ኣብዲዩ ቲንቢቴ 1

ናቤ ኣብዲዩይ ቤኢዳ ኣጁታ

1 ኣብዲዩይ ቤኢዳ ኣጁታ፤

ጎዳይ ኤዶሜ ጊሻስ

ኣብዲዩ ኪቲዴስ፤

ኑ ሲዪዳ ጾሳ ኪታይ፥

«ታኒ ጾሳይ ኤዶሜ ቦላ

ሜቶ ጋና ማላ ኣዛዛዳ

ዴራ ጊዶ ኣስ ኪታዲስ» ጌስ።

2 ጎዳይ ኤዶሜስ፥

«ታ ኔና ዴሬ ኣሳፔ ላፊሳና፤

ኔኒ ኣስ ኡባን

ሌቄቲዳዝ ጊዳና።

3 ኔኖ ዛላ ጎምፓን ዲዛይሶ!

ኔ ዱሳሶ ቃሶሆን

ኬጺዳይሶ!

‹ታ ዲዛሶፔ ታና ዚቃሶ

ዎና ዳንዳይዛይ ኦኔ?›

ጊዛይሶ!

ኔ ዎዚና ኦቶሮቴ

ኔና ባሌዴስ።

4 ኔ ጎሌ ካፎ ማላ

ኬሃ ፑዴ ፒራኮካ፥

ኔ ኬ ጾሊንቴ ጊዶን

ኬጺኮካ

ታ ኔና ሄፔ

ሃ ዱጌ ዎና።

5 «ካይሶቲ ዎይኮ ቦንቂዛይቲ

ኦማርስ ዪኮ

ባስ ጊዲዛይሳ ኤኬቴስ፤

ካ ማጺዛይቲ ፒጼ ኣሼቴስ፤

ጊዶ ኣቲን ኔ ሞርኬቲ

ኢሲኖካ ኣሼቴና።*1፡5 ፒጼ፡ ፒጼ ጌቴቲዛይሲ ኣማራ ቃላን ቃርሚያ ጌቴቴስ።

6 ኢንቴኖ ኤሳዌ ዜሬቶ!

