1 शायद केऊ पुँछे सेकत, कि का यहूदिनहे गैर-यहूदिनसे धेउर कुछु फाइदा बा? 2 हाँ, एकथो यहूदी हुइलक बहुत्ते फाइदा बा। सक्कुहुनसे खास बात ते यहूदिनहे परमेश्वरके देहल मोशक नियम कानुन देगिल बतिन।

3 यदि ओइन्मेसे कौनो-कौनो यहूदिनके परमेश्वरमे विश्वासयोग्य नै हुइलाँ ते का हुइल? का ओइने परमेश्वरमे विश्वासयोग्य नै हुइलाँ ते यकर मतलब यहे हो कि परमेश्वर फेन ओइन्के लग अपन वाचा पूरा करनामे विश्वासयोग्य नै हुइहीँ? 4 हुइहीँ! बिरकुल फेन विश्वासयोग्य हुइहीँ! काकरेकी परमेश्वर हरदम सच बोल्थाँ ताकि हरेक मनै झूँटा ठहरिँत। जसिके पवित्र शास्त्रमे परमेश्वरके बारेमे लिखल बा,

"अप्नि अपन वचनमे ठिक ठहरी,

और न्याय करेबेर अप्निक जित होए।"

5 पर हमार खराब काम परमेश्वरके धार्मिकताहे ओजरारमे नानत कलेसे, हम्रे का कही? ते परमेश्वरके रिसैना और हम्रिहिन्हे दण्ड देना गलत हो का? (मै यी तर्क मनैनके हिसाबसे कहतुँ।) 6 नै हो! बिरकुल नै हो! यदि परमेश्वर यहूदिनके न्याय सहिसे नै करहीँ कलेसे पक्कै फेन गैर-यहूदिनके न्याय करे नै सेक्हीँ।

7 केऊ-केऊ कहे सेक्थाँ, "यदि मोरिक झूँट परमेश्वरके सच्चाईहे देखाइत कलेसे और हुँकिन्हे आकुर धेउर महिमा मिल्थिन कलेसे ऊ कसिके मोरिक न्याय करे सेक्हीँ, और महिन्हे एकथो पापी हो कहिके निन्दा करे सेक्हीँ?" 8 और कहिहीँ, "आऊ, हम्रे खराब काम करी ताकि यिहिसे कुछु मजा चिज होए।" अस्तेहेँके हमारमे फेन बहुत जाने दोष लगैथाँ। जोन मनै महिन्हे असिन दोष लगैथाँ, ओइने दण्ड भेटैना लायकके बताँ।

9 ओसिक हो कलेसे हम्रे का कही? का हम्रे यहूदिनके गैर-यहूदिनसे मजा बती? नै, बिरकुल फेन नै; काकरेकी हम्रे यहूदी और गैर-यहूदिनहे दुनु जहनमे मै दोष लगा सेकलतुँ कि सक्कु जाने पापके शक्तिक अधिनमे बताँ। 10 जसिके पवित्र शास्त्रमे लिखल बा,

"परमेश्वरके नजरमे केऊ फेन धर्मी नै हो, एक जाने फेन नै हुइँत।

11 जात्तिकमे सही बात का हो कहिके बुझुइया एक जाने फेन नै हुइँत।

केऊ फेन परमेश्वरहे चिन्हे नै चाहत।

12 उ सक्कु जाने परमेश्वरके थेनसे दोसुर ओहोँर खरकगिल बताँ।

ओइने सक्कु जाने परमेश्वरके लग बिनाकामक होगिल बताँ।

भलाई करुइया केऊ नै हो, एक जाने फेन नै हुइँत।

13 ओइन्के मुँह पुइन गन्धैना खुलल चिहान हस बतिन।

काकरेकी जोन बात ओइने बोल्थाँ, उ बात खराब बतिन।

ओइने अपन बोलीक प्रयोग मनैनहे धोखा देहक लग करथाँ।

और ओइन्के कहल बात नाश करना सँप्वनके बिख हस रथिन।

14 ओइन्के बोली सराप और क्रोधसे भरल बतिन।

15 ओइने हत्या करे जाइक लग झट्कार होजिथाँ।

16 ओइने जहाँ फेन जैथाँ, वहाँ विनाश करथाँ, और समस्या नन्थाँ।

17 और ओइने शान्तिसे रहे नै जन्थाँ।

18 ओइन्केमे परमेश्वरके डरे नै हुइतिन।"

