Habacuque 2

1 ታኒ ናጌ ናጊዛሶን ኤቃና፤ ሚጻ ጊምቤ ቦላ ኬዛዳ ሄን ታካና። ታ ኦይሻስ ጎዳይ ኣይ ዛሮ ኢማናኮ ታ ዲዛሶን ዳዳ ኢዛ ናጋና።

ኢምባቆ ኦይሻስ ጎዳይ ኢሚዳ ዛሮ

2 ጾሲ ኢምባቆስ፥

«ዋዪሶንታ ናባቤታና ማላ

ኔስ ኣጁታን ቆንጪዳይሳ

ሳሌዳ ቦላ

ሎኤ ዎጫ ጻፋ።

3 ኔ ኣጁታዚ

ባስ ኢሜቲዳ ዎዴ ናጌስ፤

ኢዚካ ዉርሴ

ጊሻስ ዮቴስ፥

ዎርዶቴና።

ጋምኣና ሚሳቲኮካ ናጋ፤

ኢዚ ቱማፔ ያና፤

ሙሌካ ጋምኤና።✝2፡3 ኢብ 10፡37

4 «ሄኮ ኢዚ ኦቶሬቲዴስ፤

ኢዛ ኣሞይ ሱሬ ጊዴና፤

ጺሎ ኣሲ ጊዲኮ ኣማኖን ዴስ።✝2፡4 ኦሮ 1፡17፤ ጋላ 3፡11፤ ኢብ 10፡38

5 ዱሬቴ ኣስ ባሌስ፤*2፡5 ሃይሳን ዱሬቴ ጊዛይሳ ኢሲ ኢሲ ቢርሼቲ ዎይኔ ኡሹ ጌቴስ።

ኦቶራንቻስ ሙሌካ

ሼምፖይ ዴና፤

ኢዚ ዱፎ ማላ ዮራ፤

ዎዛ ሃይቆ ማላካ

ካሎ ኤሬና፤

ዴሬ ኡባ ሺሼሲኔ

ዲኢ ኤኪ ቤስ።

6 ሂስቲን ሄሳ ማላ

ኣሳ ቦላ ቂኒኔ

ካን ኣሳይ፥ ‹ባ ካይሲ ኤኪዳ

ሻቃጬዛ ባስ ሺሺዛዴስ፥

ጌኔን ዱሬቲዛዴስ ኣዬ ኣና!

ሄሳ ኣይዴ ጋካናስ

ሺሻኔ?›

ጊ ኢዛ ቦላ ሚጬኔ?

7 ኔ ኣጮን ዬጊዳ ኣሳቲ

ኔ ቆፖንታ ኔ ቦላ

ዴንዴቴኔ?

ኢስቲ ቤጊዲ

ኔና ዳጋንቴኔ?

ሄሳፌ ጉዬ

ኔ ኢስታ ኩሼን ኩንዳና።

8 ኔ ዳሮ ዴሬ ሚሽ

ቦንቂዳ ጊሻስ

ሃንኮ ቦንቄቶንታይቲ

ኔና ቦንቃና፤

ኔ ኣሳ ሱ ጉሳዳሳ፤

ዴራ፥ ካታማኔ

ኢዛን ዲዛይታ ዉርሳ ይሳዳሳ።

9 «ዎርዶራ ባሌ ኤኪዳ ሚሻን

ባስ ዳና ኬ

ኬጺዛዴሲኔ

ባ ሞርኬ ኩሼፔ ኣታናስ

ባ ኬ ቃሶሆን ኬጺዛዴስ

ኣዬ ኣና!

10 ዳሮ ኣሳ ሼምፖይ

ያና ማላ ቃቻዳሳ፤

ኔ ኬ ቦላኔ

ኔ ቦላ ይሲዛዝ ኤሃዳሳ።

11 ጊምቤ ጊዶን ሹቺ ዋሴስ፤

ጊዶን ጎዳ ኤቂዳ ሚቲካ

ኢዛስ ዛሮ ኢሜቴስ።

12 «ሱ ጉሲዲኔ ኢታ ኦዲ

ካታማ ኤሲዛይታስ ኣዬ ኣና!

13 ኣሳ ኦሶይ ኡባይ

ታማን ጹጌታና ማላ

ዴሬይካ ሜላ ዳቡራና ማላ

ጎዳይ ኡባፌ

ዎልቃማ ጾሳይ

ኡባ ዎቤኔ?

14 ኣባይ ኩሚዛ ማላ ቢታይ

ጎዳ ጊታቴ ኤሮን ኩማና።✝2፡14 ኢሳ 11፡9

15 «ኣሳ ካሎቴ ቤያናስ

ባ ላጌታ ኡሹ

ኡሺዛዴሲኔ

ኢስቲ ኡዪዲ ማታና ጋካናስ

ዎይኔ ኡሹ ዱቂዛዴስ

ኣዬ ኣና!

16 ኔኒ ቦንቾ ጊሻስ ዬላታና፤

ሄሲካ ሃኢ ታራይ ኔስ ጊዲዳ

ጊሻስ ኡያዳ ጋንዲጋራ፤

ኔ ካሎታ።

ጎዳ ኡሻቻ ኩሼን ዲዛ

ሃንቆ ጹኣይ ኔ ቦላ ሲማና፤

ካሴ ኔስ ዲዛ ቦንቾዛ

ካዉሻቴን ላማና።

17 ኔ ሊባኖሴ ቦላ

ኦዳ ጌኔይ

ኔና ሚታና፤

ኔኒ ሜዶሳታ ይሲዳይሲ

ዛሪ ኔና ዳጋንና፤

ሄሲካ ኔ ኣሳ ሱ ጉሲዳ

ጊሻሲኔ

ዴሬታ፥ ካታማታኔ

ኢስታን ዲዛይታ

ኔ ኡባ ይሲዳ ጊሻሳ።

18 «ኣሳ ኩሼይ ማሲ ጊግሲዳ ኤቃኔ

ዎርዶ ሃሳይዛ ሚስሌስ

ኣይ ጎኣይ ዲዜ?

ሂስቲን ኢዛ ኦዳዴይ

ባርካ ባ ኦሶን ኣማኔቲዛ

ጊሻሲኔ

ኢስቲካ ሃሳያናስ ዳንዳዮንታ

ኤቃ ኦዛ ጊሻሳ።

19 ሚ፥ ‹ኔ ቤጋ!›

ሼምፖይ ባይንዳ ሹቻካ፥

‹ኔ ዴንዳ!› ጊዛዴስ ኣዬ ኣና!

ቱሙካ ኢዚ ታማርሳና

ዳንዳይዜ?

ሄኮ ኢዚ ቦላራ ዎርቃኒኔ

ቢራን ቲዬቲዴስ፤

ኢዛስ ሼምፖይካ ዴና።

20 ጎዳይ ጊዲኮ ባ ጌሻ

ኬን ዴስ።

ቢታ ቦላ ዲዛ ዴሬይ ዉሪካ

ኢዛ ሲንን ጮኡ ጎ» ጊዴስ።