1 तबेकमारे विश्वासेके कारण परमेश्वर हम्रिहिन्हे धर्मी ठहरैलाँ। और प्रभु येशू ख्रीष्टके हमार लग कर्लक कामसे हमार सम्बन्ध परमेश्वरसे शान्तिपूर्ण हुइल बा। 2 हमार विश्वासके कारण ख्रीष्ट हम्रिहिन्हे अनुग्रहमे नानल बताँ, जहाँ अब्बे हम्रे ठरह्याइल बती। और निर्धक्क होके और आनन्दसे हम्रे परमेश्वरके महिमामे शामिल हुइना आशामे बती।

3 अतरा किल नै हो, पर जब हम्रे समस्यामे रथी, तब फेन हम्रे रमैथी, यी जानके कि जब हम्रिहिन्हे समस्या आइत, तब हमार सहे सेक्ना क्षमता बहरजाइत। 4 काकरेकी हम्रे सहे सेकदर्थी, तबेकमारे परमेश्वर हम्रिहिन्हे स्वीकार करथाँ, ओक्रेहे कारण हमार थेन आशा बा। 5 आशा हम्रिहिन्हे निराश नै कराइत। काकरेकी जोन पवित्र आत्मा परमेश्वर हम्रिहिन्हे देले बताँ, वहे पवित्र आत्मक माध्यमसे ऊ हमार मनहे अपन प्रेमसे भरदेले बताँ।

6 काकरेकी जब हम्रे कमजोर रही, तब ख्रीष्ट परमेश्वरके तोकल समयमे अधर्मी मनैनके लग मुलाँ। 7 कौनो एकथो धार्मिक मनैयक लग मुना मुश्किल बा। शायद हुई सेकत कि केऊ जात्तिकमे कौनो मजा मनैयक लग मुना तयार होजाई।

8 पर परमेश्वर हमार लग हुँकार प्रेम यम्नेहेँ देखैथाँ, कि हम्रे पापी रहलेमे ख्रीष्ट हमार लग मुगिलाँ। 9 परमेश्वर हम्रिहिन्हे धर्मी ठहरैलाँ, काकरेकी ख्रीष्ट हमार लग मुलाँ, और हमार पापके लग अपन खुन बहैलाँ। तबेकमारे ख्रीष्ट पक्कै फेन हम्रिहिन्हे परमेश्वरके रिससे बँचैहीँ।

10 काकरेकी जब हम्रे परमेश्वरके दुश्मन रही। वहे समयमे हुँकार छावक मृत्युसे ऊ हम्रिहिन्से मिलाप करलाँ। तबेकमारे हम्रे पक्कै फेन जाने सेक्थी कि आब जब हमार मिलाप हुँकार संग होगिल बा कलेसे ऊ हम्रिहिन्हे बँचैहीँ। काकरेकी ख्रीष्ट जित्ती बताँ। 11 और अतरा किल नै हो, आब ते हमार प्रभु येशू ख्रीष्टके माध्यमसे परमेश्वरसे हमार मिलाप होगिल बा; तबेकमारे हम्रे परमेश्वरमे खुशी बती।

12 तबेकमारे एकथो मनैयासे पाप संसारमे आइल, अथवा आदमसे, ऊ सुरुक मनैया रहे जिहिहे परमेश्वर बनैलाँ। और आदम पाप कर्लक ओहोँरसे मुगिलस। असिके आदमके पाप कर्लक कारण सक्कु मनै पापी होगिलाँ, और सक्कु मनैनकेमे पाप आगिलस। 13 परमेश्वर मोशाहे नियम कानुन देनासे पहिले फेन पाप संसारमे रहे, पर यिहिहे पापके रुपमे नै गिन गिलस। काकरेकी तबसम पालन करक लग या टुरक लग कौनो नियम कानुन नै रहे।

14 तभुन फेन आदमसे लेके मोशा समके सक्कु मनै पाप करलाँ, और ओइने मुगिलाँ। जसिके आदमके पाप सक्कु मनैनहे प्रभावित कर्लिस, ठिक ओस्तेहेँके जे पाछे अइलाँ, उ येशू फेन सक्कु मनैनहे प्रभावित करलाँ।

15 पर आदमके पाप उ वरदानके हस नै हो, जोन वरदान परमेश्वर हम्रिहिन्हे अपन अनुग्रहसे देथाँ। काकरेकी एकथो मनैयक पाप बहुत मनैनके लग मृत्यु लेके आइल। पर जोन अनुग्रह और धार्मिकतक वरदान परमेश्वर हम्रिहिन्हे देले बताँ, ओकर मूल्य आदमके पापसे धेउर बा। और बहुत्ते मनै ओकर अनुभव कर्ले बताँ। और येशू ख्रीष्ट एकथो मनैयक रुपमे अपन अनुग्रहसे उ काम सम्भव करलाँ।

16 परमेश्वर जोन वरदान हम्रिहिन्हे देले बताँ, उ वरदान आदमके पाप हस नै हो। काकरेकी एकथो पाप एक्केली दण्ड नानल। पर चाहे हम्रे बहुत्ते पाप करल रलेसे फेन परमेश्वर हम्रिहिन्हे एकथो असिन वरदान देलाँ, जोन वरदान हम्रिहिन्हे हुँकार नजरमे धर्मी बनादेहल। 17 काकरेकी एकथो मनैयक पापके कारण सक्कु मनैनकेमे मृत्यु आइल। पर जेने प्रशस्तासे अनुग्रह और धार्मिकतक वरदान भेटैलाँ। ओइने सदाकालके जीवन भेटैहीँ। और येशू ख्रीष्टके संग राज करहीँ। काकरेकी ओइने हुँकारमे विश्वास कर्ले बताँ।

18 तबेकमारे जसिके एक्केथो मनैयक अपराधसे सक्कु मनै दण्डक भागिदार हुइलाँ, ओस्तेहेँके एक्केथो मनैयक धार्मिकतक कामसे सक्कु मनैनके लग परमेश्वरके नजरमे धर्मी बनाके जीवन नानत। 19 काकरेकी जसिके एक्केथो मनैयक अनाज्ञाकारितासे बहुत्ते जाने पापी बनागिलाँ, ओस्तेहेँके एक्के जहनके आज्ञाकारितासे बहुत्ते जाने परमेश्वरके नजरमे धर्मी बनाजिहीँ।

20 मनै आकुर धेउर पाप करिँत कहिके परमेश्वर मोशक नियम कानुनहे देलाँ ताकि सक्कु मनै जाने सेकिँत कि ओइने कतरा पापी रहिँत। पर जब मनै आकुर धेउर पाप करलाँ, तब परमेश्वर अपन अनुग्रह आकुर धेउर बह्रादेलाँ। 21 कि जसिके सक्कु मनै पाप करलाँ, और ओइने सक्कु जाने मुगिलाँ। ओस्तेहेँके हमार प्रभु येशू ख्रीष्टके माध्यमसे परमेश्वर अपन अनुग्रहसे सक्कु मनैनहे धर्मी बनैलाँ। और ऊ ओइन्हे सदाकालके जीवन दिहीँ।