1 ጺዮኔን ዛዬ ዛዪቴ፤

ጌሻ ዙማ ቦላ ዋሲቴ!

ጎዳ ዩሳ ጋላሲ

ጋኪዳ ጊሻስ

ቢታ ቦላ ዲዛይ

ዉሪካ ኮኮሮ።

2 ሄ ጋላሳይ ማኔ

ቱላላ ጋላሳ፤

ሻራኔ ሳካና

ማ ጋላሳ፤

ዎንታ ፖኦይ ኤሶን

ዙማታ ጋኪዛ ማላ

ዎልቃማ ቦሌይ

ቢታ ኡባን ማይኣና፤

ሄሳ ማላይ

ሃይሳፌ ካሴ ሃኒቤና፤

ሃይሳፌ ጉዬንካ ሃኔና።

3 ሄ ቦሌቲ ባ ሲንን ቤቲዳዚ

ኡባ ታማ ማላ ማና፤

ታማ ላጮ ማላ ጹጋና፤

ቡሮ ኢስታ ጋኮንታ ቢታይ

ኤዴኔ ጋናቴ ማላ

ጪሊላ ቢታ ሺን

ኢስቲ ጋኪ ኣዳ ቢታይ

ኣይኮይ ባይንዳ

ባዞ ቢታ ጊዳና፤

ቦሌቲ ሚሺን ኣቲዳ

ሚሺካ ቤቴና።

4 ኢስታስ ሜይ ፓራ ማላ፤

ኢስታ ቡሳይ

ኦላ ፓራ ቡሳ ማላ።

5 ፓራ-ጋሬ ጊሪሳ ማላ

ጊሪስ ሲሲሼ

ዙማታ ቦላራ ጉፔቴስ፤

ታማይ ቡራ ሚዛ ማላ

ቤቲዳ ሚሻ

ኡባ ጹጋና፤

ጊጌቲዳ ሚኖ ኦላንቻታ

ሳልፌ ማላ ጊሬቴስ።✝

6 ኢስታ ቤኢዲ ዴሬይ ኮኮራና፤

ኣሳ ኣይፌሶይ ዉሪካ

ባቦን ቦታና።

7 ኦላ ቃራታ ማላ

ጌዴ ሲን ቤቴስ፤

ኦላንቻታ ማላ

ዲርሳ ቦላራ ጉፒ ኣና፤

ዉሪካ ሲቲ ጊዲ

ጌዴ ሲን ባና፤

ባ ቢዛ ኦጌፔ ሃራ ኦጌ ቤቴና።

8 ኢሶይ ኢሳራ ሱጌቴቴና፤

ኢሶይ ኢሶይ ባ ኦጌ ዬዴና፤

ባ ሞርኬ ኦላ ሚሽ ኡባ

ይሲዲ ኣ ባና፤

ኣይኮይካ ኢስታ ቴቄና።

9 ኢስቲ ካታማዛ ዎራጃና፤

ካታማ ጊምቤዛ ቦላ

ኢስቲ ዎጻና፤

ጉፒ ጉፒዲ

ኬታ ቦላ ኬዛና፤

ካይሶ ማላ ማስኮቴራ

ሶ ጌላና።

10 ቢታይ ኢስታ ሲንን ኮኮራና

ሳሎይካ ቃጻና፤

ኣዋ ኣይፌይኔ ኣጊናይ ማና፤

ጾሊንቴይካ ፖኦ ኢሜና።✝

11 ጎዳይ ባ ኦላንቻታ

ሲንን ዳዳ ማላ ጉማና፤

ኢዛ ኦላንቻቲ ኣይ ማላ ዳሮ!

ኢዛ ኣዛዞ ኦዛይቲ

ኣይ ማላ ዎልቃማ!

