11 पर यदि येशूहे मुवलमेसे जित्ती करुइया परमेश्वरके आत्मा तुहुरिन्केमे वास करथाँ; कलेसे जे येशू ख्रीष्टहे मुअलमेसे जिवैलाँ, वहे तुहुरिन्हे तुहुरिन्के मुअल शरीरहे तुहुरिन्केमे वास करुइया आत्मक माध्यमसे जिवैहीँ।
पवित्र आत्मक माध्यमसे ख्रीष्टके उत्तराधिकारी
12 तबेकमारे हे मोरिक विश्वासी भैयो, पापी स्वभाव हम्रे आज्ञा पालन करी कना नै चाहत, पर यी पालन करना हमार कर्तव्य हो। 13 काकरेकी यदि तुहुरे अपन पापी स्वभाव अनुसार जिबो कलेसे तुहुरे परमेश्वरसे दूर होजिबो। पर यदि पवित्र आत्मक शक्तिक माध्यमसे तुहुरिन्के पापी स्वभावके चाहल अनुसार करना तुहुरे बन्द करदेबो कलेसे तुहुरे जीवन भेटैबो।
14 तबेकमारे जतरा मनै फेन परमेश्वरके आत्मक चाहल अनुसार चल्थाँ, ओइनेहेँ परमेश्वरके लरका हुइँत। 15 काकरेकी तुहुरे परमेश्वरसे डरैना दास नै बनल हुइतो, पर परमेश्वर तुहुरिन्हे अपन लर्कनके रुपमे स्वीकार कर्ले बताँ। तबेकमारे हम्रे हुँकिन्हे बाबा कहिके बलैथी।
16 पवित्र आत्मा अप्निहीँ हमार आत्मक संग गवाही देथाँ कि हम्रे परमेश्वरके लरका हुइती। 17 और यदि हम्रे लरका हुइती कलेसे उत्तराधिकारी फेन हुइती। और परमेश्वरके उत्तराधिकारी और ख्रीष्टके संग साझा-उत्तराधिकारी फेन हुइती। यदि हम्रे येशूक हस दुःख सहबी कलेसे हम्रे हुँकार महिमामे फेन शामिल हुइबी।