1 પાછે ઈસુવે પોતાના શિષ્યહાન બી ઓ દાખલો આખ્યો, "યોક મિલકાતવાળા માઅહા યોક કારબારી આતો, લોકહાય માતલા માઅહા હામ્મે કારબારી વોય દોષ લાવ્યો કા ઓ તો બોદી મિલકાત ખોરચી ટાકહે. 2 તોવે માલિકાય કારબાર્યાલ હાદિન પુછ્યાં, ઈ કાય હેય જીં આંય તો બારામાય વોનાય રિયહો? તુયે મા પોયહા કાય કોઅયા ચ્ચાહા બોદો ઇસાબ દે, કાહાકા તું આગલા કારબારી નાંય રોય હોકે. 3 તોવે કારબારી વિચાર કોઅરા લાગ્યો, આમી આંય કાય કોઉ? કાહાકા મા માલિક આમી કારબારી કામાવોયને કાડી રિયહો, માન શરીરાકોય તે કામ ગાઠી નાંય પોડે, એને માગી ખાંહાટી માન શરામ યેહે. 4 આમી આંય હોમજી ગીયો, કા કાય કોઅહી, જોવે આંય કારબારી કામાવોને છુટો ઓઈ જાવ તોવે લોક માન મોદાત કોએ. 5 તોવે ચ્યાય પોતાના માલિકા કોરજાવાળહાન યોક-યોક કોઇન હાદ્યા એને પેલ્લાનેજ પુછ્યાં, તોવોય મા માલિકા કોલહો કોરજો હેય? 6 ચ્યાય આખ્યાં, હોવ મણ *16:6 હોવ મણ લગભગ 3700 લીટર પરમાણે હેય જૈતુન જાડા તેલ તોવે ચ્યાય ચ્યાલ આખ્યાં, ‘પોતાના ઇસાબા ચોપડા લે એને બોહીન તારાત બિજા ખાતામાય બોદલીન પોચહા મણ લોખી દે.’ 7 પાછે ચ્યાય બિજાલ પુછ્યાં, ‘તોવોય કોલો કોરજો હેય?’ ચ્યાય આખ્યાં, ‘હોવ મણ*16:7 હોવ મણ લગભગ 20,000 કિલો પરમાણે હેય. ગોંવ,’ તોવે ચ્યાય ચ્યાલ આખ્યાં ‘પોતાના ઇસાબા ચોપડા લેઈને એંશી મણ લોખી દે.’"

8 "માલિકાય ચ્યા અન્યાયી કારબાર્યાલ આખ્યાં, તુયે બોજ હુશારી કોઇ કામ કોઅલા હેય, એહકોયજ યા દુનિયા લોક ચ્યાહા સોમાયા લોકહાઆરે વ્યવહારા માય, ઉજવાડા લોકહા કોઅતા બોજ ચતુર હેય. 9 એને આંય તુમહાન આખહુ કા દુનિયાદારી રીતે કામાવલા મિલકાતેકોય તુમહેહાટી દોસ્તાર બોનાવી લા તે જોવે મિલકાત નાંય રોય, તે ચ્યા તુમહાન હોરગામાય આવકાર કોઅરી જા તુમા સાદામાટે જીવતા રોહા. 10 જો વાહની-વાહની વાતમાય ઈમાનદાર હેય, તો મોઠી વાતમાય બી ઈમાનદાર હેય, એને વાહની વાતમાય બેઈમાન હેય, તો મોઠી વાતમાય બી બેઈમાન રોય. 11 યાહાટી જોવે તુમા દોરતીવોય કામાવલા મિલકાત્યે માય ઈમાનદાર નાંય રોયા, તે હોરગામાઅને મિલકાત તુમહાન કું હોઅપી? 12 એને જોવે તુમા બીજહા મિલકાતીવોય ઈમાનદાર નાંય ઠોરહા, તે જીં તુમહે હેય તી તુમહાન કું દેઅરી?

13 કાદાબી માઅહું યોકાજ સમયે બેન દોણહ્યા ચાકરી નાંય કોએ, કાહાકા તો યોકા વિરુદ કોઅરી ને બિજાલ પ્રેમ કોઅરી, નાયતે યોકા આરે હારો ચાલીન બિજા આરે નાંય હારો ચાલી, તુમા પોરમેહેરા એને મિલકાત યા બેન્યહા ચાકરી નાંય કોઅય હોકે."

14 પોરૂષી લોક જ્યા લોબી આતા, યો વાતો વોનાયને ઈસુ મશ્કરી કોઅરા લાગ્યા. 15 ઈસુવે ચ્યાહાન આખ્યાં, "તુમા તો માઅહા હામ્મે પોતાનાલ હાચ્ચાં દેખાડતાહા, બાકી પોરમેહેર તુમહે મન જાંઅહે, કાહાકા જીં વસ્તુ તુમહે નોજરેમાય મોહત્વા હેય, તીં પોરમેહેરા નોજરેકોય એઅના ખારાબ હેય."

