Apocalipse 15

Taani Burccukkuwaa Abbaa Bee7aaddi

1 Taani saluwan hara wolqqaamanne maalalissiyaa mallaa be7aaddi. Xoossaa hanqquu unttunttu bollan polettiyaa diraw, wurssetha laappu boshaanna de7iya laappu kiitanchchatuu de7iino.

2 Qassikka taani burccukkuwaa abbaa malatiyaawaa tamaanna walaketteeddawaa be7aaddi. Qassi do7aa, A misiliyaanne A sunthaa payduwaa xooneeddaawantta be7aaddi. Xoossay untuntussi immeedda diithatuwaa oyqqiide, burccukkuwaa malatiyaa abbaa matan unttunttu eqqeeddino. 3 Unttunttu, Xoossaa oosanchchaa Muse mazimuriyaanne Dorssaa mazimuriyaa hawaadan yexxeeddino.

"Godaw,

Ubbaappe Wolqqaama Xoossaw,

ne kiitay gitanne maalalissiyaawaa.

Asa zariyaa ubbaa Kaatew,

ne ogii xilluwaanne tumuwaa. ✝15:3 Kes 15:1

4 Godaw, new yayyennawenne

ne sunthaa bonchchennawe oonee?

Ayissi gooppe, geeshshay ne xalalaa.

Asa zariyaa ubbay yiide,

ne sinthan goyinnana;

ayissi gooppe, ne xillo kiitay

ubbaw qoncceedda"

yaagiide yexxiino. ✝15:4 Erm 10:7; Maz 86:9

Laappu Boshaanna De7iyaa Laappu Kiitanchchatuwaa

5 Hewaappe guyyiyan, taani saluwan de7iya Geeshsha Golli dooyettowaa hewekka markkatethaa dunkkaaniyaa be7aaddi. ✝15:5 Kes 38:21 6 Laappu boshaanna de7iya laappu kiitanchchatuu Geeshsha Golliyaappe keseeddino. Unttunttu phooliide booxxiya laynuwaa mayuwaa mayyeeddino; barenttu tiraa worqqaa danccuwan yuushshi aathiide qachcheeddino. 7 De7uuwan de7iya oyddu medhetatuwaappe ittuu, medhi medhinaw gakkanaw de7iyaa Xoossaa hanqquu kumeedda laappu worqqaa keretuwaa laappu kiitanchchatoo immeedda. 8 Xoossaa bonchchuwaappenne A wolqqaappe yeedda cuway Geeshsha Golliyaa kumeedda. Laappu kiitanchchatuu aheedda laappu boshatuu polettana gakkanaw, Geeshsha Golliyaa ooninne gelanaw danddayibeenna. ✝15:8 Kes 40:34; 1Ka 8:10-11; 2Od 5:13-14; Isa 6:4