1-3 आब हम्रिहिन्हे कुछु चिज फेन परमेश्वरके प्रेमसे अल्गे कराई नै सेकी कलेसे, हे इजरायल देशके मनै, मोरिक यहूदी भैयन परमेश्वरसे अलग काकरे बताँ? महिन्हे ओइन्के लग बहुत दुःख लागता, और हरदम मोरिक मनमे ओइन्के लग दुःख महसुस हुइत। वास्तवमे मै अपन उप्पर अप्निहीँ आरोप लगाई सेक्थुँ, और अपन मनैनके मुक्तिक लग मै ख्रीष्टसे अलग हुई सेक्थुँ, और यकर लग मै तयार बतुँ। मै ख्रीष्टहे साँखी मानके जात्तिक कहतुँ। पवित्र आत्मा और मोरिक सोँच फेन गवाही देहतताँ कि यी सक्कु बात सच्चा हो। 4 ओइने फेन मोरिक हस इजरायल देशके मनै हुइँत, और ओइन्हे फेन अपने लरका बनाइक लग परमेश्वर रोजल बतिन। और ओइन्हे लर्कनके भेटाई परना अधिकार मिलल बतिन। ओइन्हे मोशक नियम कानुन देगिल बतिन। ओइने सच्चा तरिकासे परमेश्वरके आराधना करथाँ, और महिमा और वाचा फेन ओइनेहेन्के हुइतिन। 5 जेने येशू ख्रीष्टके पुर्खा रहिँत, ओइने यनके फेन पुर्खा हुइँत। सक्कु चिजमे राज करुइया परमेश्वरहे हरदम प्रशंसा हुइती रहे। आमेन! (यकर मतलब हुइत, अस्तेहेँ होए।)

6 पर मै असिके नै कहथुइतुँ कि परमेश्वर अपन वाचा पूरा करनामे असफल हुइल बताँ। काकरेकी इजरायलके सक्कु वंश जात्तिकमे परमेश्वरके मनै नै हुइँत। 7 अब्राहामके सक्कु वंशहे परमेश्वरके लरका नै कहे सेकजाइत। काकरेकी परमेश्वर अब्राहामहे कले बताँ, "जेने इसहाकके वंशमे जलम लेथाँ, ओइने किल तोरिक वंश मानजिहीँ।"

8 जोन वंश प्रकृतिक अनुसार जलम लेथाँ, ओइने परमेश्वरके सन्तान नै हुइँत। पर वाचक सन्तान किल अब्राहामके सन्तान मानजिथाँ। 9 काकरेकी वाचक वचन यी हो, "अइना साल मै यहे समयमे दोबारा अइम, और तब सारा एकथो छावा लरका पाई।"

10 और यहे किल नै हो, पर रिबेकक जुइकाहा लर्कनके एक्केथो बाबा रहिन, जे हमार पुर्खा इसहाक हो। 11,12 और जुइकाहा लरका जल्मनासे आघे, और ओइने कौनो मजा या खराब काम करनासे पैलेहेँ परमेश्वर रिबेकाहे कहिदेले रहिँत कि ओकर बरका छावा अपन छोट्का भैयक सेवा करी। तबेकमारे परमेश्वरके रोजाई हुँकार बोलावतमे आधारित रहिन, ना कि ओइन्के करल कुछु काममे। 13 यी ठिक ओस्तेहेँके हो जसिके पवित्र शास्त्रमे लिखल बा, "मै याकूबहे प्रेम कर्नु, पर एसावहे अस्वीकार कर्नु।"

14 आब हम्रे का कहि ते? का परमेश्वर जिही चहथाँ उहिहे चुन्थाँ ते अन्याय हुइत? नै हुइत! बिरकुल नै हुइत! 15 काकरेकी परमेश्वर मोशाहे कथाँ, "जिहिहे मै दया करना चाहम, उहिहे मै दया करम, और जिहिहे मै सोगाई चाहम, उहिएहे मै सोगैम।" 16 परमेश्वरके रोजाई यी बातमे निर्भर नै रथिन कि मनै का चहथाँ या का करना कोशिस करथाँ। तबेकमारे परमेश्वर वहे मनैयाहे चुन्थाँ, जेकरमे ऊ दया देखाई चहथाँ।

17 काकरेकी पवित्र शास्त्रमे परमेश्वर फारोहे* कलाँ, "मै तुहिहे रज्वा बनैले बतुँ, ताकि मै तोरिकमे अपन शक्ति देखाई सेकुँ, और मोरिक नाउँ संसारके सक्कु मनैनमे प्रचार हुई सेके।" 18 असिके परमेश्वर जिहिहे चहथाँ उहिहे दया करथाँ; और जिहिहे चहथाँ उहिहे जिद्दिह्या बनादेथाँ।