16 જાવ લોગુ યોહાન બાપતિસ્મા દેનારો યેનો, તાંવ લોગુ મૂસા નિયમશાસ્ત્ર એને ભવિષ્યવક્તા વચન તુમહે માર્ગદર્શક રિયા; બાકી આમી પોરમેહેરા રાજ્યા હારી ખોબાર આખલી જાહે, એને બોદેજ યામાય ભાગીદાર ઓઅતેહે. 17 આકાશ એને દોરતી ટાળાય જાયના નિયમશાસ્રા યોક બિંદુ મિટાય જાયના કોઅતા હેલ્લા હેય. 18 "જો કાદો માટડો ચ્યા થેઅયેલ ફારગાતી દેયન બિજ્યે થેએયે આરે વોરાડ કોએ, તે તો વ્યબિચાર કોઅહે, એને જો કાદો માટડો ફારગાતી દેનલ્યે થેઅયેઆરે વોરાડ કોઅહે, તે તેરુંબી વ્યબિચાર કોઅહે."

19 "યોક મિલકાતવાળો માઅહું આતો, તો બોજ મોઅગેં ડોગલેં પોવતો આતો એને રોજ દિને હારાં-હારાં ખાઅના ખાતો આતો એને બોજ હારો રોતો આતો. 20 લાજરસ નાંવા યોક બીખારી માઅહું આતો, ચ્યા શરીર ફોડહાકોય બોઆલા આતા,, ચ્યાલ લોક મિલકાતવાળા માઅહા બાઆપુર થોવી દેતા આતા. 21 તો બોજ બુખો આતો ઓલે લોગુ કા તો ઇચ્છા રાખે, મિલકાતવાળા માઅહા પાયને ખાયન વોદી ગીઅલા ખાઅનાકોય બુકો બોએ. ઈહીં લોગુ કા કુત્રે બી યેયન ચ્યા ફોડહાન ચાટતે આતેં. 22 એને યોક દિહી એહેકેન બોન્યા કા બીખારી લાજરસ મોઅઇ ગીયો, એને હોરગા દૂતહાય ચ્યાલ આબ્રાહામાઆરે રાંહાટી લેય ગીયા, એને યોક દિહી મિલકાતવાળા માઅહું બી મોઅઇ ગીયો, એને ચ્યાલ દાટી દેનો. 23 એને તો અધોલોકમાય પીડામાય પોડયો, તોવે ચ્યાય ઉચે એઅયા, એને દૂરને આબ્રાહામા પાહી લાજરસાલ દેખ્યો. 24 તોવે ચ્યાય બોંબલીન આખ્યાં, ‘ઓ આબા આબ્રાહામ, મા વોય દયા કોઇન લાજરસાલ દોવાડી દે, યાહાટી કા તો પોતાની આંગઠી પાઅયામાય બુડવીન મા જીબેલ હેળી કોઅય, કાહાકા આંય યા આગડામાય તોડપી રિયહો.’ 25 બાકી આબ્રાહામાય આખ્યાં, ‘ઓ પોહા, યાદ કોઓ કા તું દોરતીવોય રોઇન પોતાના જીવનાહાટી વાન્યો-બાત્યો વસ્તુહુ લાભ લી ચુકયોહો, એને તેહેકોયજ લાજરસાલ બોદ્યો ખારાબ વસ્તુ મિળ્યો, બાકી તો આમી શાંતી પામી રિયહો, એને તું તોડપી રિયહો. 26 એને ઈ બોદી વાતહેલ છોડીન આમહે એને તુમહે વોચમાય યોક મોઠો ખાડો ઠોરાવલો ગીયહો, કા કાદો ઇહિને તુમહેપાય યા માગે તો નાંય જાય હોકે એને જો કાદો તુમહે પાયને આમહેપાય યા માગે તો નાંય યી હોકે.’ 27 ચ્યાય આખ્યાં, ‘તે ઓ આબા, આંય તુલ વિનાંતી કોઅહુ કા, તું લાજરસાલ મા આબહા ગોઓ દોવાડ. 28 કાહાકા મા પાચ બાહા જીવતા હેય; કા તો ચ્યાહાન ઈ ચેતાવણી દેય, એહેકોય નાંય બોના જોજે કા ચ્યાબી યે પીડા જાગામાય યેય પોડે.’ 29 આબ્રાહામાય ચ્યાલ આખ્યાં, ‘ચ્યાહાન ચેતાવણી દાંહાટી મૂસા નિયમશાસ્ત્ર એને ભવિષ્યવક્તાહા ચોપડી હેય, તો ચ્યાહામાઅને વોનાયને ચ્યા પાલન કોએ.’ 30 ચ્યાય આખ્યાં, ‘નાંય, ઓ આબા આબ્રાહામ, જો કાદો મોઅલા માઅને ચ્યાહા પાહી જાયને ચ્યાહાન ચેતાવણી દેય, તોવે ચ્યા ચ્યાહા પાપ કોઅના બોંદ કોઅઇ દી.’ 31 આબ્રાહામાય ચ્યાલ આખ્યાં, ‘જોવે તો મૂસા નિયમશાસ્ત્ર એને ભવિષ્યવક્તા ચોપડીમાઅને આગના નાંય માને, તે જો મોઅલા માઅને બી કાદો જીવી ઉઠી તેરુંબી ચ્યા બોરહો નાંય કોઅરી.’"