Mateus 15

O Ježiš del te chal štar ezera manušen

32 O Ježiš peske vičinďa peskre učeňiken a phenďa: „Pharo mange hin vaš kala nipi, bo imar trin dživesa hine manca a nane len so te chal. Na kamav len te bičhavel khere bokhalen, hoj te na odperen pal o drom."

33 O učeňika leske phende: „Khatar laha pre kada omuklo than ajci maro, hoj te das te chal kajci but dženen?"

34 „Keci tumen hin mare?" phučľa lendar o Ježiš.

„Efta the vajkeci ribici," odphende.

35 Akor phenďa le nipenge, hoj peske te bešen pre phuv. 36 Iľa ola efta mare the ola ribi, paľikerďa, phagerelas a podelas peskre učeňikenge a o učeňika denas le nipenge. 37 Chale savore a čaľile. Olestar, so ačhiľa, kidle upre efta pherde košara. 38 Savore, so chale, sas vaj štar ezera (4 000) murša, bi o džuvľa the bi o čhave.