ખ્રિસ્તા પાછા યેયના
13 ઓ વિસ્વાસી બાહાહાય, આમહે મોરજી હેય કા જ્યેં મોઅઇ ગીયે ચ્યા બારામાય તુમહાન જાણ જોજે, એહેકેન નાંય ઓઅય કા તુમહાન ચ્ચાહા રોકા શોક કોઆ જ્યાહાન આશા નાંય હેય, કા ચ્યે મોઅલા માઅને પાછો જીવતે ઓઅનારે હેય. 14 કાહાકા જો આપા બોરહો કોઅજેહે કા ઈસુ મોઅયો એને પાછો જીવી ઉઠયો, તો તેહેકેન જ્યેં ઈસુવોય બોરહો કોઅતા મોઅઇ ગીયે, પોરમેહેર ચ્યાહાનબી ઈસુઆરે પાછો લેય યી. 15 આમહાન જીં પ્રભુ ઈસુ પાઅને શિક્ષા મિળલી હેય, ચ્યાપરમાણે આમા તુમહાન આખજેહે કા, આપા, જ્યેં જીવતે હેય, એને જ્યેં પ્રભુ ઈસુ પાછા યેયના લોગુ જીવતે રોય, તો જ્યેં મોઅઇ ગીઅલે હેય ચ્યાહા કોઅતા પેલ્લા ઈસુઆરે નાંય મિળહું.
16 કાહાકા પ્રભુ ઈસુ પોતે હોરગામાઅને યેઅરી, તો ઉચા શબ્દા હાતે આદેશ દેઅરી એને લોક યોક મુખ્ય હોરગા દૂતાલ હાદતા વોનાયી એને પોરમેહેરા તુતારી ફુકલી જાય, એને જ્યેં ખ્રિસ્તાવોય બોરહો કોઅતા મોઅઇ ગીઅલે હેય, ચ્યે પેલ્લે જીવી ઉઠી. 17 ચ્યા પાછે આપા જ્યા જીવતા એને બોચી રહું, આપા ચ્યાહા આરેજ વાદળાવોય ઉઠાવાય જાહાંવ, એને આકાશામાય પ્રભુ ઈસુઆરે મિળહું, એને ચ્યા સમયાપાઅને આપા સાદા પોરમેહેરાઆરે રોહુ. 18 યાહાટી યે વાતે થી તુમા યોકબિજાલ દિલાસો દેતા રા.