2 Coríntios 6

1 ኑኒ ጾሳራ ኦዛይታ ጊዲዳ ማላ ኢንቴ ኤኪዳ ጾሳ ኪያቴ ጮ ሜላ ኣሾፍቴ ጊሼ ኑ ኢንቴና ዎሶስ። 2 ጾሲ፥ «ታኒ ታስ ጊጊዳ ጋላስ ኔና ሲያዲስ! ኣቲዛ ጋላስ ታ ኔና ማዳዲስ!» ጊዛ ጊሻስ ሎኦ ዎዴይ ሄኮ ሃኢ! ኣቴ ጋላሲካ ሃኢኮ!✝6፡2 ኢሳ 49፡8

3 ኑ ኦሶይ ሌቄቶንታ ማላ ኣይ ዎዴካ ኦናስካ ኑኒ ጴ ጊዶኮ። 4 ሄሳፌ ኣዲ ዋዬኔ ሜቶ ኡንኦካ ዳንዳያን ጾሳስ ኦዛ ኣሳታ ማላ ኣይ ኦጌራካ ኑናቴ ኣ ኢሞስ። 5 ኑኒ ጾሳስ ኦዛይታ ጊዲዳይሳ ቤሲዛይ ጋራፌቴን፥ ቃሼቴን፥ ሂርጋን፥ ዳቡሪ ኦሶን፥ ስኮ ዮኒኔ ጋፋና።✝6፡5 ሃዋ 16፡23 6 ሄሳካ ጌሻቴን፥ ኤራቴን፥ ዳንዳያን፥ ኪያቴን፥ ጺሎ ኣያና ካሎኒኔ ቆፔ ቆሞን ጊዶንታ ሲቆን፥ 7 ቱማ ቃላኒኔ ጾሳ ዎልቃና፤ ኑ ኢዛን ጌዴ ኦሊ ጾኒዛ ኦላ ሚሺኔ ካሜቲ ኣቲዛ ጎንዳሌይ ጺሎቴ። 8 ቦንቾስ ጊዲን ዎይኮ ካዉሻስ፥ ቆታናስ ዎይኮ ጋላታናስ ኑኒ ጊጌቲዳይታ፤ ኑኒ ቱማንቻታ ሺን ኣሴ ባሌዛይታ ጌቴቲዶስ። 9 ኑኒ ኤሬቲዳይታ ሺን ኤሬቶንታይታ ጊዲዶስ፤ ኢስቲ ሃይቂዳይታኮ ጊሺን ኑኒ ፓጻ ዶስ፤ ኣሳይ ኑና ቡኪ ቡኪንካ ኑ ሃይቂቤኮ። 10 ሙዞይ ኑና ጋኪኮካ ኡባ ዎዴ ኡፋዬቶስ፤ ኑኒ ማንቆኮ ሺን ዳሮ ማንቆታ ዱሬ ኬሶስ፤ ኑስ ኣይኮይካ ባይንዳይታ ሺን ዉሪካ ኑስ ዴስ።

11 ኢንቴኖ ቆሮንቶሴን ዲዛይቶ! ታ ካሴ ኢንቴስ ቆንጬን ዮታዲስ፤ ኑኒ ኑ ዎዚና ኢንቴና ኡባ ቤሲዶስ። 12 ኢንቴ ቃሴ ኑና ኢንቴ ሲቆ ቤሳናስ ኡዜቲዴታ ኣቲን ኑ ኢንቴና ኑ ሲቆ ቤሳናስ ኡዜቲቤኮ። 13 ኣዋይ ባ ናስ ዮቲዛ ማላ ታኒካ ኢንቴስ ኣኔ ዮታይስ፤ ኑኒ ኑ ዎዚና ኬሂ ዶይዲ ኑ ቆፋ ኢንቴስ ቆንጪሶይሳ ኢንቴካ ኑስ ሄሳ ቆንጪሲቴ።

ኣማኖንታይታራ ዙፔቴ ኣጎ

14 ኣማኖንታ ኣሳራ ጊጋይ ባይንዳ ኢሲፌቴን ኦይኬቶፍቴ፤ ጺሎቴኔ ናጋራይ ዋኒ ኢሲፌታናስ ዳንዳይዜ? ፖኦይኔ ማይ ኢሲፌ ዋኒ ዳና ዳንዳይዜ? 15 ኪርስቶሲኔ ዳቡሎሲ*6፡15 ዳቡሎሲ፡ ዳቡሎሲ ጊሪኬ ቃላራ፥ «ቤልያል» ዎይኮ «ቤልያር» ጌቴቴስ፤ ኢብራዌታ ቃላራ፥ «ቤልኦል» ጌቴቴስ። ቢርሼይ ጎኣይ ባይንዳይሳ [ኣይፌይ ባይንዳይሳ] ዎይኮ ዎጋይ ባይንዳይሳ ጉሳ። ዋኒ ጋጋናስ ዳንዳይዞ? ኣማኒዛዴይ ኣማኖንታዴራ ኣዛን ላጌታናስ ዳንዳይዜ? 16 ጾሳ ዎሳ ኬስ ኤቃታራ ኣዛ ጋጎይ ዲዜ? ጾሲካ፥

«ታኒ ታ ዱሳሶ

ታ ዴሬዛ ጊዶን ኦና፤

ታኒካ ኢስታራ ዳና፤

ኢስታስካ ጎዳ ጊዳና፤

ኢስቲካ ታ ዴሬታ ጊዳና» ጊዲ

ካሴ ዮቲዳ ማላ

ኑኒ ኢሶይ ኢሶይ

ዴኦ ጾሳ ኬታ።✝6፡16 1ቆሮ 3፡16፤ 6፡19

17 ጎዳይ፥ «ኢንቴ ኢስታ ጊዶፌ

ሻኬቲዲ ኬዚቴ!

ቱና ሚሽ ቦቾፍቴ፤

ታኒካ ኢንቴና ኤካና።✝6፡17 ኢሳ 52፡11

18 ታ ኢንቴስ ኣዋ ጊዳና፤

ኢንቴካ ታስ ኣቱማ ናይታኔ

ማጫ ናይታ ጊዳንዴታ»

ጌስ ኡባ ዳንዳይዛ ጎዳይ።✝6፡18 2ሳሜ 7፡14፤ 1ታሪ 17፡13፤ ኢሳ 43፡6፤ ኤር 31፡9