યોહાન 6

પાચ ઓજાર લોકહાન ખાવાડના

1 યો વાતો જાયો પાછે ઈસુ ગાલીલ દોરિયા એટલે તીબીરીયાસ દોરિયા ચ્યેમેરે ગીયો. 2 યોક મોઠી ગીરદી ચ્યા પાહલા ચાલી, કાહાકા જ્યા નોવાયે ચમત્કાર તો બિમાર્યાહાવોય કોઅતો આતો, ચ્યે ચ્યાહાન એઅતે આતેં. 3 તોવે ઈસુ ડોગાવોય ચોડીન ચ્યા શિષ્યહાઆરે તાં બોઠો. 4 એને યહૂદીયાહા પાસ્કા સણા વોછા દિહી બાકી આતા.

5 તોવે ઈસુવે નોજાર કોઅયી કા ચ્યાપાય બોજ માઅહા ટોળો યેતો દેખ્યો, એને ચ્યે ફિલિપાલ પુછ્યાં, "યે બોદે ખાય હોકે ચ્યાહાટી આપા કેછને બાખે વેચાત્યો લેય યાહુ?" 6 ઈસુય ચ્યા પરીક્ષા કોઅરાહાટી એહેકોય આખ્યાં, કાહાકા તો પોતે જાંઅતો આતો કા તો કાય કોઅરી. 7 ફિલિપે જાવાબ દેનો, "ચ્યાહામાઅને બોદહાલ વોછા-વોછા દેય તેરુંબી બોસો દીનારા (૨૦૦ દીનાર એટલે બેન હોવ દિહાહા કાંબારાં) બાખે ચ્યાહાન નાંય ફુગી." 8 ચ્યા શિષ્યહા માઅને સિમોન પિત્તરા બાહા આંદ્રિયાસાય ઈસુલ આખ્યાં. 9 "ઈહીં યોક પોહો હેય, ચ્યાપાય પાચ જુવાયે બાખે એને બેન માછલે હેય બાકી ઓલા લોકહાન ઈ કેહેકે ફુગી?" 10 તોવે ઈસુવે આખ્યાં, "માઅહાન બોહતા કોઆ" ચ્યા જાગામાય બોજ ગાહીયા આતા, તોવે માઅહે ગાહીયાવોય બોહી ગીયે, ચ્યાહામાય માટડા આસરે પાચ ઓજાર આતા. 11 તોવે ઈસુવે ચ્યો પાચ બાખ્યો લેદ્યો, એને આભાર માનીન ગાહીયાવોય બોઠલા લોકહાન વાટી દેન્યો, તેહેકોઈન માછલે જોલા માગેત તોલા ચ્યાહાન વાટી દેના. 12 જોવે ચ્યે ખાયન દારાઈ ગીયે, પાછે ઈસુવે ચ્યા શિષ્યહાન આખ્યાં, "ઉગારલા કુટકા યોખઠા કોઆ, કા કાય નોકામ્યા નાંય ઓઈ જાય." 13 યાહાટી ચ્યાહાય યોખઠા કોઅયા, તોવે પાચ બાખહી માઅને ઉગારલા કુટકાહા બાર ટોપલ્યો બોઆયો. 14 લોકહાય ઓ ચમત્કાર એઇન આખ્યાં, "દુનિયામાય જો ભવિષ્યવક્તા યેનારો હેય તો નોક્કી ઓજ હેય."