Hebreus 2

10 Komagena o Gikimoi Una gena, o bi moi-moi o kia naga ḋangodu gena wosidadika de magena ma ngale Una masirete wigiliri. So itiaika la Una gena wasimaha la o Jou Yesus wisangisara ma ngale Una womatengo gena womaaka o Salamati wololoa moi, kiaka o ngeko wasidumu Awi nyawaka ma ngale ona wasisalamati so aku imakomote yasimulia Una dede ona.

11 Komagena lo o Yesus Una magena to ngone nanga dorou ḋangodu wasisaka ma ngale nanga sininga aku ḋatebi. De Una o dorou wasisisa moi de to ngone nanga sininga ma dorou lo wasisaka, so ngone inangodu kanaga nanga Baba ka womatengo. Komagena so o Jou Yesus wimaḋewa so wotemo ngone gena to Una Awi tahu ma raba moi.