36 વાટે ચાલતા-ચાલતા ચ્યા યોકા તોળાવા પાહી પોઅચ્યા, તોવે નપુસકે આખ્યાં કા, "દેખ ઈહીં તોળાવા હેય, આમી માન બાપતિસ્મા લેયના કાય વાંદો હેય" 37 ફિલિપે આખ્યાં, "જોવે તું પુરાં મોનાકોય બોરહો કોઅતોહો તે લેય હોકતોહો" ચ્યાય જોવાબ દેનો, "આંય બોરહો કોઅતાહાંવ કા ઈસુ ખ્રિસ્ત પોરમેહેરા પોહો હેય." 38 તોવે ચ્યેય રથ ઉબો કોઆ આગના કોઅયી, ફિલિપ એને નપુસક બેની જાંઆ તોળાવામાય ઉતી પોડ્યા, એને ફિલિપે નપુસકાલ બાપતિસ્મા દેના.

39 જોવે ચ્યા તોળાવામાઅને બાઆ યેના, તોવે પ્રભુ આત્મા ફિલિપાલ ઉઠાવી લેય ગીયો, એને નપુસકે ચ્યાલ પાછો નાંય દેખ્યો, એને નપુસકાલ પોરમેહેરાય બોચાવી લેદો યાહાટી આનંદ કોઅતો તો ચ્યા દેશામાય પાછો જાતો રિયો.