Yohaannisa 9

Yesuusi Qooqa Gidiide Yeletteedda Bitaniyaa Patheedda

1 Yesuusi biidde, yelettoodeppe qooqa gidiide de7iya itti bitaniyaa be7eedda. 2 Yesuusa kaalliyaawanttu Yesuusa, "Tamaarissiyaawoo, ha bitani qooqa gidiide yelettanaadan, nagaraa ootheeddawe oonee? I ootheeddeyee? Woy A yeleeddawanttu ootheeddinoo?" yaagiide oochcheeddino.

3 Yesuusi, "Xoossaa kiitay A bollan qonccana mala qooqeeddappe attin, I woy A daayanne A aabbu nagaraa oothibeykkino. 4 Nuuni sa7ay qammennaan de7ishshin, Taana kiitteeddawaa oosuwaa oothanaw bessee. Ooninne oothanaw danddayenna qammay yee. 5 Taani alamiyaan de7aadde alamew poo7o" yaageedda.

6 Yesuusi hewaa giide, sa7an cuchcheedda; bare cuchchaani guutha urqqaa shugissiide, he urqqaani qooqa bitaniyaa ayfiyaa okkiide, 7 "Baade Saliihooma giya dagatteedda haathaan ne ayfiyaa meecca" yaageedda. "Saliihooma" giyaawe "Kiitetteeddawaa" guussaa. Hewaa diraw, bitani biide, bare ayfiyaa meecettiide, xeelliidde simmeedda.

8 Bitaniyaa shooratuunne bitani kase woossishshin be7eedda asay, "Hawe uttiide woossiyaa bitaniyaa gidenneeyee?" yaageeddino.

9 Qassi amareeddawanttu, "Hawe aattennee" yaageeddino.

Haranttu qassi, "Tuytti, hawe A malatiyaawappe attin, A gidenna" yaageeddino.

Shin bitani, "Taani aattee" yaageedda.

10 Unttunttu bitaniyaa, "Yaatina, ne ayfi waani xeelleeddee?" yaagiide oochcheeddino.

11 I zaariide, "Yesuusa geetettiyaa bitani guutha urqqaa shugissiide, ta ayfiyaa okkiide, ‘Saliihooma geetettiyaa dagatteedda haathaani baade ne ayfiyaa meecetta’ yaageedda. Taani baade meecettaade xeellaaddi" yaageedda.

12 Unttunttu A, "I haqan de7ii?" yaagiide oochcheeddino.

Bitani, "Taani erikke" yaageedda.