मेरमेरके समुदायनके लग शिक्षा
1 पर हे तीतस तुँ विश्वासीनहे वहे बात सिखैहो, जोन बात येशू ख्रीष्टके बारेमे सच्चा शिक्षा अनुसार सही बा। 2 बुह्राइल मनै अपनहे अप्निहीँ नियन्त्रण करे सेक्ना हुई परत, ओइने दोसुर जहनहे असिन व्यवहार देखाई परत। ताकि मनै ओइन्के सम्मान करिँत, और दोसुर जहनहे समझदारी व्यवहार करनाहाँ हुई परत। परमेश्वरकेमे ओइन्के विश्वास बल्गर हुई परत, दोसुर जहनहे सच्चाइसे प्रेम करुइया हुई परत, और सहे सेक्ना क्षमता हुई परत। 3 अस्तेके बुह्राइल जन्नी मनै फेन हर बातमे परमेश्वरहे सम्मान देना मेरिक व्यवहार देखाई परत। ओइने दोसुर जहनके निन्दा नै करनाहाँ हुई परत, और जाँर-दारु पिनाहाँ नै हुई परत। और तुँ उ जन्नी मनैनहे बताऊ कि ओइने दोसुर जहनहे मजा काम करक लग शिक्षा दिँत। 4 ताकि ओइने एकथो बरह्या नमूना देखाई सेकिँत, और जवान जन्नी मनैनहे अपन थरवा और लरकनहे कसिके प्रेम करे परत कहिके सल्लाहा देनामे योग्यक हुई सेकिँत। 5 तबेकमारे उ जवान जन्नी मनै समझदार हुई परत। अपन थरवकमे बफादार हुई परत। अपन घरहे सम्हारे सेक्ना हुई परत। दोसुर जहनहे दया देखैनाहाँ हुई परत। और अपन-अपन थरवनके अधिकारहे सम्मान करनाहाँ हुई परत, ताकि केऊ फेन परमेश्वरके सन्देशके बारेमे निन्दा करे ना सेकिँत। 6 अस्तेके जवान मनैनहे फेन तुँ सम्झाऊ कि ओइने समझदारीसे काम करिँत। 7 तुँ हरेक बातमे मजा काम करके अपनहे नमूना बनाऊ, ताकि दोसुर जाने उ नमूनक पालन करे सेकिँत। और जब तुँ दोसुर मनैनहे परमेश्वरके बारेमे सिखैथो, तब तुँ ओइन्हे मजा उपदेश देके सिखैहो। और तुँ ओइन्हे असिके सिखाऊ ताकि मनै तोहाँर आदर करिँत। 8 और तुँ उ बात सिखाऊ जोन बात सच्चा बा। और जोन बातहे तिरस्कार करे नै सेकजाइत ताकि परमेश्वरके वचनके विरोध करुइया तोहाँर दुश्मनहुँक्रिहिन्के लाज होजाइन। काकरेकी हमार विरोधमे खराब बात बत्वाइक लग ओइन्के थेन कुछु फेन नै रहिहीन।