19 आब हम्रे जन्थी, ज्या-जतरा मोशक नियम कानुन कहत उ मोशक नियम कानुनके अधिनमे रहुइयनहे कहत। ताकि मनै बहाना बनाई ना सेकिँत, और संसारके सक्कु मनै परमेश्वरके न्यायक अधिनमे रहिँत। 20 तबेकमारे मोशक नियम कानुनके पालन करके कौनो फेन मनैया परमेश्वरके नजरमे धर्मी नै ठहरी। काकरेकी मोशक नियम कानुन देखाइत कि हम्रे पापी बती।

21 पर आब मोशक नियम कानुन पालन बिना कर्ले परमेश्वर हम्रिहिन्हे धर्मी ठहरैथाँ। बहुत पैलेहेँ मोशक नियम कानुनके और अगमवक्तनके किताबमे लिखल बा कि कसिके हम्रिहिन्हे परमेश्वर धर्मी बनैले बताँ। 22 अथवा हम्रे येशू ख्रीष्टमे विश्वास करके परमेश्वरसे धर्मी बनाजिथि। काकरेकी परमेश्वरके लग सक्कु जाने बराबर बताँ।

23 काकरेकी सक्कु जाने पाप करल बताँ, और परमेश्वरके देना महिमासम नै पुगल हुइँत। 24 पर परमेश्वर अपन अनुग्रहसे हम्रिहिन्हे येशू ख्रीष्टके माध्यमसे हमार बहुत पापके दण्डसे छुटैले बताँ। और हम्रे बिना कुछु कर्ले परमेश्वर हम्रिहिन्हे धर्मी बनैले बताँ।

25,26 परमेश्वर ख्रीष्टहे हमार लग बलिदान हुई पठैलाँ। ख्रीष्ट अपन खुन बहैलाँ, ताकि हुँकारमे विश्वास करके हम्रे परमेश्वरके थेन जाई सेकी। और बितल समयमे परमेश्वरके सँस्सा करना और पापीनहे माफ करना सहि रहिन कहिके देखाइक लग ऊ असिके करलाँ। जब ऊ येशू ख्रीष्टहे विश्वास करुइया मनैनहे स्वीकार करथाँ, तब यिहिसे यी फेन देखाइत कि परमेश्वर सहि बताँ। 27 कलेसे, असिन का चिज बा जेकर लग हम्रे घमण्ड करे सेकी? ओकर लग ते ठाउँए नै हो। और असिक करक लग का कारण बा ते? का यी नियम कानुन पालन कर्लक ओहोँरसे हो? नै हो, बिरकुल नै हो! यी ते हम्रे येशू ख्रीष्टहे विश्वास कर्लक कारणसे किल हुई सेकत।

28 तबेकमारे हम्रे जन्थी कि हम्रे मोशक नियम कानुनहे पालन करके नै हो, पर येशू ख्रीष्टहे विश्वास करके किल परमेश्वर हम्रिहिन्हे धर्मी ठहरैथाँ।

29 परमेश्वर यहूदिनके लग किल परमेश्वर नै हुइँत, बेन ऊ गैर-यहूदिनके फेन परमेश्वर हुइँत।

30 काकरेकी परमेश्वर एक्केथो बताँ, जे खतना करुइयनहे ओइन्के विश्वाससे और खतना नै करल मनैनहे फेन ओइन्के विश्वाससे धर्मी ठहरैथाँ। 31 तब् का हम्रे यहे विश्वाससे मोशक नियम कानुनहे मेटादेथी? बिरकुल नै हो! बेन हम्रे उ मोशक नियम कानुनहे ओकर सही महत्त्व देथी।