Lucas 10

Elgan ni li bada nne a Samaria

25 Ntꞌtibi no atahm awohng kehm lohngo ba re á ba gare Jisos. Owo á kehm bungu re, "Ntꞌtibi, m bahke limi renan, kehm bele elkpin ni li go njinanjini?"

26 Jisos kehm-e bahbe re, "Anv, jen ji bo nyono go atahm? Jen ji a kpo lꞌlung?"

27 Owo á kehm faange re, "Esowo Ntul ewa bahke jo kor-a eltim eltim ena, etohko etohko eja, eko eko eja, a ntir a ntir enya. Nne ebjing ewa jo kor-a ana ebjing eba."*10:27 Rom 13:8-10

28 Jisos kehm-e tongo re, "Wobfaange go nseenge. Jo lim ano, a bahke bele elkpin."

29 Ntꞌtibi noo sebe re á tib re, ye etingi nne ji. Owo á kehm bahbe Jisos re, "Nne awo li nne ebjing ewame?"

30 Jisos kehm-e faange re, "Nne awohng lohngo go Jeusalem, jo tahm go Jeriko. Eji á jo tahm, á kehm song kpiri awajv. Bo kehm-e yehke nsol nyi á kake no, fere dv-e, tab-e tub, á sa noongo o ana nkvne.

31 "Wo ana, ejum jo jol, nlimajom awohng jo sehnge mbang nyio. Eji á ba nyehn nne noo nong no, á kehm gbake eje, sehng nkpe a mbang nyehko tahm.*10:31 Mat 12:7

32 "Ano wo fvfo nne no kpo lim eltum go etahk Esowo kehm tob ba rehng edi jio, ba nyehn nne noo, tob gbake eje, sehng nkpe a mbang nyehko tahm eje.

33 "Nne a Samaria awohng no jo tahm eljen, kehm tob ba rehng eji nne noo.*10:33 Jon 4:9; 8:48 Eji á nyehn-e no, ndon kehm-e gbale go eltim.*10:33 Mat 9:36 34 Á kehm jeere, song kpir-e, fere kak-e akehng go alok, a alahb avain, gba-e, kehm-e rodo kunu go ege a nnyam, tahm a ne, song rehng go etahk ajehng. Owo á bohng-e no. 35 Etoono efung behko, á kehm yehke nsiring ewubu, ka nfontahk noo, kehm bungu re, ‘Jo kpur-e. Akpohko anyehng anyehng nya a lꞌkpe rannge budu, n lꞌba, m bahke feere a nya ka-a.’*10:35 1 Pit 5:2-4; Ell 22:12

36 "Anv, ane ara baa, nne awo a tiri re, á jolo nne ebjing a nne no awajv dv-e no?"

37 Owo ntꞌtibi no atahm noo kehm faange re, "Nne no á fil-e ndon wo."

Jisos kehm-e tongo re, "Song, wo tob song lim ano!"