ቱማፔካ ጎዳ ጋላሳይ

ኬሂ ዎልቃማ፤

ኬሂ ባቢሲዛ ሄ ጋላሳ

ዳንዳይ ኤቃናይ ኦኔ?✝

12 ጎዳይ፥ «ሃኢካ ጊዲኮ

ጾማን ዬሆኒኔ ጬጬን ኢንቴ

ኩሜ ዎዚናፔ

ሃ ታኮ ሲሚቴ።

13 ኢንቴ ኢንቴ ካዮ ቤሳናስ

ማይኦ ዳኬ ጻላ ጊዴና፤

ሄሳፌ ቦላራ ኢንቴ ዎዚናይ

ሜቂን ማሬቲቴ፤

ጎዳ ኢንቴ ጾሳይ

ኪያኔ ማሪዛ ጾሳ፥

ሃንቆስካ ኤሶቴና፤

ሜርና ሲቆን ኢዚ ዱሬኔ

ቃጻያናስ ኤሶቶንታ ጾሳ፤

ሄሳ ጊሻስ ኢንቴ

ኢዛኮ ሲሚቴ።

14 ኦኔ ኤሪዛይ ጎዳ ኢንቴ ጾሳይ

ባ ሃንቆዛ ዛሪዲ

ኢንቴና ኣንጃናኮ፥

ኢንቴካ ሄ ዎዴ ጎዳ

ኢንቴ ጾሳስ ካ ያርሾኔ

ኡሻ ያርሾ ሺሻንዴታ።

15 ጺዮኔ ዙማ ቦላ ዛዬ ፑኒቴ፤

ዴሬዛ ኣያና ሺቆስ ጼይጊቴ፤

ጾማካ ኣዋጂቴ።

16 ዴሬዛ ኡባ ኢሲ ሶ ሺሺቴ፤

ጌሻ ዱላታስ ጊግሲቴ፤

ጪማታ ጼይጊቴ፤

ናይታኔ ቡሮ ሚዛ

ናይታካ ኡባ ሺሺቴ፤

ሚሺራቲካ ሚሺራ ኬፌ

ኣቶንታ ኬዜቶ።

17 ጎዳስ ኦዛ ቄሴቲካ

ያርሾ ያርሺዛሶዛሲኔ

ኣሲ ሲሜሬቲዛሶ

ጊዶን ኤቂዲ ዬኬቶ፤

ጎዳዉ! ኔኒ ኔ ዴሬዛስ ቃታ፤

ካዎቴቲ ኢስታ ጾሳይ

ኣዋን ዲዜ?

ጊዲ ኑና ካናሲኔ

ኢስቲ ኑ ቦላ

ሚጪ ካኣና ማላ

ኔ ኢስታ ኦፋ» ጌቶ።

18 ጎዳይ ቢታይስ ዲዛ

ሚሼቴፌ ዴንዲዳይሳን

ባ ዴሬዛስ ቃቲዴስ።

19 ሄሳ ጊሻስ ጎዳይ፥

«ኢንቴ ካ፥ ዎይኔ ኡሺኔ

ዎጋራ ዛይቴ ካላና ጋካናስ

ታ ኢንቴስ ኢማናስ

ሃይሳፌ ጉዬ

ካዎቴቲ ኢንቴና

ባስ ካሳ ሚሽ ሂስታና ማላ

ታ ኢስታስ ኣ ኢሚኬ።

20 ፑዴሃፔ ያና ኦላንቻታ

ታ ኢንቴፌ ሃሳና፤

ዱጌ ባዞ ዛራ ጎዳና፤

ሲንቲ ዪዛይታ ዱጌ

ሃይቆ ኣባን ዬዳና፤

ጉዬራ ዪዛይታ ሜዲቴራኔ

ኣባን ዬዳና፤

ሄን ኢስታ ኣሃይ ዜቃና፤

ቱማፔ ታኒ ጎዳይ

ጊታ ሚሽ ኦዲስ።

21 ቢታዬ ባቦፋ፤

ጎዳይ ኔስ ኦዳ

ጊታ ሚሻ ጊሻስ ኡፋዬታ!

