहीँ।

3 और तुँ असिन काम करुइयनहे दोष लगैथो, और अप्निहीँ फेन वहे काम करथो; और तुँ सोँच्थो कि तुँ परमेश्वरके न्यायसे बँचजिबो। 4 अथवा परमेश्वरके दया, और सहनशीलता, और धैर्यतक प्रशस्तताहे तुँ निच सम्झथो? और का परमेश्वरके भलाई तोरिक मन बदलके तुहिहे पाप करना छुटादी?

5 पर तुहुरे जिद्दीह्या बतो, और अपन मन बदलके पाप करना नै छोरथो। जब परमेश्वर सक्कु जहनके धार्मिकतासे न्याय करहीँ, तब ऊ तुहुरिन्हे आकुर धेउर दण्ड दिहीँ। 6 काकरेकी परमेश्वर हरेक मनैनहे ओइन्के काम अनुसार ओइन्हे ईनाम दिहिन। 7 धैर्यतासे मजा काम करके महिमा, इज्जत और अमरत्त्व खोजुइयनहे परमेश्वर सदाकालके जीवन दिहीँ। 8 पर जेने स्वार्थी बताँ, और सच्चाईहे नै मन्थाँ, पर खराब काम करथाँ, ओइन्के उप्पर परमेश्वर अपन क्रोध और रिस देखैहीँ। 9 और खराब काम करुइया हरेक मनैनहे दुःख और कष्ट अइहिन। परमेश्वर आघे यहूदिनके न्याय करहीँ, ओकर पाछे ओइन्के न्याय हुइहिन जेने गैर-यहूदी हुइँत।

10 पर मजा काम करुइया सक्कु जहनहे महिमा, आदर और शान्तिक आत्मा मिल्हिन। आघे यहूदिनहे मिल्हिन, ओकर पाछे ओइन्हे मिल्हिन जेने गैर-यहूदी हुइँत। 11 काकरेकी परमेश्वरके लग सक्कु मनै बराबर हुइँत।

12 गैर-यहूदिनके, जेने बिना मोशक नियम कानुनके पाप कर्ले बताँ, ओइने मोशक नियम कानुन बिना परमेश्वरसे दण्ड भेटैहीँ। और यहूदी मनै, जेने मोशक नियम कानुन भेटाके पाप कर्ले बताँ, ओइन्हे मोशक नियम कानुन अनुसारे परमेश्वर दण्ड दिहिन। 13 काकरेकी मोशक नियम कानुन सुन्लक ओहोँरसे किल परमेश्वर ओइन्हे अपन संग धर्मी नै ठहरैथाँ। पर जब ओइने मोशक नियम कानुन अनुसार करे परना काम करथाँ, तब परमेश्वर ओइन्हे धर्मी ठहरैथाँ। 14 काकरेकी मोशक नियम कानुन नै रहल गैर-यहूदी मनै स्वाभाविक रुपमे अथवा अप्निहीँ मोशक नियम कानुनमे रहल काम करथाँ कलेसे मोशक नियम कानुन नै रलेसे फेन ओइने यी साबित करथाँ कि ओइन्के मनमे अपने नियम कानुन बतिन। 15 ओइने देखैथाँ कि परमेश्वरके देहल मोशक नियम कानुन ओइन्के मनमे लिखल बतिन। काकरेकी ओइन्के अपने सोँच देखैथिन कि यी सच्चा हो। काकरेकी ओइन्के विचार या ते ओइन्हे दोष लगैथिन, या ओइन्हे बतैथिन कि ओइने सही करतताँ। 16 यी वहे दिन हुई, जब परमेश्वर मोरिक सुनैलक खुशीक खबर अनुसार येशू ख्रीष्टसे मनैनके नुकल बातके न्याय करहीँ।

17 पर यदि तुँ यहूदी हुइतो कहिके मोशक नियम कानुनमे भरोसा करथो। और परमेश्वर संगके सम्बन्धमे घमण्ड करथो। 18 और तुहिन्हे परमेश्वरके इच्छा पता बा। और तुँ मजा-मजा बातमे सहमत हुइथो। काकरेकी तुहिन्हे यनके बारेमे मोशक नियम कानुनमेसे सिखागिल बा; 19 और यदि तुहिन्हे यी पक्का बा, कि आँधर मनैनहे परमेश्वरके डगर देखाई परत। और तुँ अंधारमे रहल मनैनके लग ओजरार हस हुइतो। 20 और मूर्ख मनैनहे सिखुइया, और अपरिपक्क मनैनहे शिक्षा देथो। और तुँ यी बारेमे पक्का बतो। काकरेकी तोहाँर थेन मोशक नियम कानुन बा। तुँ सक्कु चिज पूरा रुपमे जन्थो। और तुँ ज्या कथो, उ बात बिरकुल सच्चा बा।

21 तबेकमारे तुहुरे जेने दोसुर जहनहे शिक्षा देथो, वहे शिक्षा तुहुरे अपनहे अप्निहीँ काकरे नै देथो? तुहुरे चोरीक विरोधमे प्रचार करथो, और अप्ने भर चोरी करथो। 22 तुहुरे दोसुर जहनहे व्यभिचार नै करहो कहिके सिखैथो, पर अप्ने भर व्यभिचार करथो। तुँ जे मूर्तिनहे घृणा करथो, पर तुँ मन्दिरहे अप्निहीँ लुत्थो।

23 तुहिन्हे परमेश्वरके देहल मोशक नियम कानुन जन्थुँ कहिके घमण्ड भर बा, पर मोशक नियम कानुन पालन नै करके तुँ परमेश्वरके अनादर करथो। 24 जसिके पवित्र शास्त्रमे लिखल बा, "तुहुरे यहूदिनके खराब कामके कारण गैर-यहूदी मनै परमेश्वरके नाउँक निन्दा करथाँ।"

25 मै तुहुरिन्हे कुछु कहे चाहतुँ। तुहुरिन्के खतना करगिलक फाइदा तब किल बा, जब तुहुरे मोशक नियम कानुन पालन करथो। पर यदि तुहुरे मोशक नियम कानुनमे कहल अनुसार नै करथो कलेसे खतना करगिलक यहूदिनके तुहुरे ओइनेहेन्के हस हुइतो, जेने यहूदी नै हुइँत, और जेनके खतना नै हुइल हुइतिन। 26 यदि खतना नै हुइलक मनैया मोशक नियम कानुन पालन करत कलेसे, परमेश्वर पक्कै फेन विचार करहीँ कि गैर-यहूदी मनै फेन जेनके खतना नै हुइल हुइतिन, ओइने फेन हुँकार मनै बने सेक्थाँ। 27 और जोन गैर-यहूदी मनैया शरीरमे बिना खतना हुइले यदि ऊ मोशक नियम कानुन पालन करत कलेसे, और तुहुरिन्के खतना हुइलमे फेन तुहुरे मोशक लिखल नियम कानुन पालन नै कर्बो कलेसे उ गैर-यहूदी मनैया तुहुरिन्हे दोषी ठहराई।

28 काकरेकी जब तुँ एकथो यहूदिक रुपमे जलम लेथो कलेसे बिना खतना कर्ले तुँ एकथो सच्चा यहूदी बने नै सेक्बो। 29 पर एकथो सच्चा यहूदी वहे हो जेकर मन परमेश्वरके संग सही बा। और सच्चा खतना मोशक नियम कानुन किल पालन करना नै हो; बेन यी मनके परिवर्तन हुइना हो, जोन परमेश्वरके आत्मासे पैदा हुइत। असिन मनैया मनैनसे नै होके परमेश्वरसे प्रशंसा भेटाइत।