19 तब् कौनो मनै महिन्हे कहे सेक्थाँ: यदि असिन हो कलेसे ते परमेश्वर कसिके कहे सेक्हीँ कि हम्रे गलत बती? काकरेकी ऊ ज्या करे चहथाँ, उ चिज करक लग हुँकिन्हे केऊ फेन रोके नै सेकत। 20 अरे भैयो! तुहुरे के हुइतो जे परमेश्वरसे बहस करतो? का बनागिलक चिज अपनहे बनुइयाहे कहत, "तैँ महिन्हे असिन काकरे बनैले?" 21 का कुम्हारहे माटिमे कौनो अधिकार नै हुइतिस, कि माटिक एक्केथो धेल्किमेसे ऊ एकथो भाँरा महत्त्वपूर्ण उद्देश्यक लग और औरे भाँरा सामान्य उद्देश्यक लग बनाए?

22 परमेश्वरहे यी अधिकार बतिन कि जोन मनैनहे ऊ बनैले बताँ, ओइन्हे ऊ अपन इच्छा अनुसार ज्या चहथाँ उ करे सेक्थाँ। परमेश्वर ओइन्केमे अपन रिस देखाई चाहतिहिँत, और हरेक जहनके विरोधमे अपन शक्ति देखाई चाहतिहिँत, जेने नाश हुइना हकदार रहिँत। पर यकर बद्ला ऊ ओइन्के करल कामहे धैर्यतासे सहलाँ। 23 ऊ असिके यहे कारणसे करलाँ, काकरेकी परमेश्वर ख्रीष्टके मुलक बलिदानसे देखाई चाहतिहिँत कि ऊ कतरा महान बताँ। जब परमेश्वर उ मनैनहे दया देखैलाँ, जेनहे ऊ अपन महिमामे भागीदार हुइक लग रोजल बताँ। 24 यकर मतलब यहे हो कि चाहे यहूदी रहिँत या गैर-यहूदी, हम्रे वहे मनै हुइती जेनहे परमेश्वर रोजल बताँ।

25 गैर-यहूदिनके बारेमे होशे अगमवक्तक किताबमे परमेश्वर असिके कले बताँ,

"जेने मोरिक जनता नै रहिँत, ओइन्हे मै अपन जनता बनैबुँ,

और जिहिहे मै प्रेम नै कर्नु, उहिहे मै अपन प्रेमी कहम।

26 और जोन ठाउँमे परमेश्वर कलाँ कि तुहुरे मोरिक मनै नै हुइतो, वहे ठाउँमे जित्ती परमेश्वर ओइन्हे अपन सन्तान कहिहीँ।"

27 इजरायलके मनैनके बारेमे यशैया अगमवक्ता असिके घोषणा करत, "इजरायलके मनैनके संख्या समुन्दरके आँरितिर रहल बालुक वत्रा रलेसे फेन ओइन्मेसे थोरचे जहनहे किल मुक्ति मिल्हिन। 28 काकरेकी प्रभु झत्तेहेँ एक्केचोमे सदादिनके लग पृथ्वीमे रहल सक्कु मनैनके न्याय करहीँ।" 29 जसिके यशैया अगमवक्ता पहिले फेन कहल रहे,

"यदि सर्वशक्तिमान प्रभु हमार सन्तानमेसे गोड्गात मनैनहे किल बँचैताँ,

कलेसे हम्रे सदोम और गमोरा शहरके मनैनके हस बनजैती,

जेनहे परमेश्वर पूरा रुपमे नाश करदेलिन।"

30 हमार कहे खोज्लक यहे हो कि गैर-यहूदिनके अपनहे परमेश्वरके संग धर्मी बनैना कोशिस नै करतिहिँत। पर ओइन्के विश्वासके कारण ओइन्हे परमेश्वर धर्मी बनैलिन। 31 पर इजरायल देशके मनै मोशक नियम कानुन पालन करके परमेश्वरके संग धर्मी हुइना कोशिस करथाँ। पर ओइने धर्मी बने नै सेक्लाँ।

32 असिके काकरे हुइल? काकरेकी ओइने परमेश्वरहे विश्वास बिना कर्ले मजा काम करके किल परमेश्वरके संग धर्मी हुई खोजतिहिँत: ओइने ख्रीष्टके कारण ठेस लागके गिरहीँ। 33 जसिके पवित्र शास्त्रमे परमेश्वर कले बताँ,

"हेरो, यरुशलेम शहरमे मै एकथो असिन पठरा धारतुँ,

जोन यात्रामे मनैनहे ठेस लग्हिन।

और असिन चट्टान धारतुँ, जेकर कारण मनै गिरहीँ।

और जे ओम्ने विश्वास करी, ओकर लाज नै हुइहिस।"