1 કરિંથીઓને પત્ર 6

વિસ્વાસ્યાહાવોય ફિરાદ કોઅના

1 જો તુમહેમાઅને કાદાબી બિજા વિસ્વાસી માઅહા આરે જોગડો કોઅહે, તે ચ્યે વાતે ન્યાય કોઅરા અવિસ્વાસી લોકહાપાંય કોચરીમાય નાંય જાં જોજે, બાકી તુમહે મંડળીમાય પવિત્ર લોકહાન ચ્યે વાતે ન્યાય કોઅરાહાટી આખા જોજે, કા તુમહામાઅને કું બરાબર હેય. 2 તુમા નોક્કી જાંઅતેહે કા પવિત્ર લોક દુનિયા લોકહા ન્યાય કોઅરી, એને જો તુમહાન દુનિયા લોકહા ન્યાય કોઅના હેય, તે તુમહાય તુમહે વાહનામાય વાહના જોગડાહા ન્યાય કોઅના લાયકે ઓઅરા જોજે. 3 તુમા નોક્કી જાંઅતેહે કા આપા હોરગ્યા દૂતહા ન્યાય કોઅહુ, તે તુમા દુનિયામાય જીવના વાતહેબારામાય ન્યાય કોઅય હોકતેહેં.

4 બાકી તુમહેમાય જીવના વાતહેબારામાય જોગડો ઓઅહે, તે તુમહાય ઓહડા લોકહાન ન્યાય નાંય કોઆડના જ્યા મંડળીમાય કાયજ કામા નાંય હેય. 5 આંય તુમહાન શરમાવાહાટી ઈ આખતાહાવ, કાય તુમહેમાય યોકબી ઓકલ્યેવાળો નાંય મીળે, જો આપહે વિસ્વાસી બાહાહા ન્યાય કોઅય હોકે?