ኢንቴ ኬ ቦንቄቲዴስ፤

ሄኮ ኢንቴ ሃሮይ ዉሪ

ቦጌቲዴስ።

7 ኔናራ ጫቄቲዳ ላጌቲ

ኔና ባሌዳ፤

ኔና ዶሲዛ ላጌቲ

ኔ ቦላ ሞርኬቴን ዴንዲዳ፤

ኔ ካ ሚዳይቲ ኔስ ያርዴ

ዎዲ ኔና

ኔ ዴሬፔ ጎዲዳ፤

ጊዶ ኣቲን ኢስቲ ሄሳ ኔ ቦላ

ኦሺን ኔኒ ኤራቤካ።

8 «ሄ ዎዴ ኤዶሜፔ

ኣ ኤራንቻታ፥

ኤሳዌ ዙማፔ

ኤራቴ ይሳና።

9 ኤዶሜ ዴሬን ዴኢዛ

ኣሳቲ ዉሪካ ሃይቃና፤

ቴማኔ ኦሊዛ ዎልቃማ

ኦላንቻቲ ባባና።

ጾሳይ ኤዶሜ ቃጻዪዛ ጋሶ

10 «ኔ ኢሻ ያቆቤ ዜሬታ

ኔኒ ጌኔ ዎዳ ጊሻስ

ኔ ካዉያዳ ሜርናስ ያና።

11 ዬሩሳላሜ ሞርኬቲ

ፔንጌ ሜንዲ

ሃሪዳ ሚሽ ኡባ

ቦንቂዛ ዎዴ

ኔኒ ላንቄራ ኤቃ ጼላዳሳ፤

ሄሳ ጊሻስ ዬሩሳላሜ ቦላ

ሳማ ዬጊ ጊሼቲ

ኤኪዳይታፔ

ኔኒ ዱማታካ።

12 ዩሁዳ ዴሬን ዴኢዛ ኢሻታ ቦላ

ጋኪዳ ሜቶን ኔኒ ኡፋዬታና

ኮሼናሺን ኡፋዬታዳሳ፤

ቃሴ ኢስታ ዮኒኔ ሜቶን

ኡፋዬታናኔ ኦቶሬታና

ኔስ ቤሴናሺን ኦቶሬታዳሳ።

13 ታ ዴሬይ ይዛ ጋላስ

ኢስታ ፔንጌራ

ኔኒ ጌላና ቤሴናሺን፤

ኢስቲ ይዛ ጋላስ ሜቶቲሺን

ኔኒ ኡፋዬታና ቤሴናሺን፤

ቃሴካ ኢስቲ ይዛ ጋላስ

ኔ ኢስታ ሃሮ

ቦጋና ኔስ ቤሴናሺን።

14 ጎዴቲዲ ቆቴቲዳይታ ዎና

ኔ ኦይዱ ኦጌ ቦላ

ናጋና ቤሴናሺን ናጋዳሳ፤

ቃሴ ኣቲዳ ኣሳታ

ሜቶ ጋላስ ኔ ኣ

ኢማናስ ቤሴናሺን

ኢማዳሳ።✝1፡14 ኢሳ 34፡5-17፤ 63፡1-6፤ ኤር 49፡7-22፤ ሂዚ 25፡12-14፤ 35፡1-15፤ ኣሞ 1፡11-12፤ ሚል 1፡2-5

15 «ታ ጾሳይ ኣሳ ኡባ ቦላ

ፒርዲዛ ዎዴይ ጋኪዳ ጊሻስ

ኤዶሜ! ኔ ኦዳ

ኢታ ኦሶይ

ኔ ቦላ ሲማና፤

ሄሳ ጊሻስ ኔ ኦሶ ማላ

ኔ ኤካና።

16 ኣንጄቲዳ ታ ዙማ ቦላ

ኢንቴ ዋዬ ኡሹ ኡዪዳ ማላ

ኢንቴ ዩሾን ዲዛ ሃንኮ ዴሬይ

ዋዬ ኡሹ ኡያና፤

ኡዪዳይቲ ዉሪካ ያና።

ኢስራኤሌ ዴሬ ጾኖ

17 «ጺዮኔ ዙማን ሜቶፔ

ኣታናይ ዳና፤

ሄ ዙማያካ ጌሽ ጊዳና፤

ያቆቤ ዴሬይ ቦንቄቲዳ

ባ ሃሮ ዛሪ ኤካና።

18 ያቆቤ ዜሬቲ ታማ ማላ፥

ዮሴፌ ዜሬቲ

ታማ ላጮ ማላ ጊዲን

ኤሳዌ ዜሬቲ

ኡቱላ ማላ ጊዳና፤

ታማይ ኡቱላ ሚዛ ማላ

ያቆቤ ዜሬቲኔ

ዮሴፌ ዜሬቲ

ኤሳዌ ዜሬታ ይሳና።

19 «ዩሁዳ ዴሬፔ

ዱጌሃ ባጋራ ዲዛ

ኔጌቤ ኣሳይ ኤዶሜ

ቢታ ላታና፤

ኣርሼይ ዉሊዛ ባጋራ

ጋን ዲዛ ኣሳቲ

ፊሊስጼሜ፥ ኤፍሬሜኔ

ሳማሪያ ቢታ ላታና፤

ቃሴ ቢኒያሜ ዜሬቲ

ጋላኣዴ ቢታ ላታና።

20 ቤቲ ቢዳ ኢስራኤሌ ኣሳይ

ኣላሄ ጌቴቲዛ

ዴሬፔ ሲሚዲ

ካናኔ ቢታፌ

ሲራፍታ ጋካናስ

ዲዛ ቢታ ላታና፤

ቤቴ ቢዲ

ሲራፍታ ዴሬን ዲዛ

ኢስራኤሌ ኣሳይ

ኔጌቤን ዲዛ ካታማታ ላታና።

21 ኣቲዳ ኢስራኤሌ ኣሳቲ

ጺዮኔ ዙማ ቦላ ኡቲዲ

ኤዶሜ ዴሬ ኣይሳና፤

ቃሴ ካዎቴይካ

ጾሳስ ጊዳና» ጊ ዮቲዴስ።