1 हे मोरिक विश्वासी भैयो, तुहुरिन्हे पता बा; मै मोशक नियम कानुन जनुइयनसे बोलतुँ; कि जबसम मनै जित्ती रथाँ, तबसम ओइन्हे नियम कानुन पालन करे पर्थिन।

2 उदाहरणके लग, मोशक नियम कानुन कहत कि एकथो थारु मनैया जित्ति रहतसम ओकर जन्नी ओक्रेहे किल हुई परत। पर जब ओकर थरवा मुके सेक्थिस ते उ स्वतन्त्र होजाइत। 3 तबेकमारे यदि थरवा जित्ती रहलेमे ऊ दोसुर थारुक संग रहे गैल कलेसे ऊ व्यभिचारी ठहरजाइत। पर यदि ओकर थरवा मुजिहिस कलेसे ऊ ओकर कानुनसे मुक्त होजाइत। और ऊ दोसुर थारुक संग भोज करल कलेसे फेन ऊ व्यभिचारी नै हुइत। 4 तबेकमारे हे मोरिक विश्वासी भैयो, जब तुहुरे ख्रीष्टके संग मुगिल बतो कलेसे तुहुरे मोशक नियम कानुनके अधिकारके लग फेन मुगिल बतो। आब तुहुरे ख्रीष्टके हुइतो, जे मुअलमेसे जित्ती होगिलाँ ताकि तुहुरे परमेश्वरके लग फारा फरैना जीवन जिए सेको। 5 काकरेकी जब हम्रे पापी स्वभावके अधिनमे रही, तब मोशक नियम कानुनके जगैलक पापी इच्छा हमार शरीरमे मृत्युक फारा फरैना काम करतेहे।

6 पर आब हम्रे मोशक नियम कानुनके बन्धनमे नै हुइती। काकरेकी हम्रे ओकर लग मुगिली, जे हम्रिहिन्हे पहिले कैदिनके हस धारल रहे। आब हम्रे परमेश्वरके सेवा पुरान तरिकासे लिखल मोशक नियम कानुनहे मानके नै कर्थी, पर आत्मामे रहिके लावा तरिकासे सेवा कर्थी।

7 आब हम्रे का कही ते? मोशक नियम कानुन पाप हो? बिरकुल नै हो! बेन मोशक नियम कानुनके कारण मै पाप का हो कहिके जन्नु। मै जन्नु कि लालच करना पाप हो, काकरेकी मोशक नियम कानुनमे लिखल बा, "लालच ना कर।" यदि मोशक नियम कानुन नै कहत कलेसे लालच करना गलत हो कहिके मै नै जन्तुँ। 8 पाप यी आज्ञक प्रयोग करके सक्कु मेरिक लालच पैदा करल। मोशक नियम कानुन बिना ते पाप मुअल हस हो।

9 पहिले मै मोशक नियम कानुनहे बिना बुझ्ले जिअतुहुँ। पर जब मै मोशक नियम कानुनहे बुझ्नु, तब महिन्हे पाप करना इच्छा एकदमसे बहरगिल। और मै परमेश्वरसे अलग होगिनु। 10 जोन आज्ञाहे परमेश्वर मोरिक लग जिना कारण बनैले रहिँत, वहे आज्ञा महिन्हे परमेश्वरसे अलग करदेहल।

11 काकरेकी मोशक नियम कानुनके प्रयोग करके यी पाप महिन्हे धोखा देहल, और उहिएसे महिन्हे परमेश्वरसे अलग कराइल। 12 तबेकमारे मोशक नियम कानुन पवित्र बा। और आज्ञा पवित्र, धर्मी और मजा बा।

13 तब् का मोशक नियम कानुन, जोन मजा बा, उ महिन्हे परमेश्वरसे अलग कराइल? नै हो! बिरकुल नै हो! पर महिन्हे ते परमेश्वरसे अलग करुइया पाप हो। पाप वहे नियम कानुनके प्रयोग करल जोन मजा बा, और वहे मोरिकमे मृत्यु नानल। असिके पाप अपनहे देखाइल कि जात्तिकमे उ का हो, और परमेश्वरके आज्ञा देखाइल कि पाप पूरा रुपमे खराब बा। 14 काकरेकी हम्रे जन्थी कि मोशक नियम कानुन ते आत्मिक बा, पर मै एकथो मनैया हुइतुँ, और मै पापके गुलाम हुइतुँ।

15 और मै ज्या करथुँ, मै उ नै जन्थुँ। काकरेकी मै ज्या चहथुँ, मै उ नै करथुँ। पर मै वहे करथुँ, जिहिहे मै घृणा करथुँ। 16 और यदि मै ज्या नै चहथुँ वहे खराब काम करथुँ कलेसे मै मानलेथुँ कि मोशक नियम कानुन मजा बा।

17 तबेकमारे आब उ खराब काम करुइया मै नै हुइतुँ, पर मोरमे रहुइया पाप हो। 18 काकरेकी महिन्हे पता बा, कि मोरिकमे, अथवा मै पापी मनैयक स्वभावमे कुछु फेन मजा बात वास नै करत। मजा काम करना इच्छा ते मोरिकमे बा, पर उहिहे पूरा करे मै नै सेक्थुँ।

19 काकरेकी जोन मजा काम करना मै चहथुँ, उ काम मै नै करथुँ। पर जोन नै मजा मै करे नै चहथुँ, वहे काम मै करथुँ। 20 पर यदि महिन्हे ज्या करना इच्छा नै हो मै वहे काम करम कलेसे उ काम करुइया मै नै हुइतुँ, पर उ काम करुइया मोरिकमे वास करुइया पाप हो। 21 यम्ने एकथो नियम काम करल कना मै भेटैथुँ। जब मै मजा काम करना चहथुँ, तब् मै वहे काम करथुँ जोन काम खराब बा।

22 काकरेकी मै मोरिक भित्री मनसे परमेश्वरके देहल मोशक नियम कानुनमे बहुत खुशी बतुँ। 23 पर मोरिक शरीरके अङ्गमे दोसुर मेरिक नियम कानुन देखा परत। यी मोरिक मनके करे चहलक कामके विरोधमे बा, और यी मोरिक शरीरके अङ्गहे पापसे भरल इच्छक दासत्त्वमे धारत।

24 मै कतरा दुखि मनैया हुइतुँ! महिन्हे यी शरीरसे के छुटाई, जे महिन्हे परमेश्वरसे अलग लैजाइत। 25 मै परमेश्वरहे धन्यवाद देहतुँ, जे हमार प्रभु येशू ख्रीष्टके माध्यमसे महिन्हे बँचैलाँ। तबेकमारे मै अप्निहीँ अपन मनसे परमेश्वरके देलक मोशक नियम कानुनके सेवा ते करथुँ। पर मोरिक शरीरके अङ्ग भर पापके नियम कानुनके सेवा करत।