1 मै पावल यी चिट्ठी तीतस तुहिन्हे लिखतुँ। मै परमेश्वरके सेबक हुइतुँ, और येशू ख्रीष्टके निउतरह्या हुइतुँ। ख्रीष्ट महिन्हे नियुक्त कर्ले बताँ, ताकि परमेश्वरके चुनल मनैनके विश्वासहे मै बल्गर बनाई सेकुँ। और सच्चाइहे जानक लग मै ओइन्हे सहयोग करे सेकुँ। ताकि ओइने एकथो असिन जीवन जिए सेकिँत, जोन जीवनसे परमेश्वरहे खुशी मिल्थिन। 2 ओकर प्रतिफलके रुपमे ओइने परमेश्वरके संग सदाकालके जीवनके आशा करथाँ। काकरेकी परमेश्वर जे कबु झूँट नै बोल्थाँ, ऊ संसारहे बनैनासे आघे वाचा कर्ले रहिँत कि हुँकार मनै हरदम हुँकारे संग जिहीँ। 3 और एकदम ठिक समयमे परमेश्वर अपन सन्देश हम्रिहिन्हे देले बताँ, और यकर प्रचार हम्रे सक्कुहुनहे कर्थी। परमेश्वर हमार मुक्तिदाता महिन्हे यी जिम्मा देले बताँ, और महिन्हे आज्ञा देले बताँ कि यी काम मै हुँकार लग करुँ। 4 मै यी चिट्ठी तीतस तुहिन्हे लिखतुँ। तुँ मोरिक अपने छावा हस हुइतो, काकरेकी तुँ फेन ख्रीष्टमे विश्वास करथो। परमेश्वर बाबा और हमार मुक्तिदाता येशू ख्रीष्टके ओहोँरसे तुहिन्हे अनुग्रह और शान्ति मिल्ती रहे।

5 मै तुहिन्हे क्रेट टापुमे यहे कारणसे छोर्ले रहुँ, ताकि तुँ वहाँ हमार बँचल कामहे पूरा करे सेको। और जसिके मै तुहिन्हे बतैले बतुँ, ठिक ओस्तेहेँके क्रेट टापुक हर नगरमे तुँ मण्डलीक अगुवनहे नियुक्त करे सेको। 6 मण्डलीक अगुवनमे कौनो दोष नै हुई परत, और ओकर एक्केथो जन्नी रहे परत, ओइन्के लरका खराब काम नै करनाहाँ और कलक बात मन्नाहाँ विश्वासी हुई परत। 7 काकरेकी परमेश्वरके सेवा करुइया हुइलक कारण मण्डलीक अगुवा निर्दोष हुई परत। ऊ जिद्दीह्या नै हुई परत, ना ते झरकाहा हुई परत। ना मदुवा हुई परत, ना झग्राहा हुई परत, और ना ते धनसम्पत्तिक लालच करुइया हुई परत। 8 पर पहुननके स्वागत करनाहाँ हुई परत। और दोसुर जहनके भलाई चहना हुई परत। और ओकर विवेक शुद्ध हुई परत, ऊ धार्मिक मनैया हुई परत। और ऊ पवित्र जीवन जिउइया हुई परत। और ऊ अपनहे अप्निहीँ थाम्हे सेक्नाहाँ हुई परत। 9 और ऊ येशू ख्रीष्टके बारेमे विश्वासयोग्य सन्देशमे बल्गरसे विश्वास करुइया हुई परत, जोन सन्देश हम्रे उहिहे सिखैले बती। ताकि ऊ सही शिक्षाहे मानक लग दोसुर जहनहे उत्साहा देहे सेके। और गलत काम करुइयनहे यी गलत हो कहिके सम्झाई सेक्ना हुई परत।

10 मै तुहिन्हे यी बात बताइतुँ, काकरेकी बहुत्ते मनै सही शिक्षक विरोधमे विद्रोह करहीँ। यने वहे हुइँत, जेने बकवास बात सिखैथाँ, और मनैनहे धोखा देथाँ। यी बात खास करके कौनो-कौनो यहूदिनके लग जात्तिक हो, जेने विश्वासी बनगिल बताँ। यी मनैनके सम्बन्ध ओइन्से बतिन, जेने सारा विश्वासी मनै यहूदी नियमके पालन करिँत कना चहथाँ। खास करके खतना करवैना नियमके। 11 यी मनैनहे शिक्षा देना अनुमति ना देहो, काकरेकी जब यने उ बातहे सिखैथाँ जोन बात नै सिखाई परना हो। तब यने बहुत्ते परिवारके विश्वासहे नाश करदेथाँ। यने असिके यी कारणसे करथाँ ताकि यने धन-सम्पत्ति भेटाई सेकिँत। 12 क्रेट टापुक एकथो जन्नाहाँसुन्नाहाँ मनैया असिके कले बा, "क्रेट टापुक मनै जबफेन झूँट बोल्थाँ। ओइने बन्वक जानबरीनके हस व्यवहार देखैथाँ। ओइने अल्छि बताँ और जबफेन बरे धेउर-धेउर खाना खैथाँ।" 13 क्रेट टापुक बारेमे यी बात अभिन फेन सच्चा बा। तबेकमारे ओइन्हे कड़ा रुपमे चेतावनी देऊ, ताकि ओइने येशू ख्रीष्टके बारेमे सच्चा शिक्षामे विश्वास करिँत। 14 और ओइने यहूदिनके झूँटा कहानीमे ध्यान देना बन्द करिँत। और तुँ उ मनैनके शिक्षासे दूर रहो, जेने सच्चा शिक्षासे दूर होगिल बताँ। 15 जोन मनैनके मनमे कौनो फेन पाप रहल विचार नै हुइतिन, ओइन्के लग सक्कु चिज शुद्ध बतिन। पर जोन मनै खराब बताँ और येशूकमे विश्वास नै करथाँ, ओइने ज्या फेन करथाँ उ काम मजा नै रथिन। काकरेकी ओइन्के मन और दिमाग दुनु पूरा रुपमे खराब होगिल बतिन। 16 यी झूँटा गुरुनके परमेश्वरहे चिन्हल बती कहिके कथाँ। पर ओइन्के काम फरछ्वारसे देखैथिन कि ओइने हुँकिन्हे नै चिहिन्थाँ। यने घृणित और आज्ञा नै मनुइया मनै हुइँत, और यने कौनो फेन मजा काम करना लायकके नै हुइँत।