22 ኢንቴኖ ቢታ ቦላ ዲዛ

ዶኣቶ ባቦፍቴ፤

ካሴ ኢንቴ ኢዛን ሄሜቲዛ

ጋዴይ ጪሊሊዴስ፤

ሚቲካ ኣይፊዳ፤ ባላሴይኔ

ዎይኔ ሚይ

ኬሂ ዳሮ ኣይፊዴስ።

23 ኢንቴኖ ጺዮኔ ዴሬቶ፥

ጎዳን ኢንቴ ጾሳን

ኡፋይሲ ኦቴ፤

ኢዚ ቱሙ ፒርዲዲ

ባሳ ኢራኔ

ኦፊን ኢራ ዎጋራ ኢሚዴስ።

24 ኢንቴ ካሴ ካ ቡኪዛ ባሌን

ካ ኩማና፤

ዎይኔ ኡሺኔ

ዎጋራ ሚ ዛይቴይ

ካሴ ኢስታን ጉምኤቲዛ

ኦላታ ኩሚ ፓላሃና።

25 ሃይሳፌ ካሴ ዎልቃማ ኦላንቻ

ሚሳቲዛ ታ ዬዲዳ ኡሾ

ጫርኮ ሾጪዛ ቦሌቲ፥

ጉምባሮቲኔ ጎንዶቲ፥

ካሴ ሚዳ ካ ጊሻስ

ታ ኢንቴስ ዛራ ኢማና።

26 ኢንቴ ቡሮ ዳሮ ሚዲ ካላና፤

ኢንቴስ ማላሊሲዛ ሚሻታ

ታ ኦዳ ጊሻስ

ኢንቴ ታና ጎዳ

ኢንቴ ጾሳ ጋላታና፤

ሃይሳፌ ጉዬ ታ ዴራ

ዬላይ ጋኬና።

27 ኢስራኤሌ ኣሳቶ

ታኒ ኢንቴ ጊዶን ዲዛይሳኔ

ጎዳ ኢንቴ ጾሲ

ታና ጻላ ጊዲዳይሳኔ

ታፔ ሃራይ ባይንዳይሳ

ኢንቴ ኤራና፤

ሄሳፌ ጉዬ ታ ዴሬዛ

ዬላይ ጋኬና» ጊዴስ።

28 ጎዳይ፥ «ሃይሳፌ ጉዬ

ታኒ ኣሳ ኡባ ቦላ

ታ ኣያና ጉሳና፤

ኢንቴ ማጫ ናይቲኔ ኣቱማ

ናይቲ ቲንቢቴ ሃሳያና፤

ጪማ ኣሳይካ ኣጉሞ ኣጉሜታና፤

ዬላጋ ናቴቲ ኣጁታ ቤያና።✝

29 ሄሳካ ሄ ጋላሳታን

ታስ ኦዛ ማጫሳ ቦላኔ

ኣቱማሳ ቦላ ታኒ

ታ ኣያና ጉሳና።

30 ሳሎኒኔ ሳኣን ማላሊሲዛ

ሚሻታ ታ ቤሳና፤

ሱ፥ ታማይኔ

ጩዋ ቱሲ ቤታና።

31 ጊታ ባቢሲዛ ጎዳ ጋላሳይ

ያናፔ ካሴቲዲ ኣርሼይ ማና፤

ኣጊናይካ ሱ ኣና።✝

32 ጎዳ ሱን ጼይጊዛይ

ዉሪካ ኣታና፤

ጎዳይ ካሴ

ዮቲዳ ማላ

ጺዮኔ ዙማ ቦላፌኔ

ዬሩሳላሜፔ

ኣቶቴ ቤታና፤

ኣታናይታ ጋርሳን ጎዳይ

ጼይጊዳይቲ ዳና» ጊዴስ።✝