Mateus 21

Ana Jisos yele go Jeusalem, a egburu ellub

1 Eji bo ma kabbe Jeusalem, bo kehm ba rehng go Betfage ji jolo go nnahb ewong ji bo kpo lung re Oliv. Owo Jisos kehm yehke abatꞌtoono ebe, ane na abal, 2 kehm tongo bo re, "Songen ejahbe ji li-n o mbuksong. Owo ḿ bahke nyehne mbvankang nyi bo kahn-e go eti, a mmon ewe. Fanngen bo, wahn ko bo ba ka-m.*21:2 Mak 14:13 3 Nne awohng awohng no lꞌbahb-n ejum bade ebvnkang bio, tongen ye re, ‘Nsoo kpꞌsebe bo,’ nfono ebvnkang bio bahke yake bo elwaare ka."

4 Nsol nyia limi, eji lꞌlohko jol go etingitingi ana nnyehnamahr Esowo bungu no re,

5 "Tong Sayon re,

Nyehnen,

ntul ewahne kpꞌbake go egahne.

Á li soom,

á kun go mbvankang.*21:5 Mat 11:29

Á kun go mmon a nnyam no kpo sol nsol."

6 Abatꞌtoono ebe kehm tahme, song lim ana Jisos tongo bo. 7 Bo kehm koko mbvankang nyio, a mmon ba a bo, yehke awobo ebo, kunu go bo a njahm, Jisos kehm wahre, kuumu mmon a mbvankang noo. 8 Ellong ane gbalee kehm yehke awobo ebo, yal go mbang. Ane bandiki song ja amang, jo ba yal go mbang. 9 Ellong ane ba gbo Jisos mbang, a ellong ane ba jo toon-e njahm kehm kehme elrabe re,

"Tehken mmon no Devid!

Elfuulu li ka nne no kpꞌbake go mbing nyi Jehova.

Tehken Esowo bi li go ero!"

10 Eji Jisos yele go nla Jeusalem, edi kehm kehme elvvrv na vvrv. Ane kehm kehme elbahbe re, "Nne awo ona?"

11 Owo ellong ane bao kehm jo bung re, "Jisos wo ana, ji li nnyehnamahr. Á lohng go Nasaret nyi Galili."