25 Tammanne laa77u laythaa ubbaa izi bollaappe suuthay goggiyaa itti mishiratta de7aw. 26 Cora aakimatuu izo aakimishshinkka, iza paxa kaa7ettaaddu; bare miishshaa ubbaa wurssinakka iziw haa iiteeddawaappe attin, aynne izo maaddibeenna. 27 He mishiratta Yesuusabaa sisaade, asaa giddonna Yesuusappe guyyenna yaade, A mayuwaa bochchaaddu. 28 Ayissi gooppe iza, "Taani haray atto, A mayuwaa bochchooppekka paxana" yaagaade qoppaaddu.
29 Iippe goggiyaa suuthay ellekka eqqi aggeedda; iza bare waayyiyaappe paxeeddawaa bare bollaan eraa aggaaddu. 30 Yesuusi bareppe wolqqay kesseeddawaa bare huuphew eriide, ellekka cora asaa giddon guyye simmiide, "Ta mayuwaa bochcheeddawe oone?" yaageedda.
31 Yesuusa kaalliyaawanttu A, "Asay neena sugiyaa wode be7aadde, ‘Taana oone bochcheeddawe?’ yaagay?" geeddino.
32 Yesuusi hewaa oone ootheeddenttonne be7anaw yuushshi aathiide xeelleedda; 33 shin mishiratta barew haneeddawaa eraade, yashshaa kokkoraadde yaade Yesuusa sinthan guufannaaddu; qassi tumatethaan haneeddawaa ubbaa aw odaaddu. 34 Yesuusi izo, "Ta naattee, neena ne ammanuu patheedda; saruwan ba; ne waayyiyaappenne paxa" yaageedda.
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)