1 तुहुरिन्के बिच्चेम लड़ाई और झगरा कहाँसे अइथाँ? यने उ खराब इच्छामेसे अइथाँ जोन तुहुरिन्के भित्तर लरथाँ। 2 तुहुरे इच्छा ते करथो, पर तुहुरे नै भेटैथो; तबेकमारे तुहुरे हत्या करक लग तयार बतो। और तुहुरे लालच करथो, पर तुहुरे कुछु नै भेटैथो। तुहुरे झगरा खेल्थो और लर्थो। पर तुहुरिन्हे यी सक्कु चिज यहे कारणसे नै मिलत। काकरेकी यी चिज तुहुरे परमेश्वरसे नै मंग्थो। 3 तुहुरे मंग्थो तभुन फेन तुहुरे नै भेटैथो। काकरेकी तुहुरे खराब इच्छासे मंग्थो ताकि तुहुरे अपन स्वार्थसे भरल अभिलाषाहे पूरा करे सेको। 4 हे विश्वासघाती मनै, का तुहुरे नै जन्थो, कि यी संसारहे संघरिया बनैना परमेश्वरसे दुश्मनी करना हो? तबेकमारे जे संसारके संघरिया बने चाहत, ऊ अपनेहे परमेश्वरके दुश्मन बनाइत। 5 का तुहुरे यी सम्झथो, कि पवित्र शास्त्र बिनाकामक असिके कहत? कि परमेश्वर हमार आत्माहे बनैले बताँ। तबेकमारे परमेश्वर चहथाँ कि हम्रे हुँकारे किल आराधना करी। ठिक ओस्तेहेँके जसिके एकथो हिस्का मुउइया थारु मनैया चाहत कि ओकर जन्नी उहिए किल प्रेम करिस। 6 पर परमेश्वर ते हम्रिहिन्हे असिन खराब इच्छक विरोधमे लरक लग आकुर धेउर अनुग्रह देथाँ। तबेकमारे पवित्र शास्त्रमे असिके लिखल बा, "परमेश्वर घमण्डी मनैनके विरोध करथाँ, पर नम्र मनैनहे ऊ अनुग्रह करथाँ।" 7 तबेकमारे अपनहे परमेश्वरके अधिनमे धारो। और उ सक्कु काम करनासे अस्वीकार करदेऊ, जोन काम शैतान चाहत कि तुहुरे करो। तब ऊ तुहुरिन्के थेनसे भागजाई। 8 परमेश्वरके लग्गे आऊ, तब ऊ फेन तुहुरिन्के लग्गे अइहीँ। हे पापी मनै, अपन जीवनमेसे पापहे दूर कराऊ। हे मन बदल्ती रना मनै! तुहुरे अपन मन शुद्ध बनाऊ। 9 अपन पापके कारण दुखि होऊ, शोक करो और रोऊ। तुहुरिन्के हाँसी शोकमे और तुहुरिन्के आनन्द निराशामे बदलजाए। 10 प्रभुक आघे नम्र बनो, तब ऊ तुहुरिन्के आदर करहीँ। 11 हे मोरिक विश्वासी भैयो, एकजाने दोसुर जहनके विरोधमे खराब बात ना बत्वाऊ। जे अपन विश्वासी भैयक विरोधमे खराब बात बोलत, या ओकरमे दोष लगाइत कलेसे ऊ मोशक नियम कानुनके विरोध करत। यदि तुहुरे मोशक नियम कानुनके विरोध करथो कलेसे तुहुरे मोशक नियम कानुनहे पालन करुइया नै होके मोशक नियम कानुनहे दोष लगुइया बनजिथो। 12 मोशक नियम कानुन देहुइया और न्यायधीश ते एक्केथो बताँ, जे परमेश्वर हुइँत। जेकरमे बँचैना शक्ति बतिन, और नाश करे सेक्ना फेन। पर तुँ के हुइतो, जे अपन परोसीहे दोष लगैथो?

13 आब तुहुरे सुनो, जे असिके कहत, "आज या काल हम्रे कौनो नगरमे जैबी, और वहाँ एक साल बितैबी, और व्यापार करके नाफा कमैबी।" 14 पर तुहुरे यी नै जन्थो कि काल का हुई। और सुनो, तुहुरिन्के जीवन का हो? तुहुरे ते कुहिरा हस हुइतो, जोन थोरिक बेरसम देखाइत और हेराजाइत। 15 तबेकमारे तुहुरिन्हे असिक कहे परना रहे, "यदि परमेश्वर चहिहीँ कलेसे हम्रे जित्ती रबी, और असिन-ओसिन काम करब।" 16 पर आब तुहुरे अपने योजनामे घमण्ड करथो; असिन सक्कु मेरके घमण्ड खराब रहत। 17 तबेकमारे जे भलाई करे जानके फेन नै करत, कलेसे ऊ पाप करत।