Marcos 2

3 Oyddu asatuu bollay sileedda itti bitaniyaa tookkiide, aakko aheeddino. 4 Asay coreedda diraw, bitaniyaa Yesuusakko afanaw unttunttoo danddayettennan ixxina, Yesuusi de7iyaa bagganna golliya qaariide, kaaraa lukkeeddino; he lukkeeddasaanna bitaniyaa I giseedda shanchchamaanna duge wotheeddino. 5 Yesuusi unttunttu ammanuwaa be7iide, he bollay sileedda bitaniyaa, "Ta na7aw, ne nagaray atto geetetteedda" yaageedda.

6 Higgiyaa tamaarissiyaawanttuppe hewaan utteedda ittu ittu barenttu wozanaani, 7 "Laa ha bitani hawaa mala iitabaa Xoossaa bolla ayissi haasayi? Xoossaa xalalaappe attin, haray oone nagaraa atto gaanaw danddayiyaawe?" yaagiide qoppeeddino.

8 Unttunttu barenttu wozanaan hewaadan qoppowaa Yesuusi ellekka bare ayyaanan eriide, unttuntta "Hinttenttu hintte wozanaan ayissi hewaadan qoppiitee? 9 Bollay sileedda bitaniyaa, ‘Ne nagaray atto geetetteedda’ giyaawe mateeyee? Woy, ‘Dendda eqqaade ne shanchchamaa tookkaade hametta’ giyaawe matee? 10 Shin taani, Asaa Na7aw, sa7aa bollan nagaraa atto gaanaw maatay de7iyaawaa taani hinttentta erissana" yaagiide he bollay sileedda bitaniyaa, 11 "Neena gay; dendda eqqa; yaataade ne shanchchamaa tookkaade ne soy ba" yaageedda.

12 Bitani ellekka denddi eqqiide, bare shanchchamaa tookkiide, asay ubbay xeellishshin biina asay ubbay maalalettiide, "Nuuni hawaa malabaa ubbakka be7i erokko" yaagiide Xoossaa galateeddino.