Hebreus 8

6 Shin Yesuusi gaannatiyaa caaquu kasewaappe aadhdhiyaawaadankka, aw imetteedda oosuukka unttunttuwappe aadhdhee; ayissi gooppe, he caaquu Xoossay immana geedda ubbaappe aadhdhiyaa kiitaan oosetteedda.

7 Ayissi gooppe, koyro caaquwaan balay baynnawaa gidintto, laa7entho caaquwaa koshshenna. 8 Shin unttuntta boriidde, Goday hawaadan yaagee;

"Taani Israa7eeliyaa asaannanne Yihudaa asaanna

ooratha caaquwaa caaqettiyaa gallassatuu yaanawaa. ✝8:8 Erm 31:31-34

9 He caaquu taani Gibxe gadiyaappe

unttunttu aawatuwaa kushiyaa oyiqqaade, goochcha kesseedda wode,

unttunttunna caaqetteedda caaquwaa mala gidenna.

Unttunttu ta caaquwaan ammanettibeenna diraw,

taanikka unttuntta aggaaddi.

Taani, Goday, hawaa oday.

10 Ayissi gooppe, he gallassatuwaappe guyyiyan,

taani Israa7eeliyaa asaanna caaqettana caaquu hawaa:

Taani ta higgiyaa unttunttu qofaan wothana;

qassi unttunttu wozanankka xaafana.

Taani unttunttu Xoossaa gidana; unttunttukka ta asaa gidana. 11 Unttunttuppe ooninne bare shooruwaa

woy bare ishaa,

‘Godaa era’ yaagiide tamaarissenna.

Ayissi gooppe, unttunttu naa7aappe cimaa gakkanaw ubbay taana eriino. 12 Taani unttunttu naaquwaa maarana;

unttunttu nagaraakka laa7entho hassayikke"

yaagee. 13 Xoossay ooratha caaquwaa giide haasayiyaawan koyrowaa eciseedda; qassi eciyaabayinne wuriyaabay ellekka dhayana.