1 માઅહે આમહાન ખ્રિસ્તા સેવાક એને પોરમેહેરા હારી ખોબારે ગુપ્ત હાચ્ચાં હોમજાડના કામ કોઅનારા હોમજે. 2 યોક માઅહાલ ચ્યા દોણ્યા હોપલા કામ હેય તી કામ કોઅરાહાટી ઈમાનદાર રા જોજે.

3 બાકી મા યે વાતે કાયજ ફેર નાંય પોડે, કા કાદાં માઅહું અથવા કાદો ન્યાયી માન પારખે કા આંય ઈમાનદાર હેય કા નાંય, કાહાકા આંય પોતેબી પોતાલ નાંય પારખું. 4 કાહાકા મા મોન માન કોઅયેહેજ વાતમાય દોષી નાંય ઠોરવે, બાકી યેથી આંય નિર્દોષ નાંય ઠોરુ, કાહાકા માન પારાખનારો પ્રભુજ હેય.

5 યાહાટી જાવ લોગુ પ્રભુ પાછો નાંય યેય, તાંવ લોગુ કાદાં પારાખ નાંય કોઅના, તોજ સાફ રીતીકોય ચ્યા બોદા લોકહા મોનામાઅને વિચારાહાલ પારખી જ્યાહા બારામાય બિજો કાદો ચ્યાહાન નાંય જાંએ, તોવે પોરમેહેરાપાઅને દરેકા વાહવા ઓઅરી.

6 ઓ વિસ્વાસી બાહાહાય, માયે યે વાતહેમાય તુમહેહાટી મા એને અપુલ્લોસા દાખલા રુપામાય આખહી, પવિત્રશાસ્ત્રમાય જીં લોખલાં હેય ચ્યા કોઅતા આગલા નાંય જાંહાટી તુમહાન આમહેપાઅને હિકાં જોજે, જેથી તુમા યોકા આગેવાના તુલના કોઇન ઘમંડ નાંય કોઅહા. 7 કાદાય બી તુમહાન બીજહા કોઅતા વોદારી મહત્વ નાંય દેનહા, તુમહાન બોદા કાય પોરમેહેરાપાઅને મિળલા હેય, તે તુમહાન ઘમંડ નાંય કોઅરા જોજે.

8 તુમા વિચાર કોઅતાહા કા, તુમહેપાય આત્મિક રીતે બોદ્યો વસ્તુ હેય, તુમહાપાય પેલ્લાથીજ બોદાંજ હેય, તુમહાય આમહે વોગાર રાજા હારકા શાસન કોઅના સુરુ કોઅય દેનલા હેય, આમહાન ખુશી ઓઅલી હેય કા હાચ્ચાંજ તુમા રાજા હારકા શાસન કોએ, જેથી આમા બી તુમહેઆરે શાસન કોઅય હોકજે. 9 માન તે ઈ લાગહે કા પોરમેહેર આમા પ્રેષિતાહાલ બોદહા પાછે ચ્યા લોકહા હારકો ઠોરાવ્યાહા, જ્યાહાન મોરણા આગના ઓઈ ચુકહી, કાહાકા આમા દુનિયા લોકહા એને હોરગા દૂતહાહાટી યોકુજ તમાશો બોની ગીયહા.

10 લોક આમહાન મૂર્ખ હોમાજતાહા, કાહાકા આમા ખ્રિસ્તા પ્રચાર કોઅજેહે, બાકી તુમા તુમહે બારામાય ઈ હોમાજતાહા કા આમા બુદ્ધિમાન વિસ્વાસી હેય, આમા નોબળા હેજે એને તુમા બળવાન હેય, તુમહાન આદર મિળી રિઅલો હેય, એને આમહે તિરસ્કાર ઓઅય રિઅલો હેય. 11 આમા આજેલોગુ બુખા પીહ્યા એને જુનેજ ફાટલે ડોગલેં પોવજેહે, માર ખાજહે, એને બોટાકતા ફિરજેહે આમહાવોય આમહે રોઅના ગોએ બી નાંય હેય.

12 પોતે પાલન-પોષણ કોઅરાહાટી આમા બોજ મેઅનાત કોઅજેહે, જોવે લોક આમહે વિરુદમાય બોલતાહા તોવે આમા ચ્ચાહાન બોરકાત દેજહે, એને ચ્યે સતાવ કોઅતેહે, એને આમા સહન કોઅજેહે. 13 જોવે આમહાન બોદનામ કોઅતાહા, તોવે આમા ચ્યાહાઆરે નમ્ર બોનીન વાત કોઅજેહે, ઓલે લોગુ કા આમીબી લોક આમહે આદર નાંય કોએ, બાકી ચ્યે આખતેહે આમહે યા દુનિયામાય કાયજ કિંમાત નાંય હેય.

14 આંય તુમહાન શરમિંદા કોઅરાહાટી યો વાતો નાંય લોખું, બાકી મા હેતુ તુમહાન ચેતાવણી દેઅના હેય, કાહાકા તુમા મા પોહહા હારકે હેય જ્યાહાલ આંય હાચ્ચાંજ પ્રેમ કોઅતાહાંવ. 15 કાહાકા ઓઅય હોકે તુમહે દોહો ઓજાર હિકાડનારા ઓઅરી બાકી આંયજ તુમહે આબહા હારકો હેય, કાહાકા આંય પેલ્લો માઅહું હેય જો તુમહેપાય ખ્રિસ્તા હારી ખોબાર લેય યેનો એને ચ્યા લીદે તુમા ઈસુવોય બોરહો કોઅતેહે. 16 યાહાટી આંય તુમહાન વિનાંતી કોઅતાહાંવ, કા તુમા મા દાખલા અનુકરણ કોઆ.

17 યાહાટી કા માયે તિમોથીલ જો પ્રભુમાંય મા વાહલો એને વિશ્વાસયોગ્ય પોહો હારકો હેય, તુમહેપાય દોવાડયોહો તો તુમહાન ઈસુ ખ્રિસ્તામાય જીવના તરીકા બારામાય આખી, જેહેકેન આંય બોદે જાગે બોદ્યેજ મંડળીમાય સંદેશ દેતહાવ. 18 તુમહે વોચમાય કોલહાક લોક એહેકેન વિચાર કોઅતાહા કા આંય તુમહાન મિળાં નાંય યાંવ, યાહાટી ચ્યા ઘમંડી બોની ગીયહા.

19 બાકી પ્રભુ ઇચ્છા ઓરીતે આંય જલદીજ તુમહેપાય યીહીં, એને નાંય કેવળ ઓલહાં કા ઘમંડી લોક કેહેકેન વાત કોઅતાહા, બાકી ચ્યાહા સામર્થ બી આંય જાંઆઈ લિહીં. 20 કાહાકા પોરમેહેરા રાજ્ય તે શબ્દાહામાય નાંય બાકી સામર્થ્યા કામહામાય હેય. 21 તુમહે કાય ઇચ્છા હેય કા જોવે આંય તુમહેપાય યાંવ તે કાય કોઉ? જો તુમહાય આમીબી ખારાબ કામે કોઅના બંદ નાંય કોઅલા ઓરી આંય તુમહાન મોઠો ફોટકો દિહી, એને તુમહાય ખારાબ કામે કોઅના બંદ કોઅલા ઓરીતે આંય તુમહેઆરે પ્રેમ એને નમ્રતાકોય વ્યવહાર કોઅહી.