Marcos 5

બુત લાગલા માઅહાન ઈસુ હારો કોઅહે

1 પાછે ઈસુ એને ચ્યા શિષ્ય દોરિયા ચ્યેમેરે ગીરાસેનિયા લોકહા ભાગામાય જાય પોઅચ્યા. 2 જોવે ઈસુ ઉડીમાઅને ઉત્યો, તોવે યોક માઅહાન બુત વોળાગલા આતો તો તારાતુજ માહણાહા માઅને નિંગીન ચ્યાલ મિળ્યો. 3 તો માહણામાય રોતો આતો, કાદાં માઅહું ચ્યાલ બાંદી નાંય હોકે, ઓલાકા હાકળે કોઅઇ બી નાંય બાંદાય. 4 કાહાકા ચ્યાલ ગેડી-ગેડી બેડયેહે એને હાંકળેહેકોય બાંદેત બાકી તો હાંકળા તોડી ટાકે એને બેડયે ટુકડા-ટુકડા કોઅઇ દેય એને કાદાં માઅહું ચ્યાલ બાંદી નાંય હોકે. 5 એને કાયામ રાતદીહી તો માહણામાય ફીએ એને ડોગાહામાય બોંબલ્યા કોએ, એને તો દોગડાહા કોઇન ચ્યા શરીરાલ વાડી લેતો આતો.

6 જોવે ચ્ચાય દુઉરે ઈસુલ દેખ્યો, તોવે તો દાંહાદી યેનો એને ચ્યા પાગે પોડયો, 7 એને બોજ જોરખે બોંબલીન આખ્યાં, "ઓ ઈસુ, પરમપ્રધાના પોરમેહેરા પોહા, તુલ માયેપાઅને કાય જોજે? પોરમેહેરા નાંવા કોસામ લેતહાવ કા તું માન આબદા મા દેહે." 8 કાહાકા ઈસુવે ચ્યાલ પેલ્લાજ આખ્યેલ, "ઓ બુતડાહાય યામાઅને નિંગી જાં." 9 તોવે ઈસુવે ચ્યાલ પુછ્યાં, "તો નાંવ કાય હેય?" ચ્યેય આખ્યાં, "આમે નાંવ સેના હેય, કાહાકા આમા બોજ જાંએ હેજે." 10 એને ચ્યાહાય ચ્યાલ બોજ રાવ્યાં કોઅયી કા "આમહાન યા ભાગામાઅને મા દોવાડેહે."

11 આમી તાં ડોગાવોય ડુકરાહા યોક મોઠો ટોળો ચોઅયા કોએ. 12 તોવે બુતડાહાય ઈસુલ ઓહડી રાવ્યાં કોઇન આખ્યાં, "આમહાન ડુકરાહામાય દોવાડ ચ્યાહામાય નિંગી જાહું." 13 ઈસુવે ચ્યાહાન પરવાનગી દેની, તોવે બુતડે નિંગીન ડુકરાહામાય ઉરાય ગીયે, એને બોદો ટોળો કોરાડા ઉપને દોરિયામાય જાયન ટુટી પોડયો, એને બુડી મોઅયે, લગભગ બેન ઓજાર ડુકરાહા ટોળો આતો. 14 એને ડુકરાહા ગોવાળ નાહી પોડ્યા એને શેહેરામાય એને ગાવામાય કાય જાયા ચ્યા ખોબાર દેની કા લોક તી એઅરા યેના. 15 તોવે કાય જાયા તી એરાહાટી માઅહે ઈસુવાપાય યેને, તોવે જીં બુતડે લાગલા માઅહું ઠાવકાજ બોઠલા દેખ્યો, એને ફાડકે પોવલે એને હારો ઓઇન ભાનમાય દેખ્યો, તીં એઇન ચ્યા બિઇ ગીયા.

16 એને એએનારા માઅહાય, બુતડે લાગલા માઅહા આરે કાય જાયેલ તી વાત એને ડુકરાહા બારામાય જાયલી વાત, લોકહાન આખી દેખાડી. 17 તોવે ચ્યાહાય ઈસુલ વિનાંતી કોઅયી એને આખ્યાં કા તું આમહે હોદ માઅને જાતો રો. 18 તોવે ઈસુ જાંહાટી ઉડીમાય બોહી ગીયો, એને બુત લાગલા માઅહું ઈસુલ રાવ્યાં કોઇન આખા લાગ્યા "માન તોઆરે રા દે." 19 બાકી ઈસુવે ચ્યાલ મોનાઈ કોઅઇ દેની, એને ચ્યાલ આખ્યાં. "ગોઓ જો એને તો જાતલાહાપાય જાયન ઈસુવે તો કોરે કોલાં હારાં કામ કોઅયા એને કોલી દયા કોઅયી તી ચ્યાહાન આખ." 20 તોવે તીં માઅહું, એને ઈસુવે ચ્યાહાટી કોલાં હારાં કામ કોઅયા, દોહો શેહેરાહા પાહિલ્યા ભાગામાય જાતો રિયો, જ્યાલ દકોપોલીસ આખવામાય યેહે, એને જાયન જાહેર કોઅયા, એને બોદહાન ચ્યા નોવાય લાગી.