1 Ano wo wahnge nobo re wahr jo sahb kꞌkunu ekpu go nsol nyi e ma wuk, eji e lꞌkꞌfab tahm.

2 Eji etib bi babenjel jo tiingi yiimi no, nne awohng awohng no lꞌsoodo, afi á bumem alum nyao, á jo nyehne erem ana fuumu no re á nyehn,*2:2 Hib 10:28 3 anv, e bahke limi renan kehm beke for, e lꞌgbake egburu eltahre ana nia bum go nkpe, ni Ntul ewahre gbo mbang tiingi?*2:3 Jon 12:47-48 Ane ba wuk-e no, ba ma tob ba tong-r re li go etingitingi.*2:3 Luk 1:2 4 Esowo tob yiimi ntianse, eji á jo tib nliingi nyi nsahm enye, fere lim ajoobo akpokosi,*2:4 Jon 10:25 fere bak ane ayare nya Etingi Etohko ana kor-e no.*2:4 1 Kor 12:8-11

5 Tibre Esowo faakem a njini nyi kpꞌbake nyi e kpꞌbungu bade kak babenjel go elwo.*2:5 2 Pit 3:13 6 Edi nwer Esowo ajehng bungu re,

"Nne awo li li nne no Esowo bahk-e jo tiiri?

Nne awo li li Mmon no nne no a bahk-e jo kunu ekpu?*2:6 1 Pit 1:24

7 A lim-e á jol rede rede sehnge babenjel mmongare ntiil,

a fere ka-e ellub, a ekpunu ji li ka ntul.*2:7 Fil 2:9-11

8 Wobbum ejum ajehng ajehng re á kunu akpade."

Ana Esowo ma yake ejum ajehng ajehng kak-e go elwo, ejumjum limm, ji á tahme sa, ji ki-e wob go elwo. Anv, e kpꞌnyehne re, ngare ka rehng nyi nsol kpee bahk-e woomo go elwo.*2:8 2 Tes 2:1-3 9 E kpꞌnyehne Jisos ji Esowo lim-e, á jol rede rede sehnge babenjel go mmongare ntiil, eji á lꞌkpo go esi ane kpee, tib go nnoobo nyi Esowo. Anv, Esowo m-e ka ellub, a ekpunu ji li ka ntul tib go erem bi á nyehne no, fere kpo.

10 Fꞌfuumu re Esowo rod erem bi Jisos nyehne no, lim-e á jol go nseenga nseenge, ye ji wahnge nsol kpee li no, ye jꞌnehm wo Esowo ko-e, lim nsol kpee, eji á lꞌko abon gbalee tahm a bo go ege ellub. Tibre Jisos wo wahnge re bo bel eltahre. 11 Ye ji kpo lim ane, bo jol ebo ebo, a ane ba á ma lim bo, bo ma jol ebo ebo, bo kpi nde na awohng. Owo wahnge á kil kpe nyaare bo, á kpꞌfere jo lung bo re abonanyehn,*2:11 Jon 20:17 12 ana á bungu no re,

"M bahke bungu bada mbing enya tong abonanee.

M bahk-a tehke go elkab aneb Esowo kpee."

13 Á kpe bung re,

"M bahke bumu Esowo go etingitingi."*2:13 Mat 27:43

Á kpe tob bung re,

"Nyehn me ga, a abon ebame ba Esowo ma-m ka."

14 Tib eji abon bao kpi ngubjing, a alung, Jisos kehm tob ba jol ana bo, fere bel ngubjing, ba rannge nnehm nyi elkv wob-e go elwo, tib go ege elkv,*2:14 Jon 12:31 15 fere tahre ane kpee yake, ba jolo aju ngare nyi bo jolo go elkpin tib go elfahle ni bo jo fahl elkv.

16 Tibre etingitingi, á kpehme kak babenjel ebo. Abon ba Ebraham ba, á kpo kak bo ebo.*2:16 Gal 3:29 17 Ano wo wahnge Esowo limi Jisos re á jol ana abonanyehn go mbang anyehng anyehng, eji á lꞌjol nkakesehk a ntubesi abalimajom no kpi ndon go elloko ni á kpꞌloko Esowo,*2:17 Hib 2:10; 4:15 fere gongo Esowo tib abiafem nya ane. 18 Tib eji yefono antahng jo nyehn erem, bo fere gar-e, anv á bahke ma kak ane ebo, ba lꞌyel go